42500 تەڭگەنى الۋعا قۇقىعى جوق دەپ تانىلعان تۇرعىنداردىڭ ءوتىنىشى 1 جەلتوقسانعا دەيىن قايتا قارالادى. بۇل تۋرالى "ادىرنا" ءتىلشىسى ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي سايتىنا سىلتەمە جاساپ حابارلايدى.
"1 قىركۇيەك ساعات 09.00-دەگى جاعداي بويىنشا اعىمداعى جىلعى شىلدەدە شەكتەۋ شارالارىن ەنگىزۋگە بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) بىرجولعى تولەم تاعايىنداۋعا ازاماتتاردان 2 ملن 607 مىڭنان استام بىرەگەي ءوتىنىش قابىلداندى، تولەم مولشەرى ەڭ تومەنگى جالاقىعا – 42 500 تەڭگەگە تەڭ. تولەمدى 2 ملن 391,4 مىڭ قازاقستاندىق الدى، ونىڭ ىشىندە 2 ملن 384,9 مىڭ ادام تامىز ايىندا كارانتيننىڭ ۇزارتىلۋىنا بايلانىستى 0,5 ەتج – 21 250 مىڭ تەڭگە مولشەرىندە قوسىمشا اقى الدى. وسى باعىتتاعى جۇمىس جالعاسۋدا.
ماسق-تان تولەم الۋعا وتىنىمدەر بىرنەشە ارنالار ارقىلى قابىلدانادى. 2 ملن 607 مىڭنان استام ءوتىنىمنىڭ ىشىندە:
– 834,5 مىڭ ادام پرواكتيۆتى فورماتتا تولەم تاعايىنداۋعا كەلىسىم بەرگەن;
– 689,3 مىڭ ادام Egov.kz پورتالى جانە telegram-بوتتار ارقىلى;
– 415,3 مىڭ ادام 42500.enbek.kz پورتالى ارقىلى;
– 667,4 مىڭ ادام ەكىنشى دەڭگەيدەگى بانكتەردىڭ موبيلدىك قوسىمشالارى مەن ينتەرنەت-رەسۋرستارى ارقىلى;
– 0,7 مىڭ ادام شتابتار ارقىلى ءوتىنىش بەرگەن.
ازاماتتاردىڭ ساناتتارى بولىنىسىندە:
– 834,5 مىڭ ءوتىنىش بىرىڭعاي جيىنتىق تولەم تولەۋشىلەردەن كەلگەن (پرواكتيۆتى فورماتتا);
– 272,6 مىڭ ءوتىنىشتى جالدامالى قىزمەتكەرلەرى ءۇشىن جۇمىس بەرۋشىلەر بەرگەن;
– 1 ملن 500,2 مىڭ ءوتىنىش ازاماتتاردىڭ باسقا ساناتتارىنان كەلىپ ءتۇستى (جەكە كاسىپكەرلەر، جەكە پراكتيكامەن اينالىساتىن ادامدار، ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالار).
تولەم 2 ملن 393,6 مىڭ ادامعا تاعايىندالدى. اقشالاي قاراجات 2 ملن 391,4 مىڭ قازاقستاندىققا اۋدارىلدى.
بۇعان دەيىن حابارلانعانداي، ماسق-دان بىرجولعى تولەم الۋعا وتىنىشتەر 2020 جىلدىڭ 1 قىركۇيەگىنە دەيىن قابىلداندى.
بۇدان بۇرىن باس تارتۋ تۋرالى شەشىم قابىلدانعان «42 500 تەڭگە» الەۋمەتتىك تولەمىن تاعايىنداۋ وتىنىشتەرىن قايتا قاراۋ ءۇشىن، اۋداندىق (قالالىق) شتابقا راستايتىن قۇجاتتارمەن بىرگە ءتيىستى ءوتىنىش بەرۋ كەرەك.
ءوتىنىش بەرىلەدى:
جۇمىس بەرۋشى تاراپىنان – شوب، ءىرى كاسىپكەرلىك (كارانتين ەنگىزىلگەن وڭىرلەردە), كوممەرتسيالىق ەمەس زاڭدى تۇلعالار ءۇشىن. بۇل رەتتە ءوتىنىش تەك الەۋمەتتىك تولەم تاعايىنداۋدان باس تارتۋ (ونى توقتاتۋ) تۋرالى شەشىم قابىلدانعان قىزمەتكەرلەر ءۇشىن بەرىلەدى.
ءوز بەتىنشە – وزدەرىنە قاتىستى الەۋمەتتىك تولەمدى تاعايىنداۋدان باس تارتۋ (ونى توقتاتۋ) تۋرالى شەشىم قابىلدانعان جەكە كاسىپكەرلەر، جەكە پراكتيكامەن اينالىساتىن ادامدار، بجت تولەۋشىلەر، ازاماتتىق-قۇقىقتىق سيپاتتاعى شارتتار بويىنشا جۇمىس ىستەيتىن ادامدار.
قايتا قاراۋعا وتىنىشتەر 2020 جىلدىڭ 1 جەلتوقسانىنا دەيىن قابىلدانادى،" - دەلىنگەن حابارلامادا.
"ادىرنا" ۇلتتىق پورتالى
