دۇيسەنبى كۇنى "استانا" ۋنيۆەرسيتەتىنىڭ ءبىر توپ ستۋدەنتى جينالىپ، "وقۋ ورنى وقۋ پروتسەسىن دۇرىس ۇيىمداستىرماي وتىر" دەپ شاعىمداندى. ستۋدەنتتەردىڭ ايتۋىنشا، جاڭا وقۋ جىلى باستالعالى بەرى ساباق بولماعان، مۇعالىمدەر دە كەلمەگەن دەپ حابارلايدى «ادىرنا» ۇلتتىق پورتالى «ازاتتىق» راديوسىنا سىلتەمە جاساپ.
- مۇعالىم جوق، وقۋ قاشان باستالاتىنىن بىلمەيمىز، ۋنيۆەرسيتەتتىڭ تەلەفوندارىنا ەشكىم جاۋاپ بەرمەيدى. بىراق كەيبىر ستۋدەنتتەرگە حابارلاسىپ، "وقۋ اقىسىن تولەڭدەر" دەپ جاتىر. ۋنيۆەرسيتەت جۇمىس ىستەي ما، جوق پا، وقۋ قاشان باستالادى، بىلمەيمىز. بۇل تۋرالى ەشقانداي اقپارات جوق. وسىنى بىلمەي قارجىنى قالاي بەرەمىز؟! - دەيدى بيىل ءتورتىنشى كۋرسقا وتكەن ستۋدەنت زارينا احمەتوۆا.
ستۋدەنتتەر بيىل اقپان ايىنان باستاپ "ۋنيۆەرسيتەتتىڭ ليتسەنزياسىنان ايرىلاتىنى، وقۋ ورنى جابىلاتىنى" تۋرالى سىبىس ەستىگەن، بىراق سوڭعى سەمەستردى ويداعىداي اياقتاعان. ۋنيۆەرسيتەتتىڭ رەسمي سايتىندا 11-13 تامىز ارالىعىندا وقۋ ورنىنىڭ اككرەديتاتسيادان وتەتىنى تۋرالى جازىلعان، بىراق ونىڭ ناتيجەسى تۋرالى اقپارات جوق.
7 قىركۇيەك كۇنى اقپارات قۇرالدارى وقۋ ورنى عيماراتىنا كەلگەن كەزدە ۋنيۆەرسيتەتتىڭ باس كورپۋسى جابىق بولىپ تۇردى. ءوزىن ۋنيۆەرسيتەتتىڭ وكىلىمىن دەپ تانىستىرعان الماس حالەلوۆ ەسىمدى قىزمەتكەر "ساباق 10 قىركۇيەك باستالادى" دەپ حابارلادى.
- ۋنيۆەرسيتەت 11-13 تامىز ارالىعىندا اككرەديتاتسيادان ءوتتى، 28 تامىزدان باستاپ تۇلەكتەر ديپلومدارىن الىپ جاتىر. وقۋ 10 قىركۇيەكتە باستالادى. قازىر پاندەمياعا بايلانىستى كوپتەگەن وقىتۋشىلار اۋىرىپ قالدى، بىرەۋى قايتىس بولدى. قازىر وقىتۋشىلار ايىعىپ جاتىر، وقۋ پروتسەسى تولىق قالپىنا كەلەدى، - دەدى الماس حالەلوۆ ستۋدەنتتەر مەن اقپارات قۇرالدارىنا.
ءدال وسى كۇنى ءبىلىم جانە عىلىم مينيسترلىگىنىڭ ماسەلەنى زەرتتەۋ ءۇشىن جۇمىس توبى قۇرعانى بەلگىلى بولدى.
- قازىر تەكسەرۋدى باستاۋعا ۋنيۆەرسيتەتكە كەلىپ وتىرمىز. بىراق نە باسشىسى، نە باسقا ماماندارى دا جوق. كادر ءبولىمى ولاردىڭ قايدا ەكەنىن بىلمەيمىز دەدى. بۇل جەردە بىتىرگەن ستۋدەنتتەردىڭ اراسىندا ديپلومدارىن الا-الماي قالعاندارى دا بار. مۇنىڭ بارلىعى وتىرىك بولسا، باسشىسى الدىمىزعا شىعىپ، ءتۇسىندىرۋى كەرەك ەدى. ەگەر بۇل كەمشىلىك راستالسا، ۋنيۆەرسيتەتتىڭ ليتسەنزياسىن ۋاقىتشا توقتاتۋىمىز مۇمكىن، – دەدى 7 قىركۇيەكتە مينيسترلىك وكىلى عالىمجان جۇماشەۆ.
بىلتىر تامىز ايىندا ءبىلىم جانە عىلىم مينيسترلىگى وقۋ ورنىنىڭ بىرقاتار تالاپتاردى ورىنداماي وتىرعانىن (ۋنيۆەرسيتەتكە قابىلداۋ، اۋىستىرۋ، ستۋدەنتتەردى وقۋعا قايتا الۋ، ەمتيحان وتكىزۋ ەرەجەلەرىن ت.ب.) العا تارتىپ، ۋنيۆەرسيتەتتىڭ ليتسەنزياسى ۋاقىتشا توقتاعانىن، 1 قىركۇيەككە دەيىن كەمشىلىكتەردى تولتىرۋعا ۋاقىت بەرگەنىن حابارلاعان ەدى.
"استانا" ۋنيۆەرسيتەتىندە شامامەن 3 مىڭنان استام ستۋدەنت وقيدى.
قازاقستاندا پاندەمياعا بايلانىستى جوعارى وقۋ ورىن ستۋدەنتتەرى قاشىقتان وقىپ جاتىر. تەك زەرتحانا، ونەركاسىپتە تاجىريبە جاسايتىن كەيبىر ماماندىقتار مەن باعىتتار بويىنشا وقيتىن ستۋدەنتتەر ءۇشىن ەرەكشەلىكتەر بولۋى مۇمكىن.
