شىمكەنتتە جاڭا وقۋ جىلى 172 ءبىلىم بەرۋ مەكەمەسىمەن 222 مىڭعا جۋىق وقۋشىمەن باستالدى.
ءبىرىنشى توقسان جالپى قاشىقتىقتان وقىتۋ فورماتىندا جۇرگىزىلەدى. 14 940 باستاۋىش سىنىپ وقۋشىلارى ءۇشىن اتا- انالارىنىڭ ءوتىنىشى نەگىزىندە قاتاڭ سانيتارلىق تالاپتاردى ساقتاي وتىرىپ، 996 كەزەكشى سىنىپتار اشىلادى.
شىمكەنت قالاسىنىڭ اكىمى مۇرات ايتەنوۆ بارشا ءبىلىم سالاسىنىڭ قىزمەتكەرلەرىن جاڭا وقۋ جىلىمەن قۇتتىقتادى.
– ىندەتكە بايلانىستى ەلىمىزدە العاش رەت وقۋشىلارىمىز جاڭا وقۋ جىلىن قاشىقتان وقۋمەن باستاۋدا. الايدا قالا مەكتەپتەرى وقۋ جىلىنا دايىن. ونلاين ءبىلىم الۋ ءۇشىن تولىعىمەن ينتەرنەت جۇيەسىنە قوسىلعان. 17 مىڭنان استام قالا ۇستازدارى IT بويىنشا بىلىمدەرىن ارتتىردى.
بۇگىنگى كۇنى كومپيۋتەرلەر سانى 20 201-ءدى قۇراپ وتىر. بيىل 10 975 دانا كومپيۋتەر ساتىپ الىندى. ودان بولەك، قر ۇكىمەت قورى جانە جەرگىلىكتى بيۋدجەت ەسەبىنەن 36 355 كومپيۋتەرلىك قۇرىلعىلار الۋ جۇمىستارى باستالدى. كەلگەن قۇرىلعىلار قاجەتتىلىگى بار وقۋشىلارعا ۋاقىتشا پايدالانۋعا بەرىلەتىن بولادى. ناتيجەسىندە، جىل باسىنداعى 1 كومپيۋتەرگە 24 وقۋشىدان كەلەتىن كورسەتكىش 4-كە تومەندەيدى.
جالپى قالانىڭ دەموگرافيالىق وسىمىنە بايلانىستى جىل سايىن مەكتەپ وقۋشىلارىنىڭ سانى 12 مىڭنان استام بالاعا ارتۋدا. اتالعان ماسەلەلەردى شەشۋ ماقساتىندا شىمكەنت قالاسىنىڭ ورتا ءبىلىم بەرۋ سالاسىندا جان باسىنا قارجىلاندىرۋ جۇيەسىن ەندىرۋ ارقىلى جەكەمەنشىك مەكتەپتەر جەلىسىن ارتتىرۋ جۇمىستارى اتقارىلۋدا.
بيىل وقۋشىلار ءبىلىم كۇنىن ۇلى اقىننىڭ «عىلىم تاپپاي ماقتانبا» ولەڭىمەن باستادى. ويتكەنى بيىل ەلىمىزدە اباي قۇنانبايۇلىنىڭ 175 جىلدىعى مەرەكەسى اتالىپ وتىلۋدە. بۇل ورايدا تاعى ءبىر قۋانىشتى جاڭالىق، بيىل قالامىزدا اباي قۇنانبايۇلى اتىنداعى دارىندى بالالارعا ارنالعان مەكتەپ-گيمنازيا اشىلدى.
سونداي-اق، شىمكەنتتە تسيفرلاندىرۋ بويىنشا بىرقاتار جوبالار جۇزەگە اسىرىلۋدا. قالادا جاڭا وقۋ جىلىنان باستاپ «تسيفرلى قازاقستان» باعدارلاماسى اياسىندا «دارىندى بالالارعا ارنالعان مامانداندىرىلعان IT ليتسەي-ينتەرناتى» ەسىگىن ايقارا اشتى. 5 «IT مەكتەپ-ليتسەيى» قايتا قۇرۋ ارقىلى جاڭا باعىتتا جۇمىس ىستەيدى. وسىعان بايلانىستى 12 STEM لابوراتوريالارىن اشۋ دا جوسپارلانۋدا.
ودان بولەك، بيىلعى جاڭا وقۋ جىلىندا «وقۋشىلار سارايى» بازاسىندا زاماناۋي جابدىقتارمەن قامتاماسىز ەتىلگەن «IT-ورتالىعى» قوسىمشا ءبىلىم بەرەدى.
بيىل ەلىمىزدە ءابۋ ناسىر ءال-فارابيدىڭ 1150 جىلدىعى، اباي قۇنانبايۇلىنىڭ 175 جىلدىعى جانە ءشامشى قالداياقوۆتىڭ 90 جىلدىعى اتالىپ وتىلۋدە. ۇلى تۇلعالاردىڭ ۇرپاق تاربيەسىندە بەرەر تاعىلىمى مول.
وقۋشىلار، ۇستازدار جانە اتا-انالارعا تابىستى جىل تىلەيمىن! العان بىلىمدەرىڭىز جەمىستى بولسىن!، – دەدى قالا اكىمى.
شىمكەنت قالاسىنىڭ اقپاراتتىق-كوممۋنيكايالىق ورتالىعى
