1 قازان – حالىقارالىق قارتتار كۇنى. 1990 جىلى جەلتوقسان ايىنىڭ 15 كۇنى بۇۇ باس اسسامبلەياسى بۇل كۇندى «حالىقارالىق قارتتار كۇنى» دەپ جاريالادى. اسىلىندا، بۇل مەرەكە حح عاسىردان باستاپ پايدا بولعان. باستاپقىدا قارتتار كۇنى ەۋروپادا، كەيىن امەريكادا تويلانعان، ال 80 جىلداردىڭ اياعىنان بەرى بۇكىل الەمدە اتاپ ءوتىلىپ كەلەدى.
قارتتار كۇنىن اتاپ وتۋدەگى باستى ماقسات — از قامتاماسىز ەتىلگەن قارت ادامدارعا، جالعىزباستى قارت زەينەتكەرلەر مەن قارت مۇگەدەكتەرگە كوڭىل ءبولۋ، ولارعا ماتەريالدىق، الەۋمەتتىك-تۇرمىستىق جانە باسقا دا كومەك تۇرلەرىن كورسەتۋ. بۇل كۇنى ءبىزدىڭ ەلىمىزدە عانا ەمەس، الەمنىڭ تۇكپىر-تۇكپىرىندە قارتتارعا ارنالعان مەرەكەلىك ءىس-شارالار وتكىزىلىپ، ەرەسەكتەر تاراپىنان قاريالارعا كومەك كورسەتىلەتىن الۋان ءتۇرلى جوبالار ۇيىمداستىرىلىپ، مەملەكەت ارنايى جاردەماقىلار تاعايىندايدى.
بۇكىلالەمدىك دەنساۋلىق ساقتاۋ ۇيىمىنىڭ جىكتەۋىنە سايكەس، قارت ادامدارعا 60-74 جاس، كارىلەرگە 75-89 جاس ارالىعىنداعىلار، ال، ۇزاق جاساۋشىلارعا جاسى 90-نان اسقاندار كىرەدى.
قاريا - اعىپ جاتقان داريا، تەلەگەي تەڭىز ىسپەتتەس. "قارتى بار ەلدىڭ قازىناسى بار" دەگەن اسىل ءسوزدى حالقىمىز بەكەر ايتپاسا كەرەك. قاي كەزدە دە حالقىنىڭ تىلەۋىن تىلەپ، جۇرتىنا قامقور بولاتىن قارتتارىمىز امان بولسىن!
"ادىرنا" ۇلتتىق پورتالى
