ۇبت كەزىندە كەزەكشى مۇعالىم تالاپكەرگە تەست سۇراقتارىن فوتوعا تۇسىرۋگە كومەكتەسكەن. بۇل تۋرالى "ادىرنا" ءتىلشىسى ديدار سماعۇلوۆتىڭ Facebook پاراقشاسىنا سىلتەمە جاساپ حابارلايدى.
وكىنىشكە وراي، ءتارتىپتى قامتاماسىز ەتەتىن كەزەكشىنىڭ ءوزى قىلمىستىق ارەكەتكە بايلانىسى بار ەكەنى تۋرالى فاكتىلەر انىقتالدى.
قاراڭىزدارشى، قانداي "باتىرلىقپەن" سۇراق كىتاپشاسىن فوتوعا ءتۇسىرىپ وتىرعان بالانى دەنەسىمەن جاۋىپ تۇرعانىن.
كەم دەگەندە ونىڭ ءبىلىم بەرۋ سالاسىنان جۇمىستان بوساتىلۋىن، ال ودان بەتەر شارا رەتىندە قاتال جاۋاپكەرشىلىككە تارتىلۋىن تالاپ ەتەتىن بولامىز، - دەيدى ديدار سماعۇلوۆ
ۇبت بەينەجازبالارىنىڭ قورىتىندىسى بويىنشا 158 تەست تاپسىرۋشىنىڭ ناتيجەسى جويىلعان. ولاردىڭ 97-ءسى گرانت يەگەرى اتانعان. ناتيجەسى جويىلعانداردىڭ ىشىندە 138 بالل العان تۇلەك تە بار ەكەن.
وسى ىسكە بايلانىستى، ءادىل تاپسىرعان، بىراق گرانتقا وتپەگەن 97 بالا 2 اپتا ىشىندە گرانت يەگەرى اتانادى.
گرانتقا يەلىك ەتكەن تۇلەكتەر الداعى ۋاقىتتا حابارلانادى.
ەستەرىڭىزگە سالا كەتەيىك، ءبىلىم جانە عىلىم مينيسترلىگىنىڭ ماماندارى بۇعان دەيىن بەينە باقىلاۋ كامەرالارىنىڭ تەكسەرىلەتىنىن حابارلاعان.
"ادىرنا" ۇلتتىق پورتالى
