شەكارانى بەكىتكەن الاش قايراتكەرىنە ءبىر قۇلاش قانا كوشە بەرىپتى

3251
Adyrna.kz Telegram

نۇر-سۇلتان قالاسىنىڭ ءالىمحان ەرمەكوۆ كوشەسىمەن كەلە جاتىپ، ءىشىم ۋداي اشىپ كەتتى. 1919-1920 جىلدارى ارالىعىندا قازاق ەلىنىڭ شەكاراسىنىڭ بەكىتىلۋىنە اسا كوپ ۇلەس قوسقان ماتەماتيك، الاشوردا وكىمەتىنىڭ العىر دا، زەرەك مۇشەسى، كورنەكتى مەملەكەت قايراتكەرى، قازاقتىڭ ماڭدايىنا بىتكەن ءبىرتۋار ۇلى ءالىمحان ەرمەكوۆكە كولەمى ءبىر قۇلاش قانا كوشەنى بەرە سالىپتى. مىناۋ دەگەنىڭ ارۋاق الدىندا قىلمىس قوي دەپ وزىمنەن ءوزىم تارىلىپ كەتتىم. بۇل تاريحي تۇلعا ءوزىنىڭ جاپ جاس شاعىنان باستاپ ءاليحان بوكەيحاننىڭ جانىندا قالماي جۇرگەن. ءاليحان دا بۇل جاس جىگىتتى زەرەكتىگى مەن العىرلىعىن تەرەڭ تانىپ، مەملەكەتتىڭ ەڭ ماڭىزدى شارۋالارىنا اتسالىسۋ ءۇشىن جانىنان تاستاماعان. ءالىمحان ەرمەكوۆ وتە جاس كەزىنەن باستاپ مەملەكەت پەن وكىمەتتىڭ شارۋالارىنا ارالاسىپ، ابدەن ىسىلىپ، جاس شاعىنىڭ كەزىنەن وزدىگىنەن مەملەكەتتىك دەڭگەيدە شەشىم شىعاراتىن تۇلعا بولىپ قالىپتاستى. ونىڭ قازاق ەلىنىڭ شەكاراسىن بەكىتۋدە لەنينمەن، كالينينمەن، ەنۋكيدزەمەن وتىرىپ تالقىلعان كەزىندەگى قازاق ەلىنىڭ جەر كولەمى 3 ميلليون 467 مىڭ 922 شارشى شاقىرىم بولىپ كورسەتىلىپتى. ال قازىرگى قازاق جەرى وسى جەردىڭ 69 پايىزىن قۇرايدى. ءبىزلىڭ 31 پايىز جەرىمىز قولدى بولىپ كەتتى. سوندا ءبىزدىڭ قانشاما ميلليون شاقىرىم جەرلەرىمىز جاتتىڭ قولىندا كەتكەنىن ەسەپتەي بەرىڭىز. نەبارى 29 جاسىندا ۇلتى ءۇشىن ۇلى ىستەرگە ءومىرىن ارناعان ءالىمحان ەرمەكوۆكە قازاقتىڭ ەلورداسىندا دۇرىس كوشە بۇيىرماپتى. جالپى، قازاق جەرىنىڭ شەكاراسىن بەكىتۋدە ەڭ كوپ ۇلەس قوسقان تاريحي تۇلعالار 20 عاسىردىڭ باسىندا ءاليحان بوكەيحان، احمەت بايتۇرسىنۇلى، ءالىمحان ەرمەكوۆ ۇشەۋى بولعانىن ۇرپاق بىلسە ەكەن... بۇلار ۇلىلار. ۇلىلار ەشقاشان دا ۇمىتىلمايدى. قازاقتىڭ تاعدىرىن ارقاسىنا ارقالاعان تاريحي ازاماتقا بۇل كوشەنى قالاي بەرىپ وتىر ەكەن، تۇسىنۋگە ميىم جەتپەي تۇر...

 

بەكبولات قارجان،

"ادىرنا" ۇلتتىق پورتالى

پىكىرلەر