قۇدايىم–اۋ، ايەلدى دە ۇرا ما ەكەن؟ ايەلدى سيپالاۋ كەرەك، اشۋىڭدى قيقالاۋ كەرەك، سابىر ساقتاۋ كەرەك، وتىرىك بولسا دا، «جانىىم!» دەپ ماقتاۋ كەرەك. ۇرۋ–ۇرۋ دەگەن قۇرۋ. قاسقىر سياقتى ۇلۋ.
قاتىننىڭ كۇشى تىلىندە، ەركەكتىڭ كۇشى بىلىمدە. ءسىزدىڭ قارىنداسىڭىزدى اپكەڭىزدى كۇيەۋى كۇندە ساباپ جاتسا، جانىڭىز جايلانىپ، ۇرتىڭىز مايلانىپ، كوز الدىڭىز لايلانىپ، جايباراقات جاتا بەرەسىز بە؟ سوندىقتان، ايەلدى ۇرماڭىز، جاي، بەتىنەن شىمشي سالىڭىز. ايەلدى ۇماڭىز، ءجاي يىعىنان «تىستەي» سالىڭىز. ايەلدى ۇرماڭىز، ءجاي، باسىنان سيپاي سالىڭىز، اشۋىڭىز شاشىلعان توسەكتەي بولسا، رەتىمەن جيناي سالىڭىز.
ال ەندى، ايەلىڭىزدى اي–شايعا قاراماي، ۇرىپ جىعۋ، تەپكىلەي سالۋ ناعىز ناداندىق! ءالسىز جانعا كورسەتكەن زورلىق، زومبىلىق! باياعىنىڭ ەسكى قالدىعى! ءتىسىڭىزدىڭ اراسىندا التى جىل بۇرىن قالىپ كەتكەن ەتتىڭ قالدىعى سياقتى، ەسكىلىكتىڭ ەسەگى! راسىندا، كەيبىر ەركەكتەر جۋان جۇدىرىعىنا ماقتانادى، ايەلى بىردەڭە دەسە، باس سالادى! شىرەنىپ تۇرادى، ونىمەن قويماي، قۋالاپ ءجۇرىپ ۇرادى. بالالارىنىڭ كوزىنشە، «مىقتىمىن» دەيدى، وزىنشە! كەشىرىڭىز، كىم ەدى، ەسىمىڭىز؟ ايەل– دوپ.ۇرعان سايىن سەكىرەەدى. ايەل– كىتاپ. ۇرعان سايىن، پاراقتارى جىرتىلادى. ايەل، ءسىز ءۇشىن تىكەنەك بولعانىمەن، ءبارىبىر گۇل. ۇرعان سايىن، سولىپ قالادى. سول گۇلىڭىزدى و باستا يىسكەدىڭىز عوي؟ يىسكەپ جاتىپ، ۋلانىپ، وتىرىك بولسا دا قۋلانىپ، قۇلاپ قالمادىڭىز با؟
ءاي، قاسقا، قازىر زامان باسقا. ايەلدى بىلىممەن ۇر، كوزىڭمەن قۇلاتىپ سال، قاباعىڭمەن قۋالا، كىرپىكتەرىڭمەن قورقىت، تىستەرىڭدى شىقىرلاتىپ بيلە، قانداي جاعداي بوسا دا، ايەلىڭە تيمە! ءتىپتى، بولماي بارا جاتسا، ەركەك ەكەنسىڭ، اشۋ ۇستىندە قۇشاقتاي سال، جۇيكەڭ جىندى بولسا، پىشاقتاي سال، جىميىپ، كۇل، اۋلاعا شىعىپ كەتىپ، ساربازدارداي «راز، دىبا، راز، دىبا! دەپ ءجۇر. ويباي–اۋ، ايەلىڭىز بالالارىڭىزدىڭ اناسى، كەرەك دەسەڭ، پاناسى، يا، بولادى ەندى الاسى مەن قاراسى... سولاي ەكەن دەپ، ەكىلەنىپ، ەرتەڭىڭدى ويلاماي، ودىراڭداپ، ۇرىپ جىعۋ دەگەن، ءسىزدىڭ ساياساتىڭىزدىڭ سورپاسى سۋىپ قالعان دەگەن ءسوز. ايەلگە دە ساياسات كەرەك. دەموكرات بولىڭىز.دومكرات بولىڭىز. ونى كوككە كوتەرىڭىز. كوتەرىپ جاتىپ، تاستاي سالماڭىز، ونداي جاماندىققا بارماڭىز، «سۇيىكتىم، سەنىڭ سورپاڭنىڭ تۇزى اششىىى ەمەس، ءتاتتى، سەنىڭ پىسىرگەن ەتىڭ قاتتىىى ەمەس، مەنىڭ بالتىرىم سياقتى جۇمسااق!» دەپ ماقتاپ وتىر، ءسويتىپ، بەرەكە بىرلىكتى ساقتاپ وتىر.
"دىحالكاسىنان ءبىر ۇرسام، ۇيىقتاپ قالادى!"دەپ ماقتانا بەرمەڭىز!
مۇحتار شەرىمنىڭ قىشقىل ساتيراسى،
«ادىرنا» ۇلتتىق پورتالى
