بابالارىمىز ۇرپاعىنىڭ ساناسىنا "جەتىم كورسەڭ جەبەي ءجۇر" دەگەن وسيەتتى قۇيىپ ءوتتى. بار ادامزات وسى دانالىققا جۇگىنسە, جەتىمدەر ءۇيى بولماس پا ەدى؟! بۇگىندە جەتىمىن جىلاتپاي، ءوز باۋىرىنا باسىپ، اتا-انالىق مەيىرىمىن كورسەتىپ جۇرگەن وتباسىلار بار.سولاردىڭ ءبىرى - جەتەسوۆتەر اۋلەتى. ومىرگە ءۇش پەرزەنت اكەلگەن ەرلى-زايىپتى سوڭعى 11 جىلدا 18 بالا اسىراپ العان. كوپبالالى انا امانگۇل ەشپانوۆا «ادىرنا» ءتىلشىسىنە ەستەلىكتەرىمەن ءبولىسىپ، وتباسىنىڭ بۇگىنگى تۇرمىسىن اڭگىمەلەپ بەردى.
ەرتە جاستان جەتىمدىكتىڭ كەرمەك ءدامىن تاتتىق
- اتا-اناسىز ءوسۋدىڭ وڭاي ەمەس ەكەنىن جاقسى بىلەمىز. سەبەبى، جولداسىم ەكەۋمىز ەرتە جاستان جەتىمدىكتىڭ كەرمەك ءدامىن تاتتىق. باسىمىزدان ءبىراز قيىنشىلىقتى وتكەردىك. قينالعان ساتتەرىمدە اللاعا قۇلشىلىق ەتىپ، بالالار ۇيىنە بارىپ تۇراتىنمىن. ولارعا قولىمنان كەلگەنشە مەيىرىم كورسەتۋگە تىرىستىم. ءسۇيتىپ جۇرگەندە بالالارعا قاتتى باۋىر باسىپ قالىپپىن. ۇيگە كەلگەندە سولاردى ويلاپ، اۋىرىپ جۇرەتىنمىن. كەيىن جولداسىما «بالا اسىراپ الايىقشى» دەگەن ۇسىنىس تاستادىم. ول قۋانا كەلىستى. ارتىنان ءۇش بالامىزبەن اقىلداسا وتىرا، بالالار ۇيىنەن بالا اسىراپ الدىق. پەرىشتەلەردىڭ كوزىن جاۋتەندەتپەي، ولاردى ءتۇزۋ جولعا سالۋ - ءاربىرىمىزدىڭ ادامگەرشىلىك پارىزىمىز. قازىرگى تاڭدا باۋىرىمىزعا باسقان 18 بالامىز بار. ءبىزدى ۇنەمى قۋانتىپ جۇرەدى. 21 بالام الدىمنان جۇگىرىپ شىققاندا، ءوزىمدى الەمدەگى ەڭ باقىتتى جان سەزىنەمىن.
18 بالانىڭ التاۋى ورىس ۇلتىنان
- العاش رەت بالالار ۇيىنە بارعانىمىزدا «ءوز ۇلتىمىزدىڭ بالاسىن اسىراپ الىپ، باقىتتى ەتكىمىز كەلەدى»،- دەپ ايتقان ەدىك. كەيىن دانيەل ەسىمدى ورىس بالاعا باۋىر باسىپ قالدىق. بىراق، ول ءوز دوستارىنان اجىراعىسى كەلمەي، جىلاپ تۇردى. بالانى جىلاتقىمىز كەلمەي، ونى دوستارىمەن بىرگە اسىراپ الدىق. قازىر 18 بالامىزدىڭ التاۋى ورىس ۇلتىنان. بارلىعى دا قازاقشا سويلەيدى.
امانگۇل حانىم اڭگىمە بارىسىندا قۋانىشتى جاڭالىعىمەن دە ءبولىستى.
- ەڭ ۇلكەن قىزىمىز ايگۇلدىڭ جاسى - 24-تە. بيىل تۇرمىسقا شىقتى. كەرەمەت كۇيەۋ بالامىز، قۇدا-قۇداعيلارىمىز بار. قازىر ايگۇلىم پەرزەنتحانادا جاتىر. بوپەسىن امان-ەسەن قولىنا الدى.
سونداي-اق، كوپبالالى انا بالا اسىراپ الۋدىڭ ادام ومىرىندەگى كۇردەلى ءارى جاۋاپتى قادام ەكەنىن اتاپ ءوتتى.
- ەڭ الدىمەن، اتا-اناعا سابىر مەن ءتوزىم كەرەك. ادامداردىڭ ءتۇرلى پىكىرىنە دايىن بولىڭىز.
جەتەسوۆتەر اۋلەتى اقتوبە حالقىنا ءدان ريزا.
- شىنى كەرەك، كومەك الۋعا قىسىلامىز. سەبەبى، بالالاردى ءوز قالاۋىمىزبەن اسىراپ الدىق. ولاردى باعىپ-قاعۋ - ءبىزدىڭ موينىمىزدا. دەسە دە، اقتوبەدەگى قايىرىمدى جاندار بىزگە كومەكتەسىپ تۇرادى. جالپى اقتوبە حالقىنا ريزامىن.
اسىپ بارا جاتقان بايلىعىمىز جوق
- ءبىر تيىندى ەكى تيىن قىلىپ، بالالارعا قۋانىشتى كۇندەر سىيلاۋعا تىرىسامىز. قالتالى ازاماتتارىمىز دا جەتىم بالانى باۋىرىنا باسىپ، ساۋاپتى ءىس جاساسا، نۇر ۇستىنە نۇر بولار ەدى.
امانگۇل حانىم - مۋزىكا ءپانىنىڭ مۇعالىمى. بۇگىندە ۇلكەن وتباسى «شاشۋ» وتباسىلىق-حالىقتىق انسامبلىن قۇرىپ، وبلىس كولەمىندە تانىلىپ ۇلگەردى. بالالار دومبىرا، قوبىز، جەتىگەن سىندى اسپاپتاردا ويناي الادى.
- مەن باقىتتى انامىن! قازىرگى تاڭدا 9 بالام مۋزىكالىق كوللەدجدە ءبىلىم الىپ جاتىر. ءوزىمىزدى ونەرلى، ۇلگىلى شاڭىراق رەتىندە كورسەتىپ ءجۇرمىز»،- دەپ كوپبالالى انا اڭگىمەسىن قورىتىندىلادى.
ديانا اسان،
«ادىرنا» ۇلتتىق پورتالى
