قىرعىزستان پرەزيدەنتى سوورونباي جەەنبەكوۆ بىشكەكتە توتەنشە جاعداي جاريالاۋ تۋرالى ەكىنشى رەت جارلىققا قول قويدى، دەپ حابارلايدى ازاتتىق.
پرەزيدەنتتىڭ ءباسپاسوز قىزمەتىنىڭ حابارلاۋىنشا، جوگوركۋ كەڭەش سوڭعى ءۇش كۇندە قالادا تج ەنگىزۋ تۋرالى شەشىمدى قاراستىرماعاندىقتان قايتادان جارلىققا قول قويىلىپ وتىر.
جارلىققا سايكەس، قالادا 12 قازان كەشكى ساعات 20.00-دەن باستاپ 19 قازان تاڭەرتەڭگى ساعات 7-گە دەيىن تج رەجيمى ەنگىزىلەدى. قۇجاتتا "جاپپاي تارتىپسىزدىك سالدارىنان ادامداردىڭ ءومىرى مەن دەنساۋلىعىنا قاۋىپ تونگەندىكتەن" تج رەجيمى ەنگىزىلىپ وتىر دەپ جازىلعان.
قالا كومەندانتى بولىپ ىشكى ىستەر ءمينيسترىنىڭ ورىنباسارى المازبەك وروزاليەۆ تاعايىندالعان. وسىعان دەيىن پرەزيدەنتپەن كەزدەسۋ كەزىندە وروزاليەۆتىڭ تج رەجيمىن ۇزارتۋ تۋرالى ۇسىنىس ايتقانى حابارلانعان ەدى.
پرەزيدەنت العاش رەت 9 قازاندا بىشكەكتە توتەنشە جاعداي جاريالاعان. قىرعىزستاندا 4 قازاندا وتكەن پارلامەنت سايلاۋىنان كەيىن ساياسي كۇشتەر بىشكەكتەگى "الا-توو" الاڭىندا نارازىلىق اكتسياسىن باستاعان. پارلامەنت سايلاۋىنىڭ ناتيجەسىن جويۋدى تالاپ ەتكەن نارازىلىق اكتسيالارىنىڭ سوڭى تارتىپسىزدىككە ۇلاسقان. 6 قازانعا قاراعان ءتۇنى دەمونسترانتتار پارلامەنت پەن پرەزيدەنت اپپاراتى ورنالاسقان "اق ءۇيدى" باسىپ الدى.
سول كۇنى نارازىلار تالابىنان كەيىن تۇرمەدەگى بىرنەشە ساياساتكەر قاماۋدان شىقتى. ولاردىڭ اراسىندا بۇرىنعى پرەزيدەنت المازبەك اتامباەۆ، بۇرىنعى دەپۋتات سادىر جاپاروۆ تا بولدى. 10 قازاندا جاپاروۆ پرەمەر-مينيستر قىزمەتىنە بەكىتىلگەن. كەيبىر دەپۋتاتتار ونىڭ قىزمەتكە تاعايىندالۋىنىڭ لەگيتيمدىگىنە كۇمان كەلتىرگەن.
قىرعىزستاندا ساياسي كۇشتەر داعدارىستان شىعۋ جولدارىن ءالى تالقىلاپ جاتىر. 9 قازانعا قاراعان ءتۇنى سوورونباي جەەنبەكوۆ "مەملەكەت قۇقىقتىق اياعا ورالعان سوڭ پرەزيدەنت قىزمەتىنەن كەتۋگە دايارمىن" دەپ مالىمدەگەن.
