Qudaıym–aý, áıeldi de ura ma eken? Áıeldi sıpalaý kerek, ashýyńdy qıqalaý kerek, sabyr saqtaý kerek, ótirik bolsa da, «Janyym!» dep maqtaý kerek. Urý–urý degen qurý. Qasqyr sııaqty ulý.
Qatynnyń kúshi tilinde, erkektiń kúshi bilimde. Sizdiń qaryndasyńyzdy ápkeńizdi kúıeýi kúnde sabap jatsa, janyńyz jaılanyp, urtyńyz maılanyp, kóz aldyńyz laılanyp, jaıbaraqat jata beresiz be? Sondyqtan, áıeldi urmańyz, jáı, betinen shymshı salyńyz. Áıeldi umańyz, jáı ıyǵynan «tisteı» salyńyz. Áıeldi urmańyz, jáı, basynan sıpaı salyńyz, ashýyńyz shashylǵan tósekteı bolsa, retimen jınaı salyńyz.
Al endi, áıelińizdi áı–shaıǵa qaramaı, uryp jyǵý, tepkileı salý naǵyz nadandyq! Álsiz janǵa kórsetken zorlyq, zombylyq! Baıaǵynyń eski qaldyǵy! Tisińizdiń arasynda alty jyl buryn qalyp ketken ettiń qaldyǵy sııaqty, eskiliktiń esegi! Rasynda, keıbir erkekter jýan judyryǵyna maqtanady, áıeli birdeńe dese, bas salady! Shirenip turady, onymen qoımaı, qýalap júrip urady. Balalarynyń kózinshe, «myqtymyn» deıdi, ózinshe! Keshirińiz, kim edi, esimińiz? Áıel– dop.Urǵan saıyn sekireedi. Áıel– kitap. Urǵan saıyn, paraqtary jyrtylady. Áıel, siz úshin tikenek bolǵanymen, báribir gúl. Urǵan saıyn, solyp qalady. Sol gúlińizdi o basta ıiskedińiz ǵoı? Iiskep jatyp, ýlanyp, ótirik bolsa da qýlanyp, qulap qalmadyńyz ba?
Áı, qasqa, qazir zaman basqa. Áıeldi bilimmen ur, kózińmen qulatyp sal, qabaǵyńmen qýala, kirpikterińmen qorqyt, tisterińdi shyqyrlatyp bıle, qandaı jaǵdaı bosa da, áıelińe tıme! Tipti, bolmaı bara jatsa, erkek ekensiń, ashý ústinde qushaqtaı sal, júıkeń jyndy bolsa, pyshaqtaı sal, jymıyp, kúl, aýlaǵa shyǵyp ketip, sarbazdardaı «raz, dyba, raz, dyba! dep júr. Oıbaı–aý, áıelińiz balalaryńyzdyń anasy, kerek deseń, panasy, ııa, bolady endi alasy men qarasy... Solaı eken dep, ekilenip, erteńińdi oılamaı, odyrańdap, uryp jyǵý degen, sizdiń saıasatyńyzdyń sorpasy sýyp qalǵan degen sóz. Áıelge de saıasat kerek. Demokrat bolyńyz.Domkrat bolyńyz. Ony kókke kóterińiz. Kóterip jatyp, tastaı salmańyz, ondaı jamandyqqa barmańyz, «Súıiktim, seniń sorpańnyń tuzy ayyy emes, tátti, seniń pisirgen etiń qattyyy emes, meniń baltyrym sııaqty jumsaaq!» dep maqtap otyr, sóıtip, bereke birlikti saqtap otyr.
"Dyhalkasynan bir ursam, uıyqtap qalady!"dep maqtana bermeńiz!
Muhtar Sherimniń qyshqyl satırasy,
«Adyrna» ulttyq portaly
