تالانت قالاي اشىلماق؟

803
سەنىڭ بويىڭدا قانداي تالانت بار ەكەنىن بىلەسىڭ بە؟ تەك سەندىك، باسقا ەشكىمدىكى ەمەس – ەرەكشە دارىن، وزگەدەن ايشىقتايتىن قابىلەت. بارىنەن ارتىق ىستەيتىنىڭ، جان-تانىڭمەن بەرىلىپ ىستەيتىن اۋەستىگىڭ. بۇنى كەيدە ومىرلىك ماقسات دەپ تە اتاپ جاتادى. بۇل سۇراققا ايەلدەردىڭ دەنى – بىلمەيمىن دەپ جاۋاپ بەرەدى.
سوسىن جانى قالامايتىن جۇمىسقا جەگىلەدى. جالاقىسى وزىنە دە جەتپەي جۇرگەنى سول.
ال ءوزىنىڭ تالانتىن اشقان باقىتتىلار بىردە ءبىر كۇن جۇمىس ىستەمەيدى. ولار سۇيىكتى ىسىمەن شۇعىلدانادى. جۇرەكتەرى لۇپىلدەپ، كوزدەرى جانىپ تۇرادى. كوبىنە مۇنداي ءىسى ارتىعىمەن باعالانىپ، سول ءۇشىن ارتىعىمەن اقى الىپ جاتادى. ونىڭ ۇستىنە كوڭىلى جاي، ماتەريالدى جاعدايى ءبۇتىن. جولى بولعىشتاردىڭ ىرىزدىعى دەي سالادى. مۇنىڭ قۇپياسىن بىلگىڭ كەلە مە؟
دۇنيە ەسىگىن اشقان ءار ادامنىڭ ەرەكشە تالانتى بار.
سەنىڭ دە ەرەكشە تالانتىڭ بار. بۇل تالانت باسقا ەشكىمگە بەرىلمەگەن. تەك ساعان ارنالعان جاراتقاننىڭ سىيى. ونى نازىك، قۋاتتى، پاك جانىڭ قابىلداعان. ەگەر تۇيسىگىڭە سەنسەڭ، ول سەنى ءومىر جولىنان اداستىرماي الىپ وتەدى. ويتكەنى، تۇيسىك سەن تۋرالى ءبارىن بىلەدى. تەك سەنە ءبىل. تۇيسىككە سەنسەك، جۇرەككە سەنسەك – ادام ءوز تالانتىن اشىپ، ومىرلىك ماقساتىن ورىندايدى ەكەن. سوندا عانا دەنىمىز ساۋ، باقىتتى، اقشامىز كوپ بولادى. سوندا عانا ادام تاۋەلسىز، باي، ازات ءومىر كەشەدى. ونىڭ ۇستىنە ومىرلىك ماقساتىن تاپقان ادام سۇيىكتى بولادى. سەبەبى، جۇرەكتەگى جارىعىن قوسا العانى. جۇرەكتەگى جارىعى جانعان ادامدى جاقسى كورمەۋ مۇمكىن ەمەس.
تالانتىڭدى اشۋ ءۇشىن نەگە دايىنسىڭ؟
ءبىرىنشى كەزەڭ: مۇمكىندىكتەردى بايقاۋ
كۇن سايىن ءومىردى باي، ماعىنالى، جاقسىراق ەتەتىن سان الۋان مۇمكىندىكتەرمەن بەتپە بەت كەلەمىز. تەك اسىعىپ بارا جاتىپ ءمان بەرمەيمىز. سولاردى قالاي بايقاۋعا بولادى؟ قالاي پايدالانساق ەكەن دەيمىز؟
ءبىرىنشى ءتاسىل: تىلەك ايتۋ.
مۇمكىندىك اداممەن تىلەك تىلىندە سويلەسەدى. كۇيبەڭ تىرلىكتەن ءبىر ءسات باس ساۋعالاپ، تىنىشتىقتا وتىرا تۇرساڭ، مۇمكىندىكتەردى بايقاۋعا بولادى ەكەن. توقتا. تىنىستا. قازىرگى ساتتەگى ەڭ باستى تىلەگىڭ نە؟ نەنى قالايسىڭ؟
العاشىندا تۇككە تۇرعىسىز بىردەڭە بولۋى ىقتيمال. ال، شىن مانىندە ءبىر قاراعانعا «اقىماق» ءارى «بولىمسىز» تىلەكتەردى ورىنداۋ ءبىراز ۋاقىتتان سوڭ تالانتىڭدى اشۋى مۇمكىن. ارينە، جاي تىلەپ قويا سالماي، سول تىلەكتى ورىنداۋعا نيەتتى بولساڭ.
ەگەر ادام قولدانا الماسا، ەشبىر ناقتى مۇمكىندىك وعان اشىلماس ەدى.
ەكىنشى ءتاسىل: قيىندىق ارقىلى.
كوبىنە باستان وتكەرگەن قيىندىقتى ەڭسەرگەندە مۇمكىندىككە قول جەتكىزىپ جاتامىز. تۇيتكىل-مۇمكىندىك – بۇل ءوسۋ، دامۋ، داعدارىستىڭ باسىن قوساتىن جول. باسقا تۇسكەن قيىندىقتى جەڭىپ، تالانتىمىزدى اشامىز. نە ول ءبىزدى ىشتەن ءتۇتىپ جەپ، جوق قىلادى. ياعني، اۋىر دەرت، دەپرەسسيا، قارجىلاي قيىندىقتار تۋىندايدى.
ەكىنشى كەزەڭ: تاۋەكەلگە بەل بۋ، ارەكەت جاساۋدى باستاۋ
بايقاعان مۇمكىندىكتەردى جۇزەگە اسىرۋ. بۇل كەزەڭدەگى باستى نارسە: وزگەرىسكە بەلدى بەكەم بۋدىرعان ماقساتتى تياناقتاپ وتىرۋ – جەكە باستاعى وزگەرىس، جۇمىستاعى وزگەرىس. ادامنىڭ ءومىر ءسۇرۋى اشىق تەڭىزدە جۇزگەنمەن تەڭ: «قايدا جۇزەتىنىڭدى بىلسەڭ، جاقسى، ماقساتىڭ ايقىن بولسا – ودان دا جاقسى. ايتپەسە، تورىعىپ كەتەسىڭ». ارەكەت ەتسەم دەگەن نيەتىڭ ءوشىپ، جالقاۋلىعىڭ ۇستاپ، اپاتيا باستالىپ كەتەدى. ماقسات ادامعا ماڭىزدى بولۋى ءتيىس. سەنىڭ «اۆتورلىق» قۇقىعىڭ ماڭىزدى. جاڭاشىلدىعى ماڭىزدى. قاتەلەسۋگە دايىن بول. بۇل دامۋدىڭ قالىپتى جولى. ءجۇز رەت قاتەلەسسەڭ دە، اقىرىندا ءدوپ تيەتىن ءسات تۋادى. تاجىريبە – باستاپقىدا قاتەلىك كوپ بولادى. قاتەلىك بولعان كەزدە تۇبەگەيلى سارالاپ، قايتالانباۋىن قاداعالاۋ كەرەك.
ەگەر «قاتەلەسۋ» ءستيلى قالىپتاسسا (سپەتسيفيكالىق تىعىرىق), ەندەشە ولاردىڭ ءتۇپ-تامىرى ءبىر. قاتەلىكتى قوساتىن مەحانيزم ءبىر. سونى انىقتامايىنشا، قاتەلىك قايتالانا بەرمەك. ماعان قاتەلىكتى تۇزەۋگە پسيحوتەراپەۆت كومەكتەستى. سالدارىمەن الىسپاي، سەبەبىن كورۋدى ۇيرەتتى.
ءۇشىنشى كەزەڭ: العاشقى جەڭىستى تويلاۋ
ناتيجەگە قول جەتكەندە، تاڭدالعان جولدىڭ دۇرىستىعىن تۇسىنەسىڭ. سول كەزدە ءاربىر ساتتىلىك كەلەسى جەڭىستىڭ تۇعىرىنا اينالا بەرەدى. ىشكى تۇيسىكتىڭ جولىمەن جۇرۋگە دايىنسىڭ با؟
مىناداي زاڭدىلىق بار: باستاپقىدا تۇيسىككە ەرگەندە ادام زور دەنساۋلىق، تابيعي سۇلۋلىق، تاماشا كوڭىل كۇيگە، داۋلەتتى ومىرگە كەنەلەدى. سوسىن ودان دا زورى بولا باستايدى... وسى ساتكە جەتكەندە ءوزىڭدى تانۋدىڭ تەرەڭىنە تۇسۋگە دايىن ەكەنىڭدى تۇسىنەسىڭ. وسىدان باستاپ ءوزىن-ءوزى تانۋدىڭ ەڭ بيىك شىڭى – شىعارماشىلىق كەزەڭ باستالادى.
ءتورتىنشى كەزەڭ: ءوزىڭنىڭ قۇندىلىق جۇيەڭدى سارالاۋ
بۇل كەزەڭدە اركىم ءوز اقيقاتىن تانيدى. ادام وزىنە ەش كۇمانسىز سەنىپ ۇيرەنەدى. عالاممەن ءبىر ارنادا توعىسادى. مەنىكى قايدا، مەنىكى ەمەس قايدا – انىق اجىراتاتىن بولامىز. قازىر عوي بىلەتىندەي كورىنەمىز. ومىرلىك تىعىرىقتى جەڭە الماۋ جانە ناتيجەگە جەتپەۋ سونى اجىراتا الماۋدىڭ كەسىرىنەن. العاشىندا مەنىكى مەن مەنىكى ەمەستى تانۋ قيىن. سەبەبى، ادامدار وزدەرى ويلاپ شىعارعان ءبىر قىزىق الەمدە ءومىر سۇرەدى. قيت ەتسە، اۋىرىپ قالعىشپىز. نە قىزعانىشپەن، نە كورەالماۋشىلىقپەن، نە ۇرەيمەن دەرتتەنەمىز. ونداي كەزدە ەشكىم كەڭەس بەرە المايدى. مىقتى ماماندار دا، ەسكى دوستار دا، جاقسى كورەتىن تۋىستار دا. ولاردىڭ ايتقانى - ولاردىڭ تاجىريبەسى. سەنىكى ەمەس.
ءتورتىنشى كەزەڭدە ءار ادام وزىنە «مەن نەنى قالايمىن؟ ماعان نە قاجەت؟» دەگەن سۇراقتاردى قويۋعا ءازىر بولادى. جاۋابىن تاپسا، كوڭىلىنە جاقپاعاننىڭ ءبارىن جويىپ، قالاۋىنا قاراي وزگەرتۋگە دايىن بولادى.
بەسىنشى كەزەڭ: تەجەلۋ
باسىندا جاۋاپتى ءتۇسىنۋ قيىن بولادى. سوندا مەن نە ىستەۋىم كەرەك؟ ادەتكى سانا ءبارىن وسى كۇيىنشە قالدىر دەپ ايقايلايدى. ادامنىڭ ىنتاسى باسەڭسيدى. ەشتەڭەنى وزگەرتپەۋ كەرەك دەگەنگە دايەك ىزدەيمىز. كوبىنە دايەك تابىلا كەتەدى. بىراق ول ۇزاققا بارمايدى. جانىڭ ەسىك قاعىپ: مەنى تىڭداشى، ماعان سەن، مەن ساعان قىرۋار كۇش-قۋات بەرەم، قالاعانىڭشا الاسىڭ، تەك ءبىر ورىندا تۇرما، قيمىلدا، ارەكەت جاسا، وزىڭە سەن دەيدى.
التىنشى كەزەڭ: الدىمەن ارەكەت جاساپ، سوسىن ءتۇيسىنۋ
جاڭا ءىستى باستاعاندا تەك تۇيسىككە سەنەر بولساڭ، بىردەن قيمىلداۋ كەرەك. بۇل باستى ەرەجە. وزىڭە سەنۋ، تۇيسىگىڭدى ەستۋ، سوندا ءبارى دۇرىس بولادى.
كەيدە ۇشسام دەپ نيەتتەنىپ الامىز دا، ءبىر ورىندا تۇرا بەرەمىز. نەگە؟ ءبىر ورىندا جايدان جاي تۇرا بەرمەيمىز، اۋىرىپ قالامىز، كۇيزەلىسكە تۇسەمىز، «مىنەزىمىز بۇزىلادى». سەبەبى، ءوز تالانتىمىزدى مويىندامايمىز. تالانتىمىز ەسىك قاعادى، ءبىزدى شاقىرادى. اشىلايىنشى دەپ سۇرانادى. سول تابيعي بولمىستى، تىلسىمدى سەزىنىپ تۇرساق تا، ۇشۋعا قورقامىز. ءبىر ساتكە بولسا دا، انامىزدان، ەرىمىزدەن ىرگەمىزدى بولەك سالۋعا قورقامىز. ءوز ءومىرىمىزدى باقىلاۋعا قورقامىز.
ءوز ءومىرىڭدى باسقارۋ – ءوز تالانتىڭدى، ومىرلىك ماقساتىڭدى ايقىنداي وتىرىپ سانالى ءومىر ءسۇرۋ.
لاريسا كوندراشوۆا
اۋدارعان شىنار ءابىلدا
"ادىرنا" ۇلتتىق پورتالى
پىكىرلەر
رەداكتسيا تاڭداۋى