12 قىركۇيەك كۇنى قازاقستان پرەزيدەنتى قاسىم-جومارت توقاەۆ قحر مەملەكەتتىك كەڭەس مۇشەسى، سىرتقى ىستەر ءمينيسترى ۆان ءيدى قابىلدادى، - دەپ حابارلايدى «ادىرنا» ۇلتتىق پورتالى اقورداعا سىلتەمە جاساپ.
تاراپتار ەكىجاقتى ىنتىماقتاستىقتىڭ قازىرگى جاعدايى مەن پەرسپەكتيۆالارىن، حالىقارالىق جانە وڭىرلىك ۇيىمدار اياسىنداعى ىقپالداستىقتى، COVID-19 ىندەتىنىڭ تارالۋىن بولدىرماۋ جونىندەگى ءىس-قيمىلداردى ۇيلەستىرۋ ماسەلەلەرىن تالقىلادى.
قاسىم-جومارت توقاەۆ تىعىز ساياسي ديالوگقا جانە ءوزارا ءتيىمدى ساۋدا-ەكونوميكالىق ىنتىماقتاستىققا نەگىزدەلگەن قازاق-قىتاي قاتىناستارىنىڭ دامۋ قارقىنى مەن دوستىق بايلانىستاردى جوعارى باعالادى.
مەملەكەت باسشىسى ەكونوميكانىڭ ءتۇرلى سالالارىنداعى ينۆەستيتسيالىق جوبالاردى، سونىڭ ىشىندە، اۋىل شارۋاشىلىعى باعىتىنداعى جوبالاردى جۇزەگە اسىرۋدىڭ ماڭىزدى ەكەنىن اتاپ ءوتتى. «قازاقستاندىق ءونىم وندىرۋشىلەردىڭ اۋىل شارۋاشىلىعى بويىنشا قىتايعا ەكسپورتتايتىن ونىمدەرىنىڭ، اتاپ ايتقاندا ءداندى جانە مايلى داقىلداردىڭ نومەنكلاتۋراسى ۇلكەن».
پرەزيدەنت جان-جاقتى ستراتەگيالىق سەرىكتەستىككە قوسىمشا سەرپىن بەرۋ ماقساتىمەن قحر توراعاسى سي ءتسزينپيندى قازاقستانعا ساپارمەن كەلۋگە شاقىرعانىن ناقتىلادى.
ۆان ي ءوز كەزەگىندە قىتاي باسشىسىنىڭ جىلى لەبىزى مەن اۋىزشا سالەمدەمەسىن جەتكىزدى. سي ءتسزينپيننىڭ ايتۋىنشا: «قازاقستان - ايماقتاعى ماڭىزدى ستراتەگيالىق سەرىكتەس جانە قىتاي ەكى ەل حالىقتارىنىڭ يگىلىگى جولىندا ءوزارا ىنتىماقتاستىقتى جان-جاقتى نىعايتۋعا ءازىر».
قىتاي ديپلوماتى «قحر باسشىلىعى قر پرەزيدەنتى جاريالاعان قازاقستان قوعامىنىڭ قاجەتتىلىكتەرىن ەسكەرە وتىرىپ، ساياسي جانە الەۋمەتتىك-ەكونوميكالىق جاڭعىرتۋلارعا باعىتتالعان رەفورمالاردى قۇپتايدى» دەدى.
سونىمەن قاتار ۆان ي قحر-ءدىڭ ەكىجاقتى كۇن ءتارتىبىنىڭ ماڭىزدى بولىگى بولىپ تابىلاتىن قازاقستانمەن ساۋدا-ەكونوميكالىق بايلانىستاردى كەڭەيتۋگە زور كوڭىل بولەتىنىن اتاپ ءوتتى. وسى ورايدا ۆان ي قازاقستان دەلەگاتسياسىن قىتايدا وتەتىن ەكسپو حالىقارالىق يمپورت كورمەسىنە قاتىسۋعا شاقىردى.
اڭگىمەلەسۋ بارىسىندا تاراپتار حالىقارالىق وزەكتى ماسەلەلەر بويىنشا، اتاپ ايتقاندا، كوروناۆيرۋس ينفەكتسياسىنا قارسى ءىس-قيمىل سالاسىنداعى ىنتىماقتاستىق جونىندە دە پىكىر الماستى. مەملەكەت باسشىسى قىتاي تاراپىنا ۋاقىتىلى كورسەتىلگەن گۋمانيتارلىق جانە مەديتسينالىق كومەك ءۇشىن العىس ءبىلدىرىپ، پاندەمياعا قارسى كۇرەستە بىرلەسكەن شارا قولدانۋعا ءازىر ەكەنىن ايتتى.
كەزدەسۋ سوڭىندا تاراپتار ۇزاق مەرزىمدى جان-جاقتى ستراتەگيالىق ارىپتەستىكتى ودان ءارى نىعايتۋعا دايىن ەكەندەرىن ءبىلدىردى.
«ادىرنا» ۇلتتىق پورتالى
