قىتاي 15–17 قىركۇيەك ارالىعىندا نەبارى 45 ساعات ىشىندە ءتورت ءساتتى وربيتالىق ۇشىرىلىمدى جۇزەگە اسىردى. ءۇش ءتۇرلى عارىش ايلاعىنان ءتورت زىمىران كوككە كوتەرىلگەن، دەپ حابارلايدى «ادىرنا» ءتىلشىسى ixbt.com-عا سىلتەمە جاساپ.
باق مالىمەتىنشە، زىمىرانداردىڭ ەكەۋى جەكە كومپانيالارعا تيەسىلى. ناتيجەسىندە وربيتاعا جالپى سانى 30 جەرسەرىك شىعارىلعان.
العاش بولىپ LandSpace كومپانياسىنىڭ مەتان وتىنىمەن جۇمىس ىستەيتىن Zhuque-2Eزىمىرانى ۇشىرىلعان. ول تسزيۋتسيۋان عارىش ايلاعىنان كوتەرىلىپ، تومەن جەر وربيتاسىنا Qianfan كەڭجولاقتى سپۋتنيكتىك جۇيەسىنىڭ ون جەرسەرىگىن جەتكىزگەن. بولاشاقتا بۇل توپتامانى شامامەن 15 مىڭ جۇمىس ىستەيتىن اپپاراتقا دەيىن ۇلعايتۋ جوسپارلانىپ وتىر. Zhuque-2E سۇيىق مەتان مەن سۇيىق وتتەگىنى پايدالانادى.
سول كۇنى جەكە Orienspace كومپانياسىنىڭ Gravity-1 زىمىرانى عارىشقا تاعى توعىز Qianfan جەرسەرىگىن ۇشىرعان. Gravity-1 قازىرگى ۋاقىتتا الەمدەگى ەڭ قۋاتتى قاتتى وتىندى زىمىرانداردىڭ ءبىرى سانالادى.
كەلەسى كەزەكتە مەملەكەتتىك Long March-12 زىمىرانى حاينان ارالىنداعى ۆەنچان عارىش ايلاعىنان ۇشىرىلعان. ول وربيتاعا قىتايدىڭ تاعى ءبىر كەڭجولاقتى بايلانىس جۇيەسى – SatNetجوباسىنا ارنالعان توعىز جەرسەرىكتى شىعارعان. بولاشاقتا بۇل جۇيە تومەن جەر وربيتاسىنداعى شامامەن 13 مىڭ اپپاراتتان تۇرادى دەپ جوسپارلانعان.
ۇشىرىلىمدار سەرياسىن Long March-12 زىمىرانىنان شامامەن ەكى ساعات وتكەن سوڭ Kuaizhou-11اياقتادى. ول تسزيۋتسيۋان عارىش ايلاعىنان ۇشىرىلىپ، Spacety كومپانياسىنىڭ جەردى قاشىقتان زوندتاۋعا ارنالعان ەكى راديولوكاتسيالىق جەرسەرىگىن وربيتاعا جەتكىزگەن.
ءتورت وپەراتوردىڭ ەشقايسىسى زىمىراننىڭ ءبىرىنشى ساتىسىن قايتارۋعا ارەكەت جاساعان جوق. سوعان قاراماستان قىتاي قايتا پايدالانىلاتىن زىمىران تەحنولوگيالارىن بەلسەندى تۇردە دامىتىپ كەلەدى. سوڭعى ەكى جارىم اي ىشىندە جەكە LandSpace كومپانياسى وربيتالىق ۇشىرىلىمنان كەيىن Zhuque-3 زىمىرانىنىڭ ءبىرىنشى ساتىسىن ءساتتى قوندىرسا، مەملەكەتتىك CASC كورپوراتسياسى Long March-10B زىمىرانىمەن وسىنداي ناتيجەگە قول جەتكىزگەن.
