كسرو-نىڭ ءبىرىنشى پرەزيدەنتى ميحايل گورباچەۆ بريتانيالىق The Times گازەتىنە تاياۋدا بەرگەن سۇحباتىندا: كەڭەس وداعى قۇلاماعاندا، الەم ادىلەتتى، قاۋىپسىز جانە تۇراقتى بولار ەدى، - دەپ ايتقان.
ول كسرو-نىڭ قۇلاۋىن قالاماعانىن، بىراق راديكالدار مەن سەپاراتيستەر 1991 جىلى ءساتسىز توڭكەرىستەن كەيىن سالدارى تۋرالى ويلاماي-اق وداقتىڭ ءومىرىن اياقتاعانىن دا اتاپ وتكەن.
سونداي-اق: «ەگەر وداق ساقتالسا، الەمنىڭ جاعدايى قالاي بولار ەدى؟ تاريح نەگىزگى وقيعانى بىلمەيدى. مەنىڭ ويىمشا، الەمنىڭ جاعدايى جاقسى بولىپ، تۇراقتىلىق، قاۋىپسىزدىك، ادىلەت ساقتالاتىن، - دەپ قوسقان.
گورباچەۆ سونىمەن بىرگە ەلدىڭ كۇيرەۋىنە قايتا قۇرۋ ساياساتى اسەر ەتپەگەنىنە سەنىمدى ەكەنىن بىلدىرگەن. ول ءوزىنىڭ رەفورمالاردى كەشەۋىلدەتۋ، ورتالىقسىزداندىرۋ مەن ءالسىز ەكونوميكالىق ساياسات سالدارىنان بىرقاتار قاتەلىكتەرگە جول بەرگەنىن مويىنداپ، سونىڭ سالدارىنان كسرو قۇلادى دەپ سانايتىنىن دا ايتقان.
بۇرىنعى ساياساتكەر بيلىكتەگى باستى جەتىستىكتەرىنىڭ ءبىرى رەتىندە قىرعي قاباق سوعىستى توقتاتقانىن، يادرولىق قارۋسىزدانۋ تۋرالى كەلىسىم جاساۋدى، ەلدەن كەتۋ بوستاندىعىن جانە ءسوز بوستاندىعىنا شەكتەۋ قويماعانىن اتاعان.
سۇحبات بارىسىندا بۇرىنعى كەڭەس ليدەرى رف-نىڭ قازىرگى پرەزيدەنتى ۆ. پۋتينگە ەلدىڭ قازىرگى جاعدايىنا بايلانىستى كەڭەسىن بەرگەن. ول الەمدە الاڭداتارلىق جاعداي تۋىنداعانىن جانە جاڭا قارۋ جارىسىنىڭ قاۋپى وتە جوعارى ەكەنىن اتاپ وتكەن. الەمنىڭ تۇراقتىلىعى ءۇشىن ول ماسكەۋ مەن ۆاشينگتون اراسىنداعى ديالوگتى قاجەت دەپ سانايدى.
فوتو اشىق دەرەككوزدەن الىندى
«ادىرنا» ۇلتتىق پورتالى
