«Qolda» شاعىن بيزنەسكە كومەكتەستى

375

2020 جىلى مامىردىڭ ورتاسىندا «بيزنەسكە ارنالعان جەدەل جاردەم» جوباسى ەۋرازيا ورتالىق ازيا قورى «شەۆرون» كومپانياسىمەن سەرىكتەستىكتە جۇزەگە اسىرعان «Qolda» شۇعىل كومەك باعدارلاماسى اياسىندا باستالعان بولاتىن. باستاما ءارتۇرلى دەڭگەيدەگى شاعىن كاسىپورىندار پەن جەكە كاسىپكەرلەرگە كارانتين مەن تج كەزىندە كومەكتەسۋگە باعىتتالعان.

ەلىمىزدە كوروناۆيرۋستىڭ زاربادىن شاعىن جانە ورتا كاسىپكەرلىك سۋبەكتىلەرى، ونىڭ ىشىندە وتباسىلىق كومپانيالار دا تارتىپ وتىر. قازاقستان وتباسىلىق بيزنەس اسسوتسياتسياسىنىڭ  دەرەگىنشە، قازىرگى ۋاقىتتا قازاقستاندا تىركەلگەن فيرمالاردىڭ  70%-دان استامى – وتباسىلىق كومپانيالار.

جوبا بارىسىندا توپتىق جانە جەكە كونسۋلتاتسيالار، ترەنينگتەر، كەزدەسۋلەر، ۆەبينارلار وتكىزىلدى، سونىمەن قاتار بيزنەسكە ارنالىپ جەكە دامۋ جوسپارلارى جاسالدى.

50%-دان استام كاسىپكەرلەر ينتەرنەتكە كوشۋ ماسەلەلەرى، كارانتين مەن تج جاعدايىندا جۇمىس ىستەۋ بويىنشا حابارلاستى.  25%  كاسىپكەرلەر بيزنەستى جابۋدى نەمەسە ۋاقىتشا توقتاتۋدى جوسپارلاعان.  95% مەملەكەت تاراپىنان ەشقانداي كومەكتىڭ جوقتىعىن، داعدارىس ۋاقىتىندا جۇمىس جاساۋعا مۇمكىندىكتىڭ از ەكەنىن ايتتى. 99% كاسىپكەرلەر پاندەمياعا بايلانىستى باستالعان ەكونوميكالىق داعدارىستىڭ زاردابىن تارتقان، ولارعا پسيحولوگيالىق جانە مورالدىق كومەك قاجەت بولدى.

ناتيجەسىندە 288 جەكە دامۋ جوسپارى جاسالدى. وندا كاسىپكەرلەر ارتىق شىعىنسىز جۇزەگە اسىرا الاتىن داعدارىسقا قارسى ارەكەتتەر جيناقتالعان. 2000-عا جۋىق بيزنەس بويىنشا ماماندار مەن پسيحولوگتاردىڭ  جەكە كونسۋلتاتسيالارى ءوتتى. سونىمەن قاتار، كاسىپكەرلىك تاقىرىبىندا  21 ۆەبينار مەن 14 موتيۆاتسيالىق كەزدەسۋ ءوتتى.

«پروتسەسستەردى قۇرۋ، جوسپارلاۋ، جدج دايىنداۋ – «بيزنەسكە ارنالعان جەدەل جاردەم» جوباسى اياسىندا كاسىپكەرلەردى الاڭداتقان نەگىزگى سۇراقتار. جابىلۋدىڭ الدىندا تۇرعان كومپانيالار دا ءبىزدىڭ كومەگىمىزگە جۇگىندى. كەيبىر كاسىپكەرلەرگە بيزنەستى ساقتاپ قالۋعا ىقپال ەتسەك، كەيبىرىنە زاڭدى تۇردە قىزمەتىن توقتاتۋعا نەمەسە ۋاقىتشا توقتاتۋعا كومەكتەستىك. باتىل قادام جاساۋعا قورىققان كاسىپكەرلەردە بولعان وزگەرىستەردى كورىپ قۋاندىق. بۇل جەردە كاسىپكەردىڭ ورنىنا بىرنارسە ىستەپ بەرۋ ەمەس، وعان قولداۋ كورسەتىپ، دۇرىس باعىت بەرۋ ماڭىزدى. ءتىپتى ولاردىڭ جاڭا ويلارىن دەر كەزىندە ماقۇلداۋدىڭ ءوزى دە ناتيجە بەرەدى»، – دەپ اتاپ ءوتتى  قازاقستان وتباسىلىق بيزنەس اسسوتسياتسياسىنىڭ بيزنەس-پروتسەسستەر بويىنشا ساراپشىسى تاتيانا شپيلكوۆا.

قازاقستان وتباسىلىق بيزنەس اسسوتسياتسياسىنىڭ بيزنەستى دامىتۋ بويىنشا ساراپشىسى ايدا قامىسوۆانىڭ ايتۋىنشا: «جوبا بارىسىندا ءبىزدىڭ كاسىپكەرلەرىمىزدىڭ ەرتەڭگى كۇنىن ويلامايتىنىنا كوز جەتكىزدىك. ولار «قاۋىپسىزدىك جاستىعىن» جاساۋدى ويلامايدى جانە بيزنەسكە تۇسكەن پايدانىڭ بارلىعىن ءوزىنىڭ تابىسى رەتىندە كورەدى. ءبىزدىڭ ميكروبيزنەس وكىلدەرىنىڭ قارجىلىق ساۋاتتىلىعىنىڭ مۇلدە تومەن ەكەنىنە كوز جەتكىزدىك».

ناتيجەسىندە 20% جۋىق كاسىپكەرلەر دەر كەزىندە كاسىبىنە وزگەرىس ەنگىزە الدى. كانتسەليارلىق تاۋارلار دۇكەنىنىڭ ديرەكتورى ايگۇل راحيموۆا «بيزنەسكە ارنالعان جەدەل جاردەم» جوباسىنىڭ ارقاسىندا كاسىبىن وفلايننان ونلاينعا كوشىردى. «قازىر جالدامالى وفيستەن باس تارتىپ، قويمانى عانا قالدىردىم. قازىر كومپانيانىڭ بارلىق قىزمەتكەرلەرى قاشىقتان جۇمىس ىستەپ وتىر. ءبىز شىعىنداردى ازايتۋدىڭ ارقاسىندا، جاعدايدى ۇتىمدى پايدالاندىق دەپ ايتا الامىن» ،-دەيدى ايگۇل.

جوبا قورىتىندىسى بويىنشا بيزنەستىڭ ءارتۇرلى باعىتتارى بويىنشا قىزمەت كورسەتەتىن ساراپشىلاردىڭ بىرىڭعاي بازاسىن جاساۋ تۋرالى شەشىم قابىلداندى. سەرۆيس  2020 جىلى قازاندا ىسكە قوسىلادى. ونى قر بويىنشا بارلىق كاسىپكەر پايدالانا الادى.

ەستەرىڭىزگە سالا كەتەيىك، «بيزنەسكە ارنالعان جەدەل جاردەم» جوباسىنا ورتالىق ازيانىڭ ەۋرازيا قورى «شەۆرون» كومپانياسىمەن بىرگە كارانتيننىڭ حالىققا تيگىزەتىن كەرى اسەرىن تومەندەتۋ، قوعامدىق جانە ەرىكتىلەر ۇيىمدارىن قولداۋ، باق ارقىلى حالىقتى اقپاراتتاندىرۋ ماقساتىندا  ۇيىمداستىرىپ جاتقان «Qolda» شۇعىل كومەك جوباسى اياسىندا قارجىلاي قولداۋ كورسەتىلگەن بولاتىن.

 

واەق – ورتالىق ازيانىڭ ەۋرازيا قورى (واەق) – 2005 جىلى ايماقتا قۇرىلعان ۇكىمەتتىك ەمەس ۇيىم. واەق جەرگىلىكتى قاۋىمداستىقتاردى نىعايتۋ مەن ازاماتتىق جانە ەكونوميكالىق ءال-اۋقاتىن جاقسارتۋ ارقىلى، ازاماتتتاردىڭ ءوز بولاشاعىن قۇرۋدا بەلسەندى قاتىسۋعا كومەكتەسۋ ءۇشىن قوعامدىق جانە جەكە رەسۋرستاردى جۇمىلدىرادى.

«شەۆرون» كورپوراتسياسى – دۇنيەجۇزىندەگى ەڭ ءىرى ەنەرگەتيكالىق كومپانيالاردىڭ ءبىرى. ول شيكى مۇناي مەن تابيعي گازدى گەولوگيالىق بارلاۋ، ءوندىرۋ جانە تاسىمالداۋ; كولىك وتىنى مەن مايلاۋ ماتەريالدارىن قايتا وڭدەۋ، وتكىزۋ، جانە تاراتۋ; مۇناي حيميا ونىمدەرى مەن قوسىمشالاردى ءوندىرۋ جانە ساتۋ; جانە كومپانيانىڭ ءار سالاسىنداعى تيىمدىلىكتى نىعايتۋ تەحنولوگيالارىن جۇزەگە اسىرۋمەن اينالىسادى.

«شەۆرون» قازاقستانداعى الدىڭعى قاتارلى جەكەمەنشىك مۇناي ءوندىرۋشى جانە ەلدەگى ەكى ەڭ ءىرى كەن ورنى – تەڭىز جانە قاراشىعاناق جوبالارى اكتسيالارىنىڭ ەداۋىر بولىگىنە يە. سونداي-اق، «شەۆرون» كاسپي قۇبىر جەلىسى كونسورتسيۋمىنىڭ ەڭ ءىرى جەكەمەنشىك اكتسيونەرى، سونىمەن قاتار، اتىراۋداعى پوليەتيلەن قۇبىرلار زاۋىتىنا يەلىك ەتەدى.

پىكىرلەر
رەداكتسيا تاڭداۋى