بالتابەك نۇرعاليەۆ: بولات ءابىشۇلى ماڭداي تەرىمەن ءوز بيىگىنە ءوزى جەتكەن تۇلعا!

5472
Adyrna.kz Telegram

"ەلباسى-ەل ءۇشىن باق" دەپ جىرلاپ جۇرگەن تانىمال اقىن بالتابەك نۇرعاليەۆ قالىڭ كوپشىلىكتىڭ اشۋىن تۋعىزىپ، كەيبىرەۋىن كۇلكىگە باتىرىپ جۇرگەنى جاسىرىن ەمەس. دەگەنمەن بۇكىل قازاقتىڭ كوكەيىندە "بۇل كىسىنىڭ دەنى ساۋ ما؟" دەگەن ساۋالدىڭ دا جۇرگەنى راس. "ادىرنا" ۇلتتىق پورتالى سىزدەرمەن بىرگە كوكەيدى تەسكەن كوپ سۇراققا جاۋاپ ىزدەدى. ەندەشە سۇبەلى سۇحباتىمىزدى نازارلارىڭىزعا ۇسىنامىز.

 

- ءسىزدى جۇرت ەلباسىنا جىر ارنايتىن اقىن رەتىندە عانا تانيدى. باعىندىرعان بەلەستەرىڭىزدەن حابارسىز. وسى كۇنگە دەيىن قانداي جەتىستىكتەرگە جەتتىڭىز؟

- جەتىستىكتەرىمدى تىزسەم، جەتەرلىك. مەن كينو سالاسىندا، ادەبيەت سالاسىندا، كومپوزيتورلىق ونەر سالاسىندا ىزدەنۋ ۇستىندەمىن. الدىمەن تەاتر ونەرى سالاسىنداعى جەتكەن جەتىستىكتەرىمنەن باستايىن. الماتىداعى تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ «تەاتر ونەرى» فاكۋلتەتى «دراما تەاترىنىڭ رەجيسسەرى» ماماندىعىن قىزىل ديپلومعا ءبىتىردىم. اكادەميادا وقىپ جۇرگەنىمدە، ۇزدىك ۇلگەرىمدەرىم ءۇشىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ستيپەندياتى اتاندىم. كوپتەگەن رەسپۋبليكالىق جانە حالىقارالىق دارەجەدەگى رەجيسسەرلەر بايقاۋىنىڭ بىرنەشە دۇركىن جەڭىمپازىمىن. وقۋ ورنىنىڭ 3-ءشى كۋرسىندا وقىپ ءجۇرىپ-اق، كاسىبي تەاتر ساحناسىندا قويۋشى-رەجيسسەر رەتىندە اۋقىمدى سپەكتاكل ساحنالاعان قازاقتان شىققان تۇڭعىش تەاتر رەجيسسەرى مەن ەدىم. بۇل جەتىستىگىم ۇلتتىق تەاتر رەجيسسۋراسى تاريحىندا التىن ارىپپەن جازىلىپ قالادى دەپ ۇمىتتەنەمىن.

اكادەمياداعى وقۋىمدى بىتىرگەن بويدا ماسكەۋگە اتتاندىم. ول جاقتاعى رەسەي تەاتر ونەرى ۋنيۆەرسيتەتىنىڭ (رۋتي-گيتيس) «تەاتر رەجيسسۋراسى» ماماندىعى بويىنشا ماگيستراتۋراسىنا ەمتيحانداردى ءساتتى تاپسىرىپ، گرانتقا وقۋعا ءتۇستىم. بۇل جولى دا مەن رەسەي تەاتر ۋنيۆەرسيتەتى ماگيستراتۋراسىنا «تەاتر رەجيسسۋراسى» ماماندىعى بويىنشا وقۋعا قابىلدانعان قازاقتان شىققىن تۇڭعىش تەاتر رەجيسسەرى رەتىندە جارقىرادىم. الايدا بۇل جارقىراۋىم ۇزاققا سوزىلمادى. مەن بۇل وقۋعا قابىلدانعانىما قاتتى قۋاندىم. الايدا قۋانىشىمدى سۋ سەپكەندەي باسقان جاڭالىق بولدى. ونداعى ستيپەنديا مولشەرى وتە از بولىپ شىقتى. 1600 رۋبلدەي عانا. بۇل وقۋ ورنىنا 23 جاستا ماگيستراتۋراعا وقۋعا قابىلدانعان ءتىپتى الەم تەاترى ونەرى تاريحىنداعى العاشقى مامان مەن ەكەنمىن، سويتسەم. ونىڭ ۇستىنە بۇنداعى ماگيستراتۋراعا وقۋعا تاپسىرۋدىڭ مادەنيەتى مۇلدە بولەك ەكەندىگىنە كۋا بولدىم. سەبەبى گيتيس ماگيستراتۋراسىنا سالا بويىنشا جۇمىس تاجىريبەسى مول، ءبىراز مەملەكەتتىك دەڭگەيدە جەتىستىكتەرگە جەتكەن، «ەڭبەك سىڭىرگەن قايراتكەر» دەگەن اتاعى بار ماماندار تاپسىرادى ەكەن. مەنىمەن قاتار وقۋعا قابىلدانعان 5 ماگيسترانتتىڭ بارلىعىنىڭ دەرلىك جاستارى 40-50-لەر شاماسىندا بولاتىن. ولاردىڭ تەاترداعى جۇمىس وتىلدەرىنىڭ ءوزى 15-20 جىلدى قۇرايتىن. اكادەميا قابىرعاسىن ەندى بىتىرگەن جاپ-جاس مەنىڭ رەسەيدەگى مۇنداي جوعارى وقۋ ورنىنا ماگيستراتۋراعا قابىلدانۋىم ولار ءۇشىن دە تاڭدانارلىق جاعداي بولدى. سودان ءبىر قۋانىش، ءبىر مۇڭمەن ەلگە ورالدىم. قازاقستانعا كەلىپ، حالىقارالىق «بولاشاق» ءبىلىم ستيپەندياسىنا قۇجاتتار وتكىزىپ، بارلىق ەمتيحانداردى ۇزدىك تاپسىرىپ شىعىپ، ەلباسى جارلىعىمەن لاۋرەات اتاندىم. الايدا مەنىڭ ستيپەنديا الۋىما ءبىر عانا ماسەلە مۇمكىندىك بەرمەدى. «بولاشاق» باعدارلاماسىنىڭ ەرەجەسىندەگى «جىلجىمايتىن مۇلىك كەپىلىن جاساۋ كەرەك» دەگەن سىڭايلى قاعيدا الدىمنان سىناق بولىپ شىقتى. مەنىڭ اتىمدا ەشقانداي جىلجىمايتىن مۇلىك بولمادى سول كەزەڭدە. سول جىلجىمايتىن مۇلكىمنىڭ جوقتىعى قولىمدى بايلاپ، مەن رەسەيدەگى وقۋىما بارا المادىم. سەبەبى ماسكەۋدە ءجۇرىپ-تۇرۋ ءۇشىن قارجىلاي مۇمكىندىگىڭ بولۋ كەرەك. ول جاقتا جۇمىس جاساپ، تابىس تابۋدىڭ مۇمكىندىگى جوق ەكەندىگى تاعى بار. سەبەبى ونداعى ءبىلىم الامىن دەپ كەلگەن ىزدەنۋشىنىڭ بوس ۋاقىتى بولمايدى. قىسقاسىن ايتقاندا، مەنىمەن بىرگە وقۋعا قابىلدانعان باسقا دا ماگيسترانت ارىپتەستەرىممەن سالىستىرعاندا، مەنىڭ ماتەريالدىق جاعدايىم مۇشكىل بولعاندىعىن جاسىرمايمىن. ءبىلىم دەڭگەيىم، جۇمىس تاجىريبەم جوعارى بولسا دا سونداي شاراسىز كۇيگە ءتۇستىم. ماعان ەشكىم كومەكتەسپەدى. ءسويتىپ، مەن بۇل وقۋدان ءوز قالاۋىممەن باس تارتۋعا ءماجبۇر بولدىم. رەسەي تەاتر ونەر ۋنيۆەرسيتەتىندەگى (گيتيس) باسشىلىق، پەداگوگ-عالىمدار مەنى قاتتى ۋايىمداپ، جۇباتۋعا تىرىستى. ولار مەنىمەن قيماستىقپەن قوشتاستى. «كەلەسى جىلى كەل، وقۋعا قايتادان تاپسىر، سەنى تاعى گرانت يەگەرى تىزىمىنەن كورگىمىز كەلەدى» دەپ ءۇمىت وتىن جاقتى. كەلەسى جىلى ءدال سولاي بولدى دا. مەن كەلەسى جىلى رەسەي تەاتر ونەرى ۋنيۆەرسيتەتى ماگيستراتۋراسىنا ەكىنشى مارتە ءوتىنىش ءبىلدىرىپ، بارلىق ەمتيحانداردان جوعارى ۇپاي جيناپ، تاعى دا گرانتقا قابىلداندىم. بۇل الەمدىك ونەر تاريحىنداعى فەنومەندىك كورسەتكىش بولدى. رەسەي تەاتر ونەرى ۋنيۆەرسيتەتىنىڭ ماگيستراتۋراسىنىڭ گرانتىن ەكى جىل قاتارىنان جەڭۋ تاريحتا بۇرىن-سوڭدى بولماعان. بىراق بۇل جولى دا مەن وقۋعا بارا المادىم. سەبەبى، ەلگە كەلىپ، ەكىنشى مارتە حالىقارالىق «بولاشاق» ءبىلىم ستيپەندياسىنا قۇجات تاپسىرۋعا نيەتتەنگەنىمدە، ونداعىلار ماعان: «ءبىر مارتە لاۋرەات بولعان ىزدەنۋشى ەكىنشى رەت يەگەر بولا المايدى» دەپ جاۋاپ بەردى. سول جولى دا قاناتىم قايىرىلىپ، قايعىعا باتتىم. الايدا مەن سول جىلى ەلىمىزدەگى قازاق ۇلتتىق ونەر ۋنيۆەرسيتەتىنىڭ ماگيستراتۋراسىنا قاتارىنان قۇجات تاپسىرىپ قويعان ەدىم، ول جاقتان دا گرانتقا قول جەتكىزدىم. ءبىر جىل ىشىندە ەكى ۋنيۆەرسيتەت ماگيستراتۋراسىنا گرانتقا وقۋعا قابىلدانىپ، اقىرىندا ەلدە قالامىن دەپ شەشتىم. قازاقستان رەسپۋبليكاسىنىڭ ادەبيەت سالاسى بويىنشا مەملەكەتتىك سىيلىعىنىڭ يەگەرى، جازۋشى-دراماتۋرگ اكىم تارازيدەن ءدارىس الدىم. اكىم تارازي اعاما بارلىق جاقسىلىقتارى ءۇشىن العىسىم شەكسىز. ول كىسى ماعان قيىندىقتا قالعان كەزەڭدە قامقور بولا ءبىلدى. قازىرگى تاڭدا مەن كينوتەلەدراماتۋرگيا بويىنشا ونەرتانۋ عىلىمدارىنىڭ ماگيسترىمىن.

تاعى ءبىر ەرەكشە جەتىستىگىم – «قازاق اۋەندەرى» اق (قر مادەنيەت جانە سپورت مينيسترلىگى) «مەملەكەتتىك جانە كوممەرتسيالىق تاپسىرىس» دەپارتامەنتىندە جوبالار مەنەدجەرى رەتىندە قىزمەت اتقارعاندىعىم. وندا رەسپۋبليكالىق جانە حالىقارالىق دارەجەدەگى مادەني جوبالار كونتسەپتسيا-ەرەجەلەرىن، تەحنيكالىق مىنەزدەمەلەرىن جازىپ-دايىندادىم.

اقىندىق شىعارماشىلىقتاعى جارقىن جەتىستىگىم دەپ 15-ءشى حالىقارالىق «شابىت-2012» شىعارماشىل جاستار فەستيۆالىنىڭ «ەڭ ۇزدىك ادەبي شىعارما. پوەزيا» نوميناتسياسى بويىنشا گران-پري يەگەرى اتانعاندىعىمدى ايتا الامىن. «جارىق كۇننىڭ جۇرەگى» ولەڭدەر جيناعىم اقتوبە وبلىسى اكىمدىگىنىڭ قولداۋىمەن 500 ەكزەمپلياردا جارىق كوردى. اباي قۇنانبايۇلى، مۇقاعالي ماقاتاەۆ، تۇمانباي مولداعاليەۆ، ساعي جيەنباەۆ، ساتتار ەرۋباەۆ، باۋىرجان مومىشۇلى، مۇڭال بابا ەسىمدەرىنە ارنالعان جازبا اقىندار ءمۇشايرالارىنىڭ لاۋرەاتى ەكەندىگىم دە – مەرەيلى جەتىستىكتەرىم.

- ءسىزدىڭ جەتىستىكتەرىڭىزدى ايتا بەرسەك تاڭ اتاتىن سەكىلدى. اڭگىمە ارناسىن ءسىزدىڭ ولەڭدەرىڭىزدىڭ تاقىرىبىنا قاراي بۇرايىق. نەگىزگى تاقىرىبىڭىز رەتىندە نازارباەۆتى نەگە تاڭدادىڭىز؟

- سەبەبى مەن ءوز ەلىمنىڭ پاتريوتىمىن. مەن قازاقستانىمدى سۇيەمىن. مەن تۇركيا حالقىنىڭ ەردوعان ەسىمدى ءوز پرەزيدەنتىن قالاي قۇرمەتتەيتىنىن كورىپ، سولارداي بولساق قوي دەپ ارمانداپ كەتتىم. ءبىز دە تۇڭعىش پرەزيدەنتىمىزدى قادىرلەۋدە، ەرلىك ىستەرىن دارىپتەۋدە ەشكىمنەن كەم تۇسپەۋىمىز كەرەك دەپ ويلادىم. مەن ەلباسىمىزعا ساتقىندىق جاساعان جاندارعا رەنجىگەندىكتەن، تۇڭعىش پرەزيدەنتتى بيىك باعالاپ، اسقاقتاتا جىرلاۋىم كەرەك دەپ ءوز-ءوزىمدى قامشىلادىم. ەلباسىمىزعا ارناعان ولەڭدەرىم دە ءبىر توم كىتاپ بوپ تۇر.

- وسى كۇنگە دەيىن ەلباسىمەن جۇزبە-ءجۇز كورىسىپ ياكي تەلەفوننىڭ ارعى جاعىنان تىلدەسىپ كورىپ پە ەدىڭىز؟

- جوق. بەتپە-بەت مۇلدە كەزدەسىپ كورمەدىم. بىراق كەزدەسۋدى ارماندايمىن.

- ەلباسىعا ولەڭدەردى قانشا جاسىڭىزدان باستاپ شىعارا باستادىڭىز؟

- 13 جاستان باستاپ!

- ءبىر سوزىڭىزدە ماگيستراتۋرادان جەكە مەنشىك مۇلكىمنىڭ جوقتىعىنان باستارتتىم دەپ قالدىڭىز. قازىر باسىڭىزدا باسپانا، كولىك بار ما؟

- جەكە باسپانام دا، كولىگىم دە جوق.

- ءسىزدىڭ ەلباسىنا شىعارعان ولەڭدەرىڭىزدى facebook الەۋمەتتىك جەلىسىندەگى قولدانۋشىلاردىڭ ءبىرشاماسى ساركازم دەپ قابىلداۋدا. راسىمەن، سولاي ما؟

- جوق، ساركازم ەمەس.

- ەلباسىنا ولەڭ ارناعانىڭىز بەلگىلى ءبىر دەڭگەيدە ورىندى شىعار. دەسە دە ول كىسىنىڭ تۋىس-تۋعاندارىنا نەگە جىر ارنايسىز؟ بۇل جاعىمپازدىق پا؟

- ەلباسىمىزدىڭ ىزگىجۇرەكتى ءىنىسى، قازاقتىڭ قايسار ۇلى، الماتى وبلىسىنىڭ قۇرمەتتى ازاماتى بولات ءابىشۇلىنا «بولات اعام – بايتەرەگىم» اتتى كىتاپ ارناعانىم راس. «ساليقالى ۇرپاق» اتتى قور قۇرىپ، حالقىنا جاردەم قولىن سوزىپ جۇرگەن جانعا جىر جازۋىمنىڭ ەشقانداي بۇرىستىعى جوق. بولات ءابىشۇلى دا ءوز ەڭبەگىنىڭ ارقاسىندا، ءوز ءبىلىم-بىلىگىنىڭ ارقاسىندا، اقىلىمەن، العىرلىعىمەن، تاباندىلىعىمەن، ءبىر سوزبەن ايتقاندا، ماڭداي تەرىمەن ءوز بيىگىنە ءوزى جەتكەن تۇلعا. ءار قازاق ازاماتى بولات ءابىشۇلىنداي بولسا، ەلىمىزدىڭ ابىرويى بيىك بولماق. ول كىسى قوعام الدىندا قادىرلى جان. مەن عانا ەمەس، كوزى اشىق، كوكىرەگى وياۋ كەز-كەلگەن جان بۇل ازاماتتى قۇرمەتتەيتىندىگىنە سەنىمىم كامىل. قانشاما ىزگى ىستەرگە سەبەپكەر بولۋدا.

- الەۋمەتتىك جەلىدە سىزگە جازعان نەگاتيۆ پىكىرلەردى قالاي قابىلدايسىز؟

- سابىرمەن، ساۋلەلى اقىلمەن، جىلى جۇرەكپەن قابىلدايمىن. ولارعا ءبىر عانا نارسە ايتقىم كەلەدى... بارلىعى اباي قۇنانبايۇلىن مەن سەكىلدى تەرەڭ ءتۇسىنىپ وقىسىنشى. جالپى الەمدىك جانە ۇلتتىق ادەبيەتتىڭ ۇزدىك ۇلگىلەرىن وقىپ، جوعارى مادەنيەتكە ۇمتىلسا ەكەن دەگەن تىلەگىم بار. الەۋمەتتىك جەلىدەگىلەرگە ونەردىڭ بارلىق سالاسىنان مەن سەكىلدى جان-جاقتى حاباردار بولۋعا تالپىنىڭىزدار دەيمىن! قازاقستاندىق قوعامدى كەمەلدەنۋگە، ىزدەنىسكە، بىلىمدەرىن جەتىلدىرۋگە شاقىرامىن. «جاقسى ءسوز جارىم ىرىس» ەكەنىن ۇمىتپاۋىمىز كەرەك. «ءبىرىڭدى، قازاق، ءبىرىڭ دوس، كورمەسەڭ، ءىستىڭ ءبارى بوس» دەگەن ابايدىڭ ءسوزىن ەستەن شىعارمايىق. جانىبەك كارمەنوۆتىڭ «ويلاماڭدار، جىگىتتەر» تەرمەسىن تولىق زەيىن قويىپ، تۇيسىنسەك، اداسپايمىز.

- 17 تامىز كۇنى دوكتورانتۋراعا تەست تاپسىرعان ەدىڭىز. تەست ناتيجەسى قالاي بولدى؟ تۇسە الدىڭىز با؟ 

- ناتيجەسى ءالى ناقتى شىقپادى. دەگەنمەن تۇسە المايتىن سەكىلدىمىن. سەبەبى باقىلاۋشىلاردىڭ باسىم بولىگى ورىس تىلدىلەردى قولداپ، قۋاتتاپ وتىردى.

- مەملەكەتىمىزدە وسىنداي دۇنيەلەردىڭ بار ەكەنىن كورىپ اشىنبايسىز با؟

- اشىنامىن. وسىنداي بۇرمالاۋشىلىقتار اياقتان شالادى.

- بىردە سىزدەن تەاتر ونەرى تۋرالى سۇحبات العان ەدىم. ءبارىن جىك-جىگىمەن ءبولىپ، ساۋاتتى تۇردە تالداپ بەردىڭىز. ءسىز ءۇشىن قاي سپەكتاكل №1?

- تەاتر ونەرىن ءتۇسىنۋ ءومىردى، ادامداردىڭ تاعدىرلارىن تۇسىنۋگە ۇيرەتتى. تەاتر ونەرى – گۋمانيزمگە تاربيەلەيتىن ونەر. اباي ايتقانداي «ادامزاتتىڭ ءبارىن ءسۇي باۋىرىم دەپ» ۇستانىمى – تەاتر ونەرىنىڭ ۇستانىمى بولۋعا ءتيىس. مەن ءۇشىن №1 سپەكتاكل – ۇلى تەاتر رەجيسسەرى ريماس تۋميناستىڭ الەكستاندر پۋشكين رومانى بويىنشا ماسكەۋدەگى ەۆگەني ۆاحتانگوۆ اتىنداعى مەملەكەتتىك اكادەميالىق تەاترى ساحناسىندا قويعان «ەۆگەني ونەگين» سپەكتاكلى.

- «جەتەم ساعان الىپ-ۇشىپ، اسىعىپ،

          پاك كۇلكىڭنىڭ قۇدىرەتىنە باس ۇرىپ..» دەپسىز ءبىر جىرىڭىزدا. نەگە وسى ۋاقىتقا دەيىن ۇيلەنبەي ءجۇرسىز؟

- سەبەبى ومىرلىك سەرىك بولاتىن، جانىمدى تۇسىنەتىن جاندى ءالى جولىقتىرمادىم. سونى تاڭىردەن تىلەپ ءجۇرمىن.

-             شاكىرت تاربيەلەگەنىڭىزدەن حاباردارمىز. اراسىندا جەتىستىككە جەتكەندەرى بار ما؟

- قازىرگى تاڭدا شاكىرت تاربيەلەپ جۇرگەن جوقپىن. بۇعان دەيىن ت.جۇرگەنوۆ اتىنداعى قازاق ۇلتتىق ونەر اكادەمياسى كوللەجدىندە «اكتەرلىك ونەر» ماماندىعى بويىنشا ءدارىس بەرگەنمىن. مەنىڭ شاكىرتتەرىمنىڭ اراسىندا رەسپۋبليكاعا، الەمگە تانىمال بولعاندارى، جەتىستىككە جەتكەندەرى بارشىلىق. مىسالى، ازات ءجۇمادىل، اقنيەت بەلاساروۆا، اسەماي تۇرارحان، ەركەماي تويبەك. ازات ءجۇمادىل ەسىمدى شاكىرتىم «قازاقفيلم» كينوستۋدياسى تۇسىرگەن رەجيسسەر بەرىك جاحانوۆتىڭ «اسان» فيلمىندە باستى كەيىپكەردى سومدادى. بۇل فيلم 71-ءشى حالىقارالىق كانن كينوفەستيۆالىنىڭ Short Film Corner اياسىندا كورسەتىلدى جانە ءىىى Baikonyr Short Film Festival بايقاۋىنا قاتىسىپ، سول بايقاۋدا اسان ءرولىن بەينەلەگەن شاكىرتىم ازات ءجۇمادىل «ۇزدىك اكتەر» اتاعىنا يە بولدى. وسى فيلمدەگى ەڭبەگى ءۇشىن شاكىرتىم رۋمىنيادا وتكەن حالىقارالىق Short to the Point كينوفەستيۆالىندە دە «ۇزدىك ەر ادام ءرولى» جۇلدەسىمەن ماراپاتتالدى. سونىمەن قاتار، ول «كوكجال»، «ساعان سەنەمىن»، «وزگەگە جۇمباق الەمىم»، «سۇيە بىلسەڭ»، «شلاگباۋم» سەكىلدى بىرنەشە جوبالارعا قاتىسىپ، رەسپۋبليكا جۇرتشىلىعىنا كەڭ تانىلدى.

اقنيەت بەلاساروۆا ەسىمدى شاكىرتىم رەسپۋبليكا كورەرمەندەرى جىلى قابىلداعان «كوزايىم»، «مادەنيەت ءۇيى» سەكىلدى تەلەسەريالداردا باستى رولدەردى ويناعان. قازىرگى تاڭدا دا كوپتەگەن سەريالدارعا ءتۇسىپ، جەمىستى ەڭبەك ەتىپ ءجۇر. جانە ءبىر شاكىرتىم اسەماي تۇرارحان تالدىقورعان قالاسىنداعى بيكەن ريموۆا اتىنداعى دراما تەاترىنىڭ اكتريساسى. كوپتەگەن سپەكتاكلدەردە باستى رولدەردى سومداپ ۇلگەردى. مەنىڭ جولىمدى جالعاپ، تەاتر رەجيسسۋراسىنا تالاپتانىپ جۇرگەن شاكىرتتەرىمنىڭ ءبىرى ەركەماي تويبەكتى ەرەكشە ماقتان تۇتامىن. بۇگىنگى تاڭدا ت.جۇرگەنوۆ اتىنداعى قازاق ۇلتتىق ونەر اكادەمياسىندا ستۋدەنت. مەن ءار شاكىرتىمنىڭ جەتىستىگىنە شىن قۋانامىن. ولار كوپ. بارلىعىنا «ونەردە جولدارىڭ بولىپ، جۇلدىزدارىڭ جارقىراسىن» دەيمىن. ەل ونەرىنىڭ ەڭسەسىن كوتەرۋگە ۇلكەن ۇلەستەرىن قوسۋدا زور كۇش-قۋات، شالقار شابىت تىلەيمىن.

-             بولاشاعىڭىزدى قالاي ەلەستەتەسىز؟

- ۇلگىلى وتباسى قۇرىپ، بالالارىما جاقسى اكە، جارىما قامقور ازامات بولعىم كەلەدى.

 

اڭگىمەلەسكەن اقگۇل ايداربەكوۆا،

«ادىرنا» ۇلتتىق پورتالى

پىكىرلەر