پرايمەريز: اقتوبە وبلىسىندا 27 مىڭعا جۋىق پارتيا مۇشەسى ءوز تاڭداۋىن جاسادى

1784
Adyrna.kz Telegram

بۇگىن «Nur Otan» پارتياسى اقتوبە وبلىستىق فيليالى توراعاسى، وبلىس اكىمى وڭداسىن ورازالين پرايمەريزگە قاتىسقان كانديداتتارمەن كەزدەستى. پارتياىشىلىك سايلاۋعا بەلسەندى اتسالىسقاندارى ءۇشىن ولارعا العىس ءبىلدىرىپ، العىس حاتتارمەن ماراپاتتادى.

- وزدەرىڭىز جاقسى بىلەسىزدەر، قوعام وزگەرىپ، ومىرىمىزگە كۇن سايىن ءبىر جاڭالىق ەنگىزىلىپ كەلەدى.  مۇنداي فورماتتاعى پارتياىشىلىك ىرىكتەۋ ەلىمىزدە العاش رەت وتكىزىلىپ وتىر. ساياسي جاڭاشىلدىق حالىق تاراپىنان ۇلكەن قىزىعۋشىلىق تۋدىرىپ، ەل تۇرعىندارى داۋىس بەرۋدە بەلسەندىلىك تانىتتى. اقتوبەلىك كانديداتتار دا ەل الدىندا وزدەرىنىڭ باعدارلامالارىن تانىستىرىپ، مەملەكەتىمىزدىڭ دامۋىنا مۇددەلى، جىگەرلى، ءبىلىمدى ءارى بەلسەندى ازاماتتار ەكەندىكتەرىن كورسەتتى. تىركەلگەن ۇمىتكەرلەر ۇگىت-ناسيحات جۇمىستارىن اشىق ءارى بەلسەندى جۇرگىزدى. بۇل «Nur Otan» پارتياسىنىڭ توراعاسى،  ەلباسىنىڭ باستاماسىمەن كوتەرىلگەن جاڭاشىلدىققا جانە پارتيا تاراپىنان اتقارىلىپ جاتقان جۇمىستارعا حالىقتىڭ زور سەنىمىنىڭ ودان ءارى ارتقانىن بىلدىرەدى، - دەدى ايماق باسشىسى.

جالپى، پارتياىشىلىك سايلاۋدا اقتوبە وڭىرىنەن 460 كانديدات باق سىنادى. ولاردىڭ 36,7 پايىزى – ايەلدەر، 28 پايىزى – 35 جاسقا دەيىنگى جاستار. باستاۋىش پارتيا ۇيىمدارىنان كانديداتتاردىڭ 50,4 پايىزى ۇسىنىلسا، 49,6 پايىزى– ءوزىن-ءوزى ۇسىنعاندار.

تىركەلگەن ۇمىتكەرلەر ۇگىت-ناسيحات جۇمىستارىن بەلسەندى جۇرگىزدى. ولار پارتيالاستارىمەن 6 مىڭنان استام كەزدەسۋ وتكىزىپ، ءوز باعدارلامالارىن ۇسىندى. ونىڭ 642-ءسى ونلاين فورماتىندا ۇيىمداستىرىلدى. 16 جەردە وتكەن 87 جاريا پىكىرسايىستا ءتۇرلى ماسەلەلەر كوتەرىلىپ، وڭتايلى شەشۋ جولدارى ايتىلدى.

رەسپۋبليكا بويىنشا داۋىس بەرۋگە 700 مىڭعا جۋىق پارتيا مۇشەسى قاتىسقان. ونىڭ ىشىندە اقتوبە وبلىسىنان 27 مىڭعا جۋىعى ءوز تاڭداۋىن جاسادى. بۇل وبلىستاعى پارتيا مۇشەلەرىنىڭ 87 پايىزى.

سايلاۋشىلاردىڭ باسىم بولىگى، ياعني 23,4 مىڭ ادام ونلاين داۋىس بەردى. ال 3430 پارتيالىق ءداستۇرلى ءادىستى پايدالانىپ، سايلاۋ ۋچاسكەلەرىنە كەلدى.

-پارتياىشىلىك سايلاۋعا  بەلگىلى تۇلعالار دا، مىقتى كاسىپكەرلەر دە، جالىندى جاستار دا قاتىستى. سوعان قاراماستان بىزگە بىردەي جاعداي جاسالدى. پرايمەريز حالىق اراسىنداعى اۋقىمدى ماسەلەلەرمەن تانىسۋعا مۇمكىندىك بەردى. داۋىس بەرۋ اشىق ءارى ءادىل ءوتتى، - دەدى كانديدات جۇلدىز قوجابەكوۆا.

پىكىرلەر