ءوزىن-ءوزى باسقارامىن دەۋشىلەرگە كۇندەلىكتەن ارتىق كومەكشى تابىلمايدى. ويتكەنى، كۇندەلىك جازۋ – وزىڭە-ءوزىڭ ەسەپ بەرۋمەن تەڭ. كۇندەلىك جۇرگىزۋ ءۇشىن ارنايى ەرەجەلەر كەرەك ەمەس. بىراق، كەيبىر ادامدار ارنايى قويىن داپتەر ساتىپ العانىمەن، نەدەن باستارىن بىلمەي دال بولادى. ونداي جاعدايدا سىزدەرگە بىرنەشە كەڭەس ۇسىنامىز:
الدىمەن، بارىنشا اشىق بولىڭىز. ەگەر ءوز كۇندەلىگىڭىزدە دە وزىڭىزگە شەكتەۋ قويساڭىز، قاراپايىم اداممەن جاسالاتىن ديالوگتان ايىرماسى بولمايدى. جازىڭىز. ءبىرتۇرلى ويلارىڭىزدى، قيالىڭىزدى، سىرتقا شىعارۋدان جاسقاناتىن نارسەنىڭ بارلىعىن جازىڭىز.
ەكىنشىدەن، قاعازعا تۇسىرىلگەن جانە ساناڭىزدا قالعان وي ەكى ءتۇرلى. قاعازعا تۇسىرىلگەن ويدى شىندىققا اينالادىرۋعا بولادى. ال، ساناداعى وي مىڭ ويدىڭ اراسىندا جاسىرىن قالادى.
ۇشىنشىدەن، كۇن سايىن جازىڭىز. ۋاقىتىڭىز بولسا، ءبىر ساعاتىڭىزدى ارناساڭىز بولادى. ال، ۋاقىتىڭىز تىعىز جاعدايدا، 10 مينۋتتىڭ ءوزى جەتكىلىكتى.
كۇندەلىكتىڭ تيگىزەر پايداسىن بىرنەشە جاقتان قاراستىرايىق:
پسيحولوگيالىق تۇرعىدان:
ادامدار ءوزىنىڭ ىشكى الەمىنە ءجيى ۇڭىلە بەرمەيدى. وزىندىك ساراپتاما جۇمىسى ءوزىڭىزدى تۇسىنۋگە، سەزىنۋگە، قۇندىلىقتاردى ۇعىنۋعا مۇمكىندىك بەرەدى. ال، ونى ىسكە اسىرۋ ءۇشىن كۇندەلىك كەرەك. ول – قانداي سەزىمدەر سەزىنەمىز، ءوزىمىزدىڭ ءىس-ارەكەتىمىزدىڭ شىنايى سەبەبىن ءبىلۋ ءۇشىن تاپتىرماس كومەكشى.
شىعارماشىلىق تۇرعىدان:
ەگەر جازۋ، سىزۋ، سۋرەت سالۋ سەكىلدى جۇمىستار ءسىزدىڭ سۇيىكتى ىستەرىڭىزدىڭ قاتارىنا ەنسە، كۇندەلىك بۇل قابىلەتتەردى جەتىلدىرۋگە مۇمكىندىك بەرەدى. كۇندەلىككە سۇيىكتى زاتتارىڭىز بەن سىزگە شابىت سىيلايتىن نارسەلەردى جازىڭىز. ەگەر ىلعي جاعىمسىز ويلاردى جازساڭىز، بۇل باعىتتان اۋىسىڭىز.
زياتكەرلىك تۇرعىدان:
ويدى قاعازعا تىركەۋ بۇل زياتكەرلىك قابىلەتتى دامىتۋ. ءسىز ويىڭىزدى تىركەگەن سايىن، ەستە ساقتاۋ قابىلەتىڭىز جەتىلەدى.
"ادىرنا" ۇلتتىق پورتالى
