Memleket basshysy Qasym-Jomart Toqaev premer-mınıstr Asqar Mamındi qabyldady, dep habarlaıdy Aqorda saıty.
Qazaqstan Prezıdentine bıylǵy 9 aı ishindegi elimizdiń áleýmettik-ekonomıkalyq damý qorytyndylary jóninde esep berildi.
Qasym-Jomart Toqaevqa birqatar salada damýdyń oń qarqyny baıqalatyny baıandaldy. Atap aıtqanda óńdeý ónerkásibiniń ósimi 3,3 %-ǵa jetken, qurylys kólemi 10,5 %-ǵa, turǵyn úılerdiń paıdalanýǵa berilýi 9 %-ǵa nemese shamamen 9,6 mıllıon sharshy metrge artqan. Aýyl sharýashylyǵyndaǵy ósim kórsetkishi 5%-dy qurady. Qazaqstannyń altyn-valıýta qory men Ulttyq qor aktıvteri 1 qazandaǵy málimet boıynsha 91,1 mıllıard dollarǵa jetti.
Úkimet basshysynyń aıtýynsha, qyrkúıekte qyzmet kórsetý salasyndaǵy belsendilikti qaıta qalpyna keltirý jumystary bastaldy. Osy rette tamyz aıymen salystyrǵanda saýda-sattyq 2,7 %-ǵa, baılanys 1,3%-ǵa, kólik jáne qoıma 1,2 %-ǵa artqan. Qyzmet kórsetý sektoryndaǵy ósim shaǵyn jáne orta bıznestiń jandanǵanyn bildiredi. Bul jańa jumys oryndarynyń ashylýyna jáne azamattardyń ál-aýqatynyń jaqsarýyna yqpal etedi.
Premer-Mınıstr 11-12 qazan kúnderi Abý-Dabı qalasyna jasaǵan jumys saparynyń qorytyndylary týraly esep berdi. Atalǵan sapar barysynda Memleket basshysy Qasym-Jomart Toqaevtyń bıylǵy qańtarda Birikken Arab Ámirlikterine jasaǵan resmı sapary kezinde qol jetkizgen ýaǵdalastyqtardyń naqty júzege asyrylyp jatqanyna kóz jetkizildi. Sonymen qatar eki el úkimetteri Investıııalyq yntymaqtastyq týraly memorandýmǵa qol qoıdy. Onda quny 6,1 mıllıard dollar bolatyn 21 jobany júzege asyrý kózdelgen. Atalǵan qujat joǵary qosymsha quny bar jáne paıdasy mol, sondaı-aq, ishki naryqta da, syrtqy naryqta da úlken suranysqa ıe bolatyn óndiris oryndaryn ashýǵa baǵyttalǵan.
Memleket basshysy ekonomıkany damytýdyń oń qarqynyn qamtamasyz etý jónindegi Úkimettiń atqarǵan is-qımyldaryn atap ótip, azamattarymyzdyń densaýlyǵyna, shaǵyn jáne orta bıznestiń jumysyna, sondaı-aq, jalpy ekonomıkanyń damýyna shetelde keń taraǵan koronavırýs indetiniń keri áserin boldyrmaý úshin Premer-Mınıstrge elimizdegi epıdemıologııalyq ahýaldy qatań baqylaýǵa alýdy tapsyrdy.
"Adyrna" ulttyq portaly
