1 قىركۇيەك دەگەندە بىردەن سۋ جاڭا مەكتەپ فورماسىن كيىپ، قۇشاعىنا قۇشاق-قۇشاق گۇل قىسىپ، العاشقى قوڭىراۋ سىڭعىرىن ەستۋگە قوبالجىپ مەكتەپكە اسىققان وقۋشىلار ەلەستەيدى. بيىلعى وقۋ جىلى ونلاين فورماتقا كوشكەندىكتەن مۇنىڭ ءبىرى دە بولمادى. جاڭا وقۋ جىلىنىڭ باستالعانىن وقۋشىلار ءالى دە سەزىنە الماي جاتقانى راس. ەندى ءبىرى ءداستۇرلى وقۋ فورماتىنا كوشكىسى كەلىپ، جىلاپ جاتسا، كەيبىرى، ساباقتىڭ دۇرىس وتپەيتىنىنە قۋانىپ، ونلاين وقۋ ولارعا مايداي جاعىپ جاتىر.
40 مينۋتىڭ ءوزى ساباق ءتۇسىندىرىپ، ءۇي جۇمىسىن تەكسەرۋگە جەتپەي جاتقاندا، ونلاين وقۋ كەزىندە ساباقتاردىڭ 30 مينۋتقا قىسقارعانى وقۋشىلار مەن مۇعالىمدەردى، قوسا العاندا اتا-انالاردى دا ابىگەرگە سالدى. ينتەرنەتتىڭ جىلدامدىعىنىڭ ناشارلىعى، ونلاين وقۋ ءۇشىن ارنالعان پلاتفورمالار مەن جەلىلەر قىزمەتىنىڭ ءالى دە دۇرىس جەتىلمەگەندىگى، تەحنولوگيادان اسا ساۋاتتىڭ جوقتىعى ساباقتىڭ جارتى ۋاقىتىن الادى. وقۋشىلار قاي ۋاقىتتا ءبىلىم الىپ ۇلگەرەدى؟
پرەزيدەنت جولداۋىندا:
«ساپالى ءبىلىم الۋ ءۇشىن ادەتتەگىدەي ساباققا قاتىسىپ، مۇعالىمدەرمەن جانە سىنىپتاستارىمەن ارالاسۋدىڭ ورنى بولەك. سوندىقتان سانيترالىق تالاپتاردى ساقتاي وتىرىپ، ءبىلىم الۋدىڭ قالىپتاسقان ءداستۇرلى تاسىلىنە قايتا كوشۋدىڭ ءتارتىبىن ازىرلەگەن ءجون. بۇل اسىرەسە مەكتەپتەر ءۇشىن ماڭىزدى.»
ستۋدەنتتەردىڭ جاعدايى نە بولماق؟
ورتا مەكتەپتى ءبىتىرىپ، ۇلكەن ومىرگە اياق باسقان ستۋدەنتتەر ءتورت قابىرعاعا قامالىپ، ۇيالى تەلەفونعا تەلمىرىپ تىزگىنىن ۇستار بولاشاق ماماندىعىنا ونلاين وتىرىپ دايىندالا ما؟ بولاشاق جاستاردىڭ قولىندا. مامان يەسى بولىپ، ءوز ءىسىن سۇيۋگە ستۋدەنتتەردى ونلاين ءدارىس وقىپ ەمەس، اۋديتوريادا بەتپە-بەت بىلىكتى مۇعالىمدەر مەن پروفەسسورلار دايىنداۋ كەرەك.
وقۋشىلاردى مەكتەپ كىتاپحاناسىنداعى كىتاپپەن قامتىدى. ستۋدەنتتەر ءبىلىم كوزىن، ياعني، كەرەكتى كىتاپتاردى الۋ ءۇشىن اۋىلىنان ءبىلىم الاتىن وقۋ ورداسىنا كەلىپ كىتاپتارىن الىپ كەتە المايتىندىعى انىق. مۇنداي جاعدايدا ستۋدەنتتەر كىتاپسىز، ينتەرنەتتەگى وتىرىك-شىنىن بىلمەيتىن دەرەكتەرمەن سۋسىندايدى ما؟
پرەزيدەنت جولداۋدا اتاپ وتكەندەي، بيلىكتەگىلەر ءداستۇرلى وقۋ فورماتىنا اۋىسىۋدىڭ ءتارتىبىن ازىرلەپ، الداعى ۋاقىتتا ستۋدەنتتەر مەن وقۋشىلار ساپالى ءبىلىمدى ءتيىستى ورنى پارتادا وتىرىپ الادى دەگەن سەنىمدەمىز. ونلاين وقۋدان مەزى بولعان ستۋدەنتتەر مەن وقۋشىلارعا شىدامدىلىق تىلەيمىز!
لاۋرا تۇرسىنجان،
"ادىرنا" ۇلتتىق پورتالى
