قر ىشكى ىستەر ءمينيسترى ەرلان تۇرعىمباەۆ تۇركىستان وبلىسىندا بولعان ءوز بالالارىن ۇرىپ-سوعۋ وقيعاسىنا قاتىستى پىكىر ءبىلدىردى، دەپ حابارلايدى "ادىرنا" ءتىلشىسى.
«تۇرمىستىق جانجال سالاسىنا قاتىستى قۇقىق بۇزۋشىلىق جانە قىلمىس بىرجاقتى بولمايدى. مۇنىڭ ەكىنشى جاعى بولاتىندىعىنا نازار اۋدارعىم كەلەدى. تۇركىستان وبلىسىنداعى جاعدايعا كەلسەك، بالالاردىڭ اناسى بۇعان دەيىن دە كۇيەۋىنىڭ ۇستىنەن بىرنەشە مارتە شاعىم تۇسىرگەن، بىراق ارىز جازباعان. ول ونىڭ زاڭدى ايەلى، كۇيەۋىنەن اجىراسۋعا ءوتىنىش بەرمەگەن. بۇل جەردە پوليتسەيلەردىڭ جۇمىسىن ايقىندايتىن وزىندىك زاڭنامالىق تۇستار بار. ياعني، ءبىز شاعىمسىز ول ايەلدىڭ جولداسىن 3 ساعاتتان ارتىق قاماۋدا ۇستاي المايمىز. سونداي-اق، سەبەپسىز اكىمشىلىك جاۋاپكەرشىلىككە دە تارتا المايمىز»، - دەدى ە. تۇرعىمباەۆ.
ايتا كەتەيىك، كەشە الەۋمەتتىك جەلىدە ەر ادامنىڭ كامەلەتتىك جاسقا تولماعان بالانى ۇرىپ جاتقان بەينەجازباسى تاراپ كەتىپ، جەلى قولدانۋشىلارى الگى ادامدى جازالاۋ كەرەكتىگىن ايتقان. ارتىنشا بۇل ءىس سوتقا دەيىنگى تەرگەۋ تىزىلىمىنە قر قك 110-بابى 2-بولىگىمەن، ياعني «ازاپتاۋ» ءىسى بويىنشا تىركەلىپ، ءتارتىپ ساقشىلارى بالالارىن ۇرعان اكەنى ۇستاپ العان بولاتىن.
جاسۇلان ءناۋرىزالى،
"ادىرنا" ۇلتتىق پورتالى
