بالانى مەكتەپكە جىبەرسەك، نە بولادى؟ ۇيدە وقىتساق، نە بولادى؟

3326
Adyrna.kz Telegram

قىركۇيەك ايى جاقىنداعان سايىن اتا-انادان دا، ۇستازداردان دا مازا كەتە باستاعانداي. بيىلعى جاڭا وقۋ جىلى قالاي بولماق؟ ۇيدە وتىرىپ ءبىلىم الا ما وقۋشىلار، الدە مەكتەپكە بارىپ ساباعىن وقي ما؟ ۇيدە وتىرسا، ونى كىم وقىتادى، قالاي وقىتادى؟ مەكتەپكە بارسا، قاۋىپتى ۆيرۋس قىناداي قىرماي ما؟ وسىنداي سۇراقتار وقۋشىسى بار اركىمدى دە مازالاۋدا. وسىعان وراي ءبىر ماسەلەگە قاتىستى بىرنەشە پىكىردى قاتار بەرۋدى ءجون سانادىق.

ءنازيا جويامەرگەن, جۋرناليست: «مەن بالالارىمدى مەكتەپكە جىبەرمەيمىن! ىندەت ءالى باسىلعان جوق. ادامدار ءالى ءولىپ جاتىر. «مۇعالىمدەر وقىتسىن، ۇيدە وقىتپايمىز» دەپ جۇرگەندەر - قانداي اتا-انا؟ نەرۆىسى جەتپەيدى ەكەن دەپ، باسقالار بالالارىنىڭ باسىن قاتەرگە تىگۋى كەرەك پە؟ كەشە ءبىر ايەل: «بالام 1-سىنىپقا بارادى، مۇعالىم ۇيرەتكەنى دۇرىس قوي»، - دەپتى. سوندا ءارىپ تانىتۋ، قوسۋ-الۋدى ۇيرەتۋگە جەتپەيتىن ناعىلعان جۇيكە ول؟ بالالار ديستانتسيا ساقتامايدى، قول جۋمايدى، انتيسەپتيكتى پايدالانبايدى، گيگيەنانى دا ساقتامايدى. ويتكەنى ولار - بالا. ولاردى كوز الدىڭدا ۇستاعان قاۋىپسىز عوي. مەكتەپتەن جۇقتىرىپ كەلىپ، ۇيدەگى ۇلكەندەردى اۋىرتۋى مۇمكىن. كوروناۆيرۋستىڭ سىرىن ءالى ەشكىم بىلمەيدى. ءبىر رەت اۋىرعان ادام بىرنەشە رەت اۋىرۋى مۇمكىن دەپ جاتىر. كۇنى كەشە عانا Facebook بەتى كوڭىل ايتۋعا تولىپ كەتتى. ءولىم-ءجىتىم كوبەيدى. نەگە؟ ويتكەنى ىندەت - وتە قاۋىپتى. ساقتانۋ كەرەك. قر ءبىلىم مينيسترلىگىنىڭ مەكتەپتەر مەن جوو-لاردا جىل سوڭىنا دەيىن قاشىقتان وقىتۋعا قاتىستى شەشىمىن قولدايمىن. مينيسترلىك بالالاردىڭ عانا ەمەس، اتا-انالار مەن مۇعالىمدەردىڭ تاعدىرىنا الاڭداعاندىقتان وسىنداي قادامعا بارىپ وتىر. ەگەر اۋىلداردا ينتەرنەت جوق بولسا، وعان ءبىلىم مينيسترلىگى كىنالى ەمەس!

نۇرداۋلەت ءنۇرادىل: «قۇرمەتتى مينيستر مىرزا، قوعامنىڭ بەلسەندى مۇشەلەرى!

1-سىنىپتى «ونلاين وقىتۋ» دەگەن بارىپ تۇرعان ابسۋرد! اتا-انا بولىپ بالام ءبىرىنشى سىنىپ تابالدىرىعىن اتتايدى دەپ قۋانىپ ءجۇر ەدىم. سويتسەم، سىنىپتا 40 بالادان وقيدى ەكەن، وعان دا كوندىم. ەندى «ونلاين وقۋ» دەگەنىنە مۇلدەم كەلىسە المايمىن!

ءارىپتى تاياق دەپ تانىمايتىن بالاعا ونلاين نە ۇيرەتۋگە بولادى؟ سىنىپتا وتىرىپ مۇعالىم ءتالىمىن الماسا بالانىڭ ءتۇپ تامىرىنا، ءبىلىم قازىعىنا بالتا شابۋ ەمەي، نەمەنە؟!

بىزدەگى الەۋمەتتىك جاعداي ءار ءتۇرلى ەكەنىن ەسكەرۋ كەرەكپىز. ەگەر بۇلاي جاسايتىن بولساق، ۇيىندە 3-4 بالاسى بار ادامدار مەن جۇمىس ىستەيتىن اتا- انانىڭ بالالارى مۇلدەم ساۋاتسىز بولىپ شىعادى. قانشا جەردەن ءتارتىپ جارعىسىن جازىپ اۋرە بولعاندارىڭىزبەن بىرەۋدىڭ ۇيىنە ونى ورناتا دا، تولىق ورىنداتا دا المايسىزدار.

ەگەر ونلاين قالدىرساڭىزدار، ءبىز اتا-انالار بالالارىمىزدى جاسىرىن توپتارعا، اقىلى مەكتەپتەرگە بەرۋگە ءماجبۇر بولامىز. سىزدەر وعان ەش قارسىلىق كورسەتە المايسىزدار. ونداي كەزدە كارانتين جايىندا قالارى انىق.

مەن بارلىق كارانتين شارالارىن تولىق ءارى قاتاڭ ساقتاي وتىرىپ ءبرىنشى سىنىپتاردى اشۋدى سۇرايمىن.

P.s. مىناۋ ءبىز باراتىن مەكتەپتىڭ جادناماسى. كوپ بالاسى بار ۇيدە بۇل تالاپتى ساقتاۋ قيىن دەپ ويلايمىن».

 

ايگۇل كادىربەك، مۇعالىم (اتى ءجونى ءوز سۇراۋىمەن وزگەرتىلىپ الىندى): «اتا- انالاردىڭ ۋايىمى ورىندى. ەكى جاعدايدا دا بالاسىنىڭ ەرتەڭىنە الاڭداۋلى اتا-انانىڭ ءۇنىن ەستيسىز. الايدا بۇل جەردە ءۇشىنشى ءبىر ماسەلە بار. ول بالانىڭ ساپالى ءبىلىمى دەر ەدىم. مىناداي جاعدايدا ساپالى ءبىلىم تۋرالى ويلاۋ مۇمكىن ەمەس. ونلاين وقىتۋ تۋرالى كۋرستار وقىتىلىپ باستالدى مۇعالىمدەرگە. شىنىمدى ايتايىن با؟ ءبارى دالباسا! كۋرستى ءۇش كۇن وقىدىق. وقىتۋشىلار وزدەرى تۇسىنەتىن شىعار نە ايتىپ وتىرعانىن، ال جەكە ءوزىم تۇك تە تۇسىنبەدىم. قازىرگى زامان تەحنيكاسىنىڭ ءتىلىن ءبىر كىسىدەي بىلەتىن، كومپيۋتەردىڭ بىرنەشە باعدارلاماسىندا ەركىن جۇمىس ىستەيتىن مەن الگى كۋرستان ەشتەڭە تۇسىنبەدىم. ال تەحنيكا ءتىلىن بىلمەيتىن مۇعالىمدەر شە، ولار قايتەدى؟ سايىپ كەلگەندە، بۇكىل مۇعالىمگە «كۋرستان ءوتتى» دەگەن سەرتيفيكات بەرىلەدى، ءىس ءبىتتى، ەسەپكە ءمور باسىلدى. الداعى وقۋ جىلى ساۋاتسىزداردىڭ سانىن ەسەلەپ كوبەيتىپ، ەل ەرتەڭىنە بالتا شابۋعا جول اشاتىن جىل دەپ قورقامىن. شىنداپ كەلگەندە، ءبارىمىز كوكتەمدەگى سياقتى ۆاتساپپەن تاپسىرما بەرىپ، ساباق وقىتقان بولامىز، بولدى. مەكتەپكە بارىپ، كەزەكشى سىنىپتا وقيدى دەگەن دە بوس ءسوز. نەگە دەسەڭىز، ءبىر سىنىپقا بىرنەشە رەت ۋاقىتقا ءبولىپ ساباق وتكەن مۇعالىم تەمىردەن جارالماعان عوي. سۇرلىگە شارشايدى. ال شارشاعان ادامنان قانداي ساپالى ءبىلىم تالاپ ەتەسىز؟ قورىتا ايتقاندا، ونسىز دا قوجىراعان ءبىلىم سالاسى الداعى ۋاقىتتا ادام ايايتىن جاعدايعا جەتەتىن بولدى».

وسى ماسەلەگە بايلانىستى بىرنەشە وقۋشىنى دا سوزگە تارتىپ كوردىك. «ساباقتى قالاي وقيمىز؟ ەندى نە بولار ەكەن؟ ونلاين وقىعانىمىز دۇرىس نەمەسە مەكتەپكە بارعانىمىز دۇرىس ەدى» دەگەن سىڭايداعى جاۋاپتىڭ ءبىرىن كۇتكەن ءۇمىتىمىز اقتالمادى. وكىنىشكە قاراي، سونداي وقۋشىلار جولىقتى ما، ايتەۋىر ءبىر سويلەسكەن جەتى وقۋشىنىڭ جەتەۋى دە جاڭا وقۋ جىلى ءۇشىن ەشقانداي الاڭداۋشىلىق بىلدىرە قويمادى. «كوكتەمدەگىدەي وتىرىك ساباق وقيمىز، كانيكۋلىمىز تاعى دا جالعاساتىن سياقتى عوي» دەسىپ، وقۋشىلارىمىز ىشكى قۋانىشتارىن جاسىرمادى دا. «وتىرىك ساباق» دەگەندەرىنە قاراعاندا، ۇلكەندەردىڭ بىتپەيتىن «وتىرىگىنە» وقۋشىلاردىڭ دا ەتتەرى ولە باستاعان-اۋ، شاماسى.

مەرۋەرت حۋساينوۆا،

«ادىرنا» ۇلتتىق پورتالى.

 

پىكىرلەر