Sybaılas jemqorlyqqa qarsy qyzmet departamenti dári-dármekterdi saraptaý ulttyq ortalyǵynyń dırektoryna para aldy degen kúdikke ilindi. Bul týraly «Adyrna» ulttyq portaly rast.kz saıtyna silteme jasap habarlady.
Densaýlyq saqtaý mınıstrliginiń «Dári-dármekterdi saraptaý ulttyq ortalyǵy» RMK-niń bas dırektory Erik Baıjúnisovke qatysty birneshe márte para alý kúdigine baılanysty «úıqamaqqa alý» túrinde profılaktıkalyq shara tańdalyp, jańa tehnologııa – elektrondy baqylaý quraly (bilezik) qoldanyldy, – delingen resmı saýalǵa elordanyń sybaılas jemqorlyqqa qarsy qyzmetiniń bergen jaýabynda.
Qazirgi tańda istiń mán-jaılaryn anyqtaý úshin jan-jaqty, tolyqqandy jáne obektıvti baǵytta tergeý áreketteri júrgizilip jatyr. Basqa aqparattar tergeý múddesine oraı jarııa etilmeıtini de aıtyldy. Istiń sońǵy sheshimin sot shyǵarady.
Erik Baıjúnisov dári-dármekterdi saraptaý ulttyq ortalyǵyna jaqynda, bıylǵy jyldyń 4 tamyzynda basshy bolyp taǵaıyndalǵan. Ol osy qyzmetke barǵan kezde-aq áleýmettik jelidegi kóp adam onyń túrine qarap, qyzmetti adal atqaratynyna kúmán keltirip edi.
Sol sabaz eki aıǵa da jetpeı para alýmen qolǵa túsip, jelidegilerdiń «senimin aqtady»…
21 qyrkúıekte Sybaılas jemqorlyqqa qarsy qyzmet sybaılas jemqorlyq kúdigine ilingeni úshin elektrondy qadaǵalaý quraldary – «tusaý bilezikter» taǵý tájirıbesi engizilgenin habarlady. Ol bultartpaý sharalary tańdalǵan tulǵaǵa taǵylatyny da aıtyldy. Bıylǵy jyldyń 17 qyrkúıeginde bul tájirıbe alǵash ret Qaraǵandyda iske qosyldy.
Foto ashyq derekkózden alyndy.
