شىمكەنت قالاسىندا 26 قىركۇيەك كۇنى قالالىق ونكولوگيالىق ورتالىقتا «اشىق ەسىك» كۇنى ءوتتى. وندا ەلىمىزدىڭ ۇزدىك ونكولوگ دارىگەرلەرى قالا تۇرعىندارىن قابىلدى.
قاتەرلى ىسىكتى ەرتە ساتىسىندا انىقتاۋ ماقساتىندا وتكەن شاراعا قازاق ۇلتتىق ونكولوگيا جانە راديولوگيا عىلىمي زەرتەۋ ينستيتۋتىنىڭ - ديرەكتورى، م.ع.د. ديليارا قايداروۆا، حيميوتەراپەۆت وكسانا شاتكوۆسكايا، ماممولوگيا ورتالىعىنىڭ مەڭگەرۋشىسى، م.ع.د. اليا ابدراحمانوۆا، گينەكولوگيا ءبولىمىنىڭ مەڭگەرۋشىسى، م.ع.ك. ەرلان كۋكۋباسوۆ سەكىلدى بىلىكتى ماماندار قاتىستى.
ورتالىققا دارىگەرلەر قابىلداۋىنا 100-گە تارتا ناۋقاس كەلگەن. تەكسەرۋ كەزىندە قاتەرلى ىسىككە كۇماندى دەگەن التى ازامات انىقتالدى. تاعى 60 تەكسەرىلۋشىدە قاتەرلى ەمەس ىسىك تابىلسا، 33 ناۋقاستا قاتەرلى ىسىك الدى سوزىلمالى اۋرۋلارى بار ەكەنى بەلگىلى بولدى.
انىقتالعان قاتەرلى ىسىككە كۇماندى جانە قاتەرلى ەمەس ىسىكتى ناۋقاستار قالالىق ونكولوگيالىق ورتالىقتا ەم الاتىن بولادى. ال، سوزىلمالى قاتەرلى ىسىك الدى اۋرۋلارى بايقالعان ناۋقاستارعا كەڭەس بەرىلىپ، جەرگىلىكتى ۋچاسكەلىك تەراپەۆتەرىنە ەم الۋعا جىبەرىلدى.
مەديتسينا قىزمەتكەرلەرى ءار ازاماتتىڭ ءوز دەنساۋلىعىنا جاۋاپكەرشىلىك قاراۋى ماڭىزى زور ەكەنىن ايتۋدا. اسىرەسە، وسىنداي شارالارعا قاتىسىپ، ۋاقتىلى تەكسەرۋدەن ءوتىپ تۇرعان ءجون.
جالپى پروفيلاكتيكالىق، سكرينينگتىك تەكسەرۋلەر تۇراقتى تۇردە ۇيىمداستىرىلۋدا جانە 65 جاستان اسقان ازاماتتاردىڭ دەنساۋلىعى باقىلاۋعا الىنعان. بۇل — ماقساتتى ينديكاتورلاردى جاقسارتىپ، قاتەرلى ىسىكتەردىڭ الدىن الۋعا جانە ءولىم سانىن ازايتۋعا مۇمكىندىك بەرەدى. بۇگىندە اق حالاتتىلار وسى ماقساتتا ايانباي ەڭبەك ەتۋدە.
شىمكەنت قالاسى اكىمىنىڭ ءباسپاسوز قىزمەتى
