قازاق راديولارى سەرىكتەستىگىنە قاراستى راديوارنالار تىڭدارمانداردى جاڭا ماۋسىمدا تىڭ جوبالارمەن قۋانتپاق. قىركۇيەكتەن باستاپ "قازاق" راديوسى، "استانا" راديوسى، "شالقار" راديوسى جانە "كلاسسيك" راديوسى اۋە تولقىنىنان 30-عا جۋىق جاڭا راديوحابار شىعادى. بۇل تۋرالى "ادفرنا" ءتىلشىسى «قازاق راديولارى» جشس-نا سىلتەمە جاساپ حابارلايدى.
جاڭا ماۋسىمدا قازاق راديوسى اقپاراتتىق-تانىمدىق باعىتقا، شالقار راديوسى ۇلتتىق كونتەنتكە باسىمدىق بەرەدى. بۇل بىلتىر باستالعان جۇمىستىڭ جالعاسى جانە كۇزگى ماۋسىمدا اشىلاتىن جاڭا حابارلار وسى فورماتقا لايىقتالىپ اشىلعان. قازاق راديوسىنان تىڭدارماندارعا ءتۇرلى سالا بويىنشا كەڭەس بەرەتىن، «قوعام ۇنىنە قۇلاق اساتىن ۇكىمەت» تۇجىرىمداماسىن جۇزەگە اسىرۋعا باعىتتالعان ينتەراكتيۆتى حابارلار اشىلادى. ماسەلەن، «اقشا ماسەلەسى» حابارىندا - مەملەكەتتىك تۇرعىن-ءۇي باعدارلامالارىنىڭ تەتىكتەرى مەن اقشانى بانك دەپوزيتتەرىندە دۇرىس ساقتاۋ، بالانىڭ ءبىلىم الۋىنا وسى باستان قارجى جيناۋ، قارجى پيرامميدالارىنا الدانۋدان اباي بولۋ جولدارى تىڭدارمانعا جان-جاقتى تۇسىندىرىلەدى. ال «جان الەمى» جاڭا حابارىندا كوروناۆيرۋس پاندەمياسىنا بايلانىستى نەمەسە تۇرمىستىق پروبلەمالارمەن پسيحوەموتسيونالدى كۇيزەلىسكە تۇسكەن تىڭدارمانمەن پسيحولوگ مامان تىلدەسەدى. بۇدان بولەك تىڭدارماندارعا زاڭگەر مەن دارىگەر كەڭەسى، اۋىلداعى كاسىبىن كەڭەيتەمىن دەگەن شارۋالارعا اگرارلىق سالاداعى مەملەكەتتىك قولداۋ ءتارتىبىن تۇسىندىرەتىن ينتەراكتيۆتى راديوحابارلار ەفيرگە شىعادى. التىن قوردان ايتىس، اۋەزدى اۋەن، جەدەل جاڭالىق، ساياسي سۇحبات جانە جىلدار بويى حالىق جادىندا قالعان حابارلار دا جالعاسىن تابادى.
ال شالقار راديوارناسىنان قىركۇيەك ايىندا ۇلتتىق رۋحانيات باعىتىنداعى جاڭا 12 جوبا اۋە تولقىنىنا شىعادى. ونىڭ ىشىندە اباي قۇنانبايۇىلىنىڭ 175 جىلدىعىنا ارنالعان «اباي ۇلاعاتى»، ءال-ءفارابيدىڭ 1150 جىلدىق مەرەيتويى قارساڭىندا تراكتاتتارى نەگىزىندە ازىرلەنگەن اۋديوروليكتەر، تەاتر ونەرى جايلى «ساحنا»، مۋزەيلەر مەن قولونەر تۋرالى «جادىگەر»، حالىق مۋزىكاسىنا ارنالعان «ءان شاشۋ» راديوحابارلارى بار.
جاڭا ماۋسىمنىڭ تاعى ءبىر جاڭالىعى قازاق راديوسى مەن «شالقار» راديوسى ەفيرگە جاڭا اۋديوبەزەندىرۋمەن شىعادى. ءار راديوارنانىڭ تەك وزىنە تانە ەرەكشەلىگى بولىپ سانالاتىن ەفيردەگى دجينگلدار مەن ساعات باسىندا سوعاتىن اۋديوروليكتەر ءتول تۋىندى رەتىندە قايتا جاسالعان.
مىسالى، قازاق راديوسىنىڭ ەفيرى بەلگىلى كومپوزيتور، «بالالىق شاعىمنىڭ اسپانى»، «اباي»، «مۇستافا شوقاي»، «ابىلقايىر»، «الدار كوسە»، «شال» سەكىلدى ۇزدىك كينوفيلمدەرى ساۋندترەگىنىڭ اۆتورى، فيلوسوفيا-پسيحولوگيالىق باعىتتا ەرەكشە مەلوديالىق ءستيلى بار قۋات شىلدەباەۆتىڭ تۋىندىلارىمەن بەزەندىرىلدى.
ال شالقار راديوسىنىڭ ەفيرىن بەلگىلى سازگەر حالىق ريزابەك جەتىگەن، سىرناي، قوبىز سەكىلدى ۇلتتىق اسپاپتار ارقىلى جازىپ الىنعان ەكسكليۋزيۆتى اۋديوروليكتەرمەن اسەمدەدى.
استانا جانە كلاسسيك راديوارنالارى دا كۇزگى ماۋسىدا ءوز تىڭدارماندارىنا ەلوردا ومىرىنە قاتىستى جاڭا جوبالار مەن اكادەميالىق مۋزىكاعا قاتىستى، ابايدىڭ ءان مۇراسىنا قاتىستى راديوحابارلاردى اۋە تولقىنىنا شىعارادى.
جاڭا ماۋسىم قارساڭىندا ستۋدياداعى ميكروفوندار مەن ديكتوفوندار دا العاش رەت راديو ستيلىندە بەزەندىرىلدى. سونداي-اق قازاق راديوسىنىڭ الماتى ستۋدياسى بەينەكامەرالارمەن جابدىقتالادى. بۇل ستۋديادان تىكەلەي ەفيردە شىعاتىن حابارلاردى راديونىڭ الەۋمەتتىك جەلىدەگى پاراقشالارىنان كورسەتۋگە مۇمكىندىك بەرەدى.
"ادىرنا" ۇلتتىق پورتالى
