ۇلتتىق ەكونوميكا ءمينيسترى رۋسلان دالەنوۆ پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ 2020 جىلعى 1 قىركۇيەكتەگى جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسى تۋرالى باياندادى. بۇل تۋرالى "ادىرنا" ءتىلشىسى primeminister.kz ءباسپاسوز قىزمەتىنە سىلتەمە جاساپ حابارلايدى.
مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن ىسكە اسىرۋ ءۇشىن ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ جالپىۇلتتىق ءىس-شارالار جوسپارىنىڭ جوباسىن ازىرلەدى.
جوبا جاڭا ەكونوميكالىق باعداردىڭ 7 نەگىزگى قاعيداتىنا نەگىزدەلگەن جانە 10 باستى باعىت بويىنشا 143 ءىس-شارادان تۇرادى.
ءبىرىنشى باعىت. «مەملەكەتتىك باسقارۋدىڭ جاڭا ۇلگىسى»
مەملەكەتتىك جوسپارلاۋ جۇيەسىن ودان ءارى جەتىلدىرۋ جوسپارلانىپ وتىر.
ءتيىمدى كادر ساياساتى مەن شەشىمدەر قابىلداۋ جۇيەسى قامتاماسىز ەتىلەدى.
مەملەكەتتىك ورگاندار قىزمەتىنىڭ تيىمدىلىگىن ودان ءارى ارتتىرۋ ماقساتىندا 2021 جىلعى 1 شىلدەدەن باستاپ مەملەكەتتىك قىزمەتشىلەرگە ەڭبەكاقى تولەۋدىڭ جاڭا جۇيەسىنە كوشۋ جۇزەگە اسىرىلادى.
ەكونوميكاعا مەملەكەتتىڭ قاتىسۋىن ازايتۋ جونىندەگى شارالار جالعاسادى.
بارلىعى 10 ءىس-شارانى ىسكە اسىرۋ جوسپارلانۋدا.
ەكىنشى. «جاڭا جاعدايداعى ەكونوميكالىق دامۋ»
بۇل باعىتتىڭ نەگىزگى باسىمدىعى وڭدەۋشى ونەركاسىپتىڭ باسەكەگە قابىلەتتىلىگىن ارتتىرۋ جانە قازاقستاندىق قامتۋ ۇلەسىن ۇلعايتۋ.
اگروونەركاسىپ كەشەنىنىڭ الەۋەتىن دامىتۋعا ەرەكشە نازار اۋدارىلادى.
ەلىمىزدىڭ كولىك-ترانزيت سەكتورىن بەلسەندى دامىتۋ جۇمىستارى جالعاسادى.
شاعىن جانە ورتا بيزنەستى، ونىڭ ىشىندە ەكونوميكانىڭ زارداپ شەككەن سەكتورلارىن قولداۋ جانە دامىتۋ جۇمىستارى جالعاستىرىلادى.
اقشا-نەسيە ساياساتى ماڭىزدى ىنتالاندىرۋشى ءرول اتقاراتىن بولادى.
سالىق مىندەتتەمەلەرىن ورىنداۋدى وڭايلاتۋ جانە كولەڭكەلى ەكونوميكانى ازايتۋ بويىنشا جۇمىس جۇرگىزىلەدى.
بارلىعى 42 ءىس-شارانى ىسكە اسىرۋ جوسپارلانۋدا.
ءۇشىنشى. «تەڭگەرىمدى اۋماقتىق دامۋ»
وڭىرلەردىڭ باسەكەگە قابىلەتتىلىگىن ارتتىرۋعا باسا نازار اۋدارىلاتىن بولادى.
ءوندىرىستى دامىتۋ جانە جاڭا جۇمىس ورىندارىن قۇرۋ الەۋەتىن ەسكەرە وتىرىپ، ءوسۋ نۇكتەلەرى قالىپتاستىرىلادى.
شەكارا ماڭىنداعى اۋماقتاردا وتاندىق تاۋارلاردى ىلگەرىلەتۋ ءۇشىن ىنتىماقتاستىق كەڭەيتىلەدى.
بارلىعى 2 شارانى جۇزەگە اسىرۋ جوسپارلانۋدا.
ءتورتىنشى. «ازاماتتاردىڭ الەۋمەتتىك ءال-اۋقاتى – باستى باسىمدىق»
ازاماتتارعا زەينەتاقى جيناقتارىنىڭ ءبىر بولىگىن تۇرعىن ءۇي ساتىپ الۋ جانە ەمدەلۋ ءۇشىن پايدالانۋعا مۇمكىندىك بەرىلەدى.
جالعا بەرىلەتىن تۇرعىن ءۇيدى دامىتۋ، الەۋمەتتىك جاعىنان وسال حالىقتى جالعا بەرىلەتىن باسپانامەن قامتاماسىز ەتۋ جونىندەگى شارالار كەشەنى قابىلدانادى.
الەۋمەتتىك جانە دەموگرافيالىق ساياساتتى جەتىلدىرۋ جالعاسادى.
بارلىعى 10 ءىس-شارا جۇزەگە اسىرىلادى.
بەسىنشى. «قولجەتىمدى ءارى ساپالى ءبىلىم»
تولىققاندى وقۋ پروتسەسىن قامتاماسىز ەتۋ ماقساتىندا بىرىڭعاي ونلاين ءبىلىم بەرۋ پلاتفورماسى ازىرلەنەدى.
ءبىلىم بەرۋ جۇيەسىنە بىلىكتى كادرلار تارتىلادى، پەداگوگ مارتەبەسى ارتادى.
كاسىبي ءبىلىم بەرۋ ەڭبەك نارىعىندا سۇرانىسقا يە بىلىكتى ماماندار قالىپتاستىرۋعا قايتا باعدارلاناتىن بولادى.
ەلىمىزدىڭ عىلىمي الەۋەتىن ارتتىرۋعا ەرەكشە نازار اۋدارىلاتىن بولادى.
بارلىعى 16 ءىس-شارانى جۇزەگە اسىرۋ جوسپارلانۋدا.
التىنشى. «دەنساۋلىق ساقتاۋ سالاسىن دامىتۋ»
مەديتسينالىق ينفراقۇرىلىمدى جاڭعىرتۋعا جانە ماتەريالدىق-تەحنيكالىق جاراقتاندىرۋمەن قامتاماسىز ەتۋگە ەرەكشە نازار اۋدارىلاتىن بولادى.
اۋىلدىق جەرلەرگە قىزمەت كورسەتۋ ءۇشىن باستاپقى مەديتسينالىق-سانيتارلىق كومەك پەن كولىكتىك مەديتسينانى بەلسەندى دامىتۋ جوسپارلانۋدا.
مەديتسينالىق پرەپاراتتاردىڭ وتاندىق ءوندىرىسىن دامىتۋ جونىندە شارالار قابىلدانادى.
بارلىعى 10 ءىس-شارانى ىسكە اسىرۋ جوسپارلانۋدا.
جەتىنشى. «ەكولوگيا جانە بيوالۋانتۇرلىلىكتى قورعاۋ»
مينەرالدىق-شيكىزات بازاسىن، سۋ شارۋاشىلىعىن، بالىق كاسىپشىلىگىن جانە ۇلتتىق پاركتەردى دامىتۋ جونىندە كەشەندى شارالار قابىلدانادى.
قورشاعان ورتانى قورعاۋ سالاسىنداعى ساياساتتى جەتىلدىرۋ جالعاسادى.
«جاسىل ءوسىم» جانە ۇلتتىق ەكونوميكانى تەرەڭ دەكاربونيزاتسيالاۋ بويىنشا شارالار قابىلدانادى.
بارلىعى 8 ءىس-شارانى ىسكە اسىرۋ جوسپارلانۋدا.
سەگىزىنشى. «ادىلەتتى مەملەكەت ازاماتتاردىڭ مۇددەسىن قورعاۋ جولىندا»
ءۇش بۋىندى قىلمىستىق مودەل قۇرىلىپ، قىلمىستىق جانە قىلمىستىق-پروتسەسسۋالدىق زاڭنامانىڭ تۇراقتىلىعى قامتاماسىز ەتىلەدى.
جەرگىلىكتى پوليتسيا قىزمەتىن ودان ءارى جەتىلدىرۋ جالعاسادى.
مەملەكەتتىك ورگاندار مەن كۆازيمەملەكەتتىك سەكتور قىزمەتىنىڭ اشىقتىعى مەن ەسەپتىلىگى ارتادى.
بارلىعى 30 ءىس-شارانى جۇزەگە اسىرۋ جوسپارلانۋدا.
توعىزىنشى. «تسيفرلاندىرۋ – بارلىق رەفورمانىڭ نەگىزگى ەلەمەنتى»
تسيفرلىق تەڭسىزدىكتى جويۋ جانە ينتەرنەتكە بارىنشا قول جەتكىزۋدى قامتاماسىز ەتۋ جونىندە شارالار قابىلدانادى.
زەينەتاقى مەن جاردەماقىلاردى تاعايىنداۋ جانە تولەۋ تسيفرلاندىرىلادى.
دەرەكتەر بازاسىنىڭ بىرىڭعاي جۇيەسى قۇرىلادى.
بارلىعى 8 ءىس-شارانى ىسكە اسىرۋ جوسپارلانۋدا.
ونىنشى. «ازاماتتاردىڭ مەملەكەتتى باسقارۋ ىسىنە قاتىسۋى»
ازاماتتاردىڭ مەملەكەتتىك باسقارۋ ماسەلەلەرىن شەشۋگە بەلسەندى قاتىسۋىن كەڭەيتۋ ماقساتىندا ونلاين-پەتيتسيالاردىڭ بىرىڭعاي زاڭدى ينستيتۋتى قۇرىلادى.
اۋىل اكىمدەرىن تىكەلەي سايلاۋ وتكىزىلەدى.
ءماسليحاتتار قىزمەتىنىڭ اشىقتىعى ارتادى.
جەرگىلىكتى ءوزىن-ءوزى باسقارۋ ورگاندارىنىڭ مارتەبەسى مەن وكىلەتتىكتەرى كۇشەيتىلەدى.
بارلىعى 7 ءىس-شارانى ىسكە اسىرۋ جوسپارلانۋدا.
«مەملەكەت باسشىسىنىڭ تاپسىرمالارىن ءتيىمدى ءارى ساپالى ىسكە اسىرۋ ءۇشىن پرەمەر-مينيستر ورىنباسارلارىنىڭ جەتەكشىلىگىمەن 11 جۇمىس توبىن قۇرا وتىرىپ، جوبالىق ءتاسىلدى قولدانۋ ۇسىنىلادى. جالپىۇلتتىق جوسپاردىڭ ءىس-شارالارىن بەلگىلەنگەن مەرزىمدە ۋاقىتىلى ورىنداۋدى قامتاماسىز ەتۋگە ارنالعان بارلىق قاجەتتى رەسۋرستار مەن تەتىكتەر بار»، — دەپ تۇيىندەدى ر. دالەنوۆ.
"ادىرنا" ۇلتتىق پورتالى
