«استانا LRT» كومپانياسى لاۋازىمدى ادامدارىنىڭ ءىسى سوتقا جولداندى. مۇنى سىبايلاس جەمقورلىققا قارسى ءىس-قيمىل اگەنتتىگى 1-ءشى دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بەكايداروۆ ءمالىم ەتتى، دەپ حابارلايدى "ادىرنا" ءتىلشىسى.
«سىبايلاس جەمقورلىققا قارسى قىزمەت جەڭىل رەلستى كولىك جوباسىن ىسكە اسىرۋ كەزىندە 5,8 ملرد تەڭگەنى جىمقىرۋ فاكتىسى بويىنشا نۇر-سۇلتان قالاسى اكىمدىگىنىڭ، «استانا LRT» جشس جانە باسقالاردىڭ لاۋازىمدى ادامدارىنا قاتىستى قىلمىستىق ءىستى اياقتاپ، ول سوتقا جولداندى. سوتقا بارلىعى 7 ادام بەرىلدى. ق.سۇلتانبەكوۆ جانە ت. اردان «كۇزەتپەن ۇستاۋ» بۇلتارتپاۋ شاراسىمەن حالىقارالىق ىزدەۋدە. قر قپك 201- بابىنىڭ تارتىبىمەن جانە تەرگەۋ مۇددەسىنە سايكەس وزگە اقپارات جاريالاۋعا جاتپايدى»، - دەدى ول ونلاين بريفينگتە دانيار بەكايداروۆ.
ايتا كەتەيىك، اتىشۋلى جوبا 2009 جىلى يمانعالي تاسماعامبەتوۆتىڭ ەلوردا اكىمى بولىپ تۇرعان كەزىندە باستالعان. مەترونىڭ ۇزىندىعى 41 شاقىرىم بولىپ بەكىتىلگەن.
ال 2015 جىلى تاسماعامبەتوۆتىڭ ورنىنا كەلگەن جاقسىبەكوۆ بۇل جوبانى EXPO 2017 حالىقارالىق كورمە تۇسىندا پايدالانۋعا بەرەمىز دەپ ۋادە ەتكەن. ارادا ءبىر جىل وتكەندە قالا اكىمىنىڭ ورىنباسارى سەرگەي حوروشۋن جۋرناليستەرگە LRT قۇرىلىسى 2017 جىلعا دەيىن سالىنىپ ۇلگەرمەيتىنىن ايتتى. اكىمنىڭ سوزىنشە، ءبىر جىل بويى قۇجاتتارعا قول قويۋمەن ۋاقىت وتكىزگەن.
باس قالانىڭ اكىمدىگىنە اسەت يسەكەشوۆ (2017 جىل - رەد.) كەلگەننەن كەيىن LRT اينالاسىندا سىبايلاس جەمقورلىققا قاتىستى اڭگىمە ءوربىدى. اسەت يسەكەشەۆ «استانا LRT» جشس قۇرىلىسىن باقىلاۋ ماقساتىندا «LRT Construction» جشس دەپ اتالاتىن جاڭا كومپانيا قۇردى. ەلباسى نۇرسۇلتان نازارباەۆقا حات جولدانىپ، جوبانىڭ قۇنى قىسقارتىلعانىن مالىمدەدى. ساعىزشا سوزىلعان قۇرىلىس 2019 جىلدىڭ جەلتوقسانىندا پايدالاناتىنى حابارلاندى. بىراق نۇر-سۇلتانعا اكىم بولىپ كەلگەن باقىت سۇلتانوۆ LRT جوباسىنىڭ توقتاپ قالعانىن ايتتى.
2019 جىلى مامىردا قر پرەمەر-ءمينيسترىنىڭ ورىنباسارى ءاليحان سمايلوۆ LRT جوباسىنىڭ قۇرىلىسى 2020 جىلدىڭ 1 قىركۇيەگىنە قاراي اياقتالاتىنىن ايتتى. ال اكىم التاي كولگىنوۆ جەلتوقسان ايىندا جوبانىڭ تولىق اياقتالاتىنىن، بىراق ۋاقىتىن ايتپادى. اكىم العاشقىدا 1,9 ملرد دوللورعا باعالانعان جوبانىڭ 1,2 ملرد دوللارى ۇنەمدەلگەنىن جەتكىزدى. "ماماندارمەن ەسەپتەپ، باستاپقى كەزەڭدە 10 مينۋت جەتكىلىكتى دەپ شەشتىك. ودان كەيىن جيىرەك بولا باستايدى. جەر استى وتكەلدەردىڭ دە سانىن قىسقارتتىپ، ناتيجەسىندە 350 ملن تەڭگە قاراجات ۇنەمدەدىك. جالپى ۇنەم كولەمى شامامەن 1,2 ملرد دوللاردى قۇرايدى. كورىپ وتىرعاندارىڭىزداي، جوبا ءبىرشاما ارزاندادى. تولىقتاي العاندا LRT-نى سالىپ ءبىتىرۋ مىندەتى تۇر. سەبەبى كوپتەگەن دۇنيە جاسالىپ، ينفراقۇرىلىم تارتىلىپ قويىلعان،"- دەدى اكىم. قازىر مەترو جولىنىڭ ۇزىندىعى – 22 شاقىرىم.
