پەداگوگ قۇقىعىن بۇزعان ءبىلىم سالاسىنىڭ 30-عا جۋىق باسشىسى جازالاندى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
«مۇعالىم كۇندەلىكتى 2 قۇجاتتى عانا تولتىرۋعا ءتيىس. قالعان قۇجاتتاردىڭ بارلىعىنان ارىپتەستەرىمىزدى بوساتتىق. بۇل بۇيرىقتى بۇزعاندارعا اكىمشىلىك جاۋاپكەرشىلىك كوزدەلگەن. بۇل ەرەجەنى بۇزعان باسشىلاردى نەمەسە وزگە دە لاۋازىمدى تۇلعالاردى قاتاڭ جازالايتىن بولامىز. قىسقا عانا ۋاقىتتىڭ ىشىندە شامامەن 30 باسشىنى جازالاپ، ولاردى اكىمشىلىك نەمەسە تارتىپتىك جازاعا تارتتىق»، - دەدى مينيستر پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى بارىسىندا. سونىمەن قاتار مينيستر مۇعالىمنىڭ قۇقىعىن بۇزعان اتا-انالاردىڭ دا جاۋاپقا تارتىلاتىندىعىن ەسكەرتتى. «بۇل جۇمىستاردىڭ بارلىعى دا جالعاساتىن بولادى»، - دەپ اتاپ ءوتتى اسحات ايماعامبەتوۆ.
فوتو اشىق دەرەككوزدەردەن الىندى.
