ناۋرىز ايىنان بەرى رەسپۋبليكادا 2,5 مىڭ بالا COVID-19-بەن اۋىرعان.
قازىرگى ۋاقىتتا 39 بالادان كاۆاساكيگە ۇقساس سيندروم انىقتالدى. ولاردىڭ 60%-ءى ساۋىعىپ شىقتى، 40%-ءى ەمدەلىپ جاتىر.
بۇل تۋرالى «پەدياتريا جانە بالالار حيرۋرگياسى عىلىمي ورتالىعى» اق باسقارما توراعاسى ريزا بورانباەۆا ايتتى-دەپ حابارلايدى "ادىرنا" 24.kz -كە سىلتەمە جاساپ.
سيندرومنىڭ كلينيكالىق بەلگىلەرى – دەنە قىزۋىنىڭ 38 گرادۋستان جوعارى كوتەرىلۋى، ول 24 ساعاتقا نەمەسە ودان دا كوپ ۋاقىتقا سوزىلۋى مۇمكىن. سونداي-اق دەنەدە بورتپەلەر پايدا بولادى، ءىشتىڭ اۋىرۋى، ديارەيا، تىنىس الۋ جۇيەسىنىڭ زاقىمدانۋى، جوتەل، تىنىس جەتىسپەۋشىلىگى، ەنتىگۋ، جۇرەك اۋىرۋى، كونيۋنكتيۆيت، الاقان مەن تاباننىڭ ءىسىنۋى.
مامان مۇنداي كەزدە بالانى ۇيدەن ەمدەۋگە تىرىسپاي، دارىگەردىڭ كومەگىنە جۇگىنۋ كەرەك ەكەنىن ەسكەرتتى. ويتكەنى سيندروم اۋىر وتەدى، كەيدە ءتىپتى قارقىندى رەانيماتسيالىق كومەكتى قاجەت ەتۋى مۇمكىن.
«ناعىز كاۆاساكي اۋرۋىنان ايىرماشىلىعى – بۇل سيندروم بارلىق جاستاعى بالالارعا، سونىڭ ىشىندە جاسوسپىرىمدەرگە، 21 جاسقا دەيىنگى جاستارعا دا اسەر ەتەدى»، - دەدى.
"ادىرنا"ۇلتتىق پورتالى
