سىبايلاس جەمقورلىققا قارسى قىزمەت دەپارتامەنتى ءدارى-دارمەكتەردى ساراپتاۋ ۇلتتىق ورتالىعىنىڭ ديرەكتورىنا پارا الدى دەگەن كۇدىككە ءىلىندى. بۇل تۋرالى «ادىرنا» ۇلتتىق پورتالى rast.kz سايتىنا سىلتەمە جاساپ حابارلادى.
دەنساۋلىق ساقتاۋ مينيسترلىگىنىڭ «ءدارى-دارمەكتەردى ساراپتاۋ ۇلتتىق ورتالىعى» رمك-ءنىڭ باس ديرەكتورى ەرىك بايجۇنىسوۆكە قاتىستى بىرنەشە مارتە پارا الۋ كۇدىگىنە بايلانىستى «ۇيقاماققا الۋ» تۇرىندە پروفيلاكتيكالىق شارا تاڭدالىپ، جاڭا تەحنولوگيا – ەلەكتروندى باقىلاۋ قۇرالى (بىلەزىك) قولدانىلدى، – دەلىنگەن رەسمي ساۋالعا ەلوردانىڭ سىبايلاس جەمقورلىققا قارسى قىزمەتىنىڭ بەرگەن جاۋابىندا.
قازىرگى تاڭدا ءىستىڭ ءمان-جايلارىن انىقتاۋ ءۇشىن جان-جاقتى، تولىققاندى جانە وبەكتيۆتى باعىتتا تەرگەۋ ارەكەتتەرى جۇرگىزىلىپ جاتىر. باسقا اقپاراتتار تەرگەۋ مۇددەسىنە وراي جاريا ەتىلمەيتىنى دە ايتىلدى. ءىستىڭ سوڭعى شەشىمىن سوت شىعارادى.
ەرىك ءبايجۇنىسوۆ ءدارى-دارمەكتەردى ساراپتاۋ ۇلتتىق ورتالىعىنا جاقىندا، بيىلعى جىلدىڭ 4 تامىزىندا باسشى بولىپ تاعايىندالعان. ول وسى قىزمەتكە بارعان كەزدە-اق الەۋمەتتىك جەلىدەگى كوپ ادام ونىڭ تۇرىنە قاراپ، قىزمەتتى ادال اتقاراتىنىنا كۇمان كەلتىرىپ ەدى.
سول ساباز ەكى ايعا دا جەتپەي پارا الۋمەن قولعا ءتۇسىپ، جەلىدەگىلەردىڭ «سەنىمىن اقتادى»…
21 قىركۇيەكتە سىبايلاس جەمقورلىققا قارسى قىزمەت سىبايلاس جەمقورلىق كۇدىگىنە ىلىنگەنى ءۇشىن ەلەكتروندى قاداعالاۋ قۇرالدارى – «تۇساۋ بىلەزىكتەر» تاعۋ تاجىريبەسى ەنگىزىلگەنىن حابارلادى. ول بۇلتارتپاۋ شارالارى تاڭدالعان تۇلعاعا تاعىلاتىنى دا ايتىلدى. بيىلعى جىلدىڭ 17 قىركۇيەگىندە بۇل تاجىريبە العاش رەت قاراعاندىدا ىسكە قوسىلدى.
فوتو اشىق دەرەككوزدەن الىندى.
