Babalarymyz urpaǵynyń sanasyna "Jetim kórseń jebeı júr" degen ósıetti quıyp ótti. Bar adamzat osy danalyqqa júginse, jetimder úıi bolmas pa edi?! Búginde jetimin jylatpaı, óz baýyryna basyp, ata-analyq meıirimin kórsetip júrgen otbasylar bar.Solardyń biri - Jetesovter áýleti. Ómirge úsh perzent ákelgen erli-zaıypty sońǵy 11 jylda 18 bala asyrap alǵan. Kópbalaly ana Amangúl Eshpanova «Adyrna» tilshisine estelikterimen bólisip, otbasynyń búgingi turmysyn áńgimelep berdi.
Erte jastan jetimdiktiń kermek dámin tattyq
- Ata-anasyz ósýdiń ońaı emes ekenin jaqsy bilemiz. Sebebi, joldasym ekeýmiz erte jastan jetimdiktiń kermek dámin tattyq. Basymyzdan biraz qıynshylyqty ótkerdik. Qınalǵan sátterimde Allaǵa qulshylyq etip, balalar úıine baryp turatynmyn. Olarǵa qolymnan kelgenshe meıirim kórsetýge tyrystym. Súıtip júrgende balalarǵa qatty baýyr basyp qalyppyn. Úıge kelgende solardy oılap, aýyryp júretinmin. Keıin joldasyma «bala asyrap alaıyqshy» degen usynys tastadym. Ol qýana kelisti. Artynan úsh balamyzben aqyldasa otyra, balalar úıinen bala asyrap aldyq. Perishtelerdiń kózin jáýtendetpeı, olardy túzý jolǵa salý - árbirimizdiń adamgershilik paryzymyz. Qazirgi tańda baýyrymyzǵa basqan 18 balamyz bar. Bizdi únemi qýantyp júredi. 21 balam aldymnan júgirip shyqqanda, ózimdi álemdegi eń baqytty jan sezinemin.
18 balanyń altaýy orys ultynan
- Alǵash ret balalar úıine barǵanymyzda «Óz ultymyzdyń balasyn asyrap alyp, baqytty etkimiz keledi»,- dep aıtqan edik. Keıin Danıel esimdi orys balaǵa baýyr basyp qaldyq. Biraq, ol óz dostarynan ajyraǵysy kelmeı, jylap turdy. Balany jylatqymyz kelmeı, ony dostarymen birge asyrap aldyq. Qazir 18 balamyzdyń altaýy orys ultynan. Barlyǵy da qazaqsha sóıleıdi.
Amangúl hanym áńgime barysynda qýanyshty jańalyǵymen de bólisti.
- Eń úlken qyzymyz Aıgúldiń jasy - 24-te. Bıyl turmysqa shyqty. Keremet kúıeý balamyz, quda-qudaǵılarymyz bar. Qazir Aıgúlim perzenthanada jatyr. Bópesin aman-esen qolyna aldy.
Sondaı-aq, kópbalaly ana bala asyrap alýdyń adam ómirindegi kúrdeli ári jaýapty qadam ekenin atap ótti.
- Eń aldymen, ata-anaǵa sabyr men tózim kerek. Adamdardyń túrli pikirine daıyn bolyńyz.
Jetesovter áýleti Aqtóbe halqyna dán rıza.
- Shyny kerek, kómek alýǵa qysylamyz. Sebebi, balalardy óz qalaýymyzben asyrap aldyq. Olardy baǵyp-qaǵý - bizdiń moınymyzda. Dese de, Aqtóbedegi qaıyrymdy jandar bizge kómektesip turady. Jalpy Aqtóbe halqyna rızamyn.
Asyp bara jatqan baılyǵymyz joq
- Bir tıyndy eki tıyn qylyp, balalarǵa qýanyshty kúnder syılaýǵa tyrysamyz. Qaltaly azamattarymyz da jetim balany baýyryna basyp, saýapty is jasasa, nur ústine nur bolar edi.
Amangúl hanym - mýzyka pániniń muǵalimi. Búginde úlken otbasy «Shashý» otbasylyq-halyqtyq ansamblyn quryp, oblys kóleminde tanylyp úlgerdi. Balalar dombyra, qobyz, jetigen syndy aspaptarda oınaı alady.
- Men baqytty anamyn! Qazirgi tańda 9 balam mýzykalyq kolledjde bilim alyp jatyr. Ózimizdi ónerli, úlgili shańyraq retinde kórsetip júrmiz»,- dep kópbalaly ana áńgimesin qorytyndylady.
Dıana ASAN,
«Adyrna» ulttyq portaly
