Qyrǵyzstan prezıdenti Sooronbaı Jeenbekov Bishkekte tótenshe jaǵdaı jarııalaý týraly ekinshi ret jarlyqqa qol qoıdy, dep habarlaıdy Azattyq.
Prezıdenttiń baspasóz qyzmetiniń habarlaýynsha, Jogorký Keńesh sońǵy úsh kúnde qalada TJ engizý týraly sheshimdi qarastyrmaǵandyqtan qaıtadan jarlyqqa qol qoıylyp otyr.
Jarlyqqa sáıkes, qalada 12 qazan keshki saǵat 20.00-den bastap 19 qazan tańerteńgi saǵat 7-ge deıin TJ rejımi engiziledi. Qujatta "jappaı tártipsizdik saldarynan adamdardyń ómiri men densaýlyǵyna qaýip tóngendikten" TJ rejımi engizilip otyr dep jazylǵan.
Qala komendanty bolyp ishki ister mınıstriniń orynbasary Almazbek Orozalıev taǵaıyndalǵan. Osyǵan deıin prezıdentpen kezdesý kezinde Orozalıevtiń TJ rejımin uzartý týraly usynys aıtqany habarlanǵan edi.
Prezıdent alǵash ret 9 qazanda Bishkekte tótenshe jaǵdaı jarııalaǵan. Qyrǵyzstanda 4 qazanda ótken parlament saılaýynan keıin saıası kúshter Bishkektegi "Ala-Too" alańynda narazylyq akııasyn bastaǵan. Parlament saılaýynyń nátıjesin joıýdy talap etken narazylyq akııalarynyń sońy tártipsizdikke ulasqan. 6 qazanǵa qaraǵan túni demonstranttar parlament pen prezıdent apparaty ornalasqan "Aq úıdi" basyp aldy.
Sol kúni narazylar talabynan keıin túrmedegi birneshe saıasatker qamaýdan shyqty. Olardyń arasynda burynǵy prezıdent Almazbek Atambaev, burynǵy depýtat Sadyr Japarov ta boldy. 10 qazanda Japarov premer-mınıstr qyzmetine bekitilgen. Keıbir depýtattar onyń qyzmetke taǵaıyndalýynyń legıtımdigine kúmán keltirgen.
Qyrǵyzstanda saıası kúshter daǵdarystan shyǵý joldaryn áli talqylap jatyr. 9 qazanǵa qaraǵan túni Sooronbaı Jeenbekov "memleket quqyqtyq aıaǵa oralǵan soń prezıdent qyzmetinen ketýge daıarmyn" dep málimdegen.
