Ystambul dańǵyldarynyń birine qazaqtyń uly aǵartýshysy Abaıdyń esimi berildi, - dep habarlaıdy "Adyrna" ulttyq portaly KTK telearnasyna silteme jasap.
⠀
Bul týraly Túrkııada turatyn qazaq dıasporasynyń kezdesýi kezinde belgili boldy. Ystambuldaǵy qazaqtardyń kóbi Zeıtınbýrný aımaǵynda turady. Dıaspora ókilderi únemi kezdesip, qalanyń áleýmettik ómirine belsendi qatysady. Ystambuldaǵy Qazaqstan konsýldyǵy uıymdastyrǵan sońǵy kezdesý aıasynda ótken ǵasyrdyń 50-shi jyldary Túrkııaǵa qonys aýdarǵan qazaqtardyń urpaqtary jınaldy.
⠀
"Búgingi kezdesýde kóptegen mańyzdy máseleler talqylandy. Ystambulda turatyn jergilikti qazaq jastary konsýlǵa óz suraqtaryn qoıdy. Al bizdiń aı saıynǵy "Qazaq eli" jýrnalymyzdyń kezekti nómirin Abaıǵa arnady. Mundaı kezdesýler jalǵasady dep úmittenemiz", - dedi túrik qazaqtary birlestiginiń basshysy Ertolqyn Ǵaıretýllah.
⠀
Telearna atap ótkendeı, Túrkııa turǵyndary Abaımen jaqsy tanys. Ár túrli qalalarda aqynnyń qurmetine kósheler men saıabaqtar atalǵan. Aqynnyń esimi Ystambuldaǵy mektepterdiń birine berilgen. Sonymen qatar 4 kún buryn Antalııada Abaı eskertkishi ashyldy. Al endi Ystambuldaǵy úlken dańǵylǵa Abaı esime berildi. Taǵy atap ótetinimiz, dıaspora ókilderi úshin qazaq tilinen qosymsha kýrstar engizilýde.
⠀
"Men Ystambulda týyp-ósken qazaqpyn. Sondyqtan men úshin qazaq tilin úırený óte mańyzdy. Biz osyndaı kezdesýlerdi jıi ótkizýge kelistik. Eger biz únemi kezdesip otyrsaq, ana tilimizdi úırenip, birligimizdi nyǵaıta alamyz", - dedi Ystambul turǵyny Gappar Orhýn Aqdag.
⠀
Ystambul sııaqty úlken qalada Abaı qurmetine kóshe ataý ońaı sharýa emes. Ankaradaǵy Qazaqstan elshiligi men Ystambuldaǵy konsýldyqtyń kúsh-jigeriniń arqasynda bul másele tez sheshildi.
"Adyrna" ulttyq portaly
