اقتاۋلىق اتا-انالار قاشىقتان وقىتۋعا قارسى. ولار كوروناۆيرۋسقا قاتىستى جاعداي تۇراقتالعانىنا قاراماستان، بالالاردى قاشىقتان وقىتۋعا شەشىم قابىلداعان قۇزىرلى مەكەمەلەرگە وكپەسى قارا قازانداي.
ىندەتكە بايلانىستى جاعداي تۇراقتالسا دا، جەرگىلىكتى بيلىك كەزەكشى سىنىپتار اشۋعا قۇلىقسىز ەكەنىن العا تارتقان اقتاۋلىق اتا-انالار ءوز نارازىلىعىن ءبىلدىرىپ، قول جيناۋعا كىرىسكەنىن مالىمدەدى. اقتاۋلىق اتا- انالار ۇيدە بالا وقىتۋمەن قاتار جۇمىس ىستەۋگە مۇمكىندىگى بولمايتىنىن ايتادى.
«مەنىڭ ءتورت بالامنىڭ ۇشەۋى مەكتەپ جاسىنداعىلار. جاڭا وقۋ جىلىنا از قالدى. مەن بالالارىمدى ۇيدە قالاي وقىتامىن، ەش تۇسىنە الار ەمەسپىن. جەكەمەنشىك مونشالار مەن جاعاجايلاردا سانيتارلىق تالاپ ساقتالادى ەكەن دە، ال مەكتەپتە بۇل تالاپ ساقتالماي ما سوندا؟ مۇنى كىم ويلاپ شىعاردى؟ قيسىندى ما بۇل؟» دەيدى اتا-انالار. ولاردىڭ پايىمداۋىنشا، ءار ءوڭىر جاعدايىنا قاراي قاشىقتان وقىتۋ ماسەلەسى بويىنشا شەشىم قابىلداۋى كەرەك.
«اقتاۋ ءبىلىم بەرۋ باسقارماسىنىڭ باسشىسى تولەباەۆا سۆەتلانا 31 شىلدەدە ماڭعىستاۋ وبلىسى ىندەت قاۋپى بويىنشا قىزىل سىزىقتا ەكەنىن ايتتى. كەزەكشى سىنىپتار بولمايدى دەدى. ال 27 شىلدەدە بىزدەگى پروۆيزورلىق ستاتسيونارلار جابىلدى. 4 تامىزدا ۇكىمەت باسشىسى اسقار مامينمەن وتكەن سەلەكتورلى جيىندا ەپيدەميولوگيالىق احۋالعا بايلانىستى شالعاي اۋىلداعى شاعىن مەكتەپتەر شتاتتى رەجيمدە جۇمىس ىستەيتىنى ءسوز بولدى.
ۇكىمەت باسشىسى سانيتارلىق تالاپتى قاتاڭ ساقتاي وتىرىپ، باستاۋىش سىنىپ وقۋشىلارى ەگەر اتا-انالارى ءوتىنىش بىلدىرسە، كەزەكشى سىنىپتاردا ءبىلىم الاتىنىن دا وسى جيىندا ايتتى. مامين ماعان وسىنداي قۇقىق بەرسە، سۆەتلانا تولەباەۆا بۇل قۇقىعىمدى شەكتەپ وتىر. بۇل از دەسەڭىز، 10 تامىزدا دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ قازاقستانداعى كوروناۆيرۋستىڭ تارالۋى توقتاعانىن مالىمدەدى. كىمگە سەنەمىز؟»-دەيدى تۇككە تۇسىنبەگەن اتا-انالار.
مۇنان بولەك، ولار ينتەرنەت بايلانىستىڭ ساپاسىنا قاتىستى دا شاعىم جاسادى.
«ينتەرنەت بايلانىستىڭ ساپاسى سىن كوتەرمەيدى. كوكتەمگى كارانتيندە مۇعالىمدەر تاپسىرمانى تەلەگرام كانالعا تاستاپ قانا وتىردى. ساباقتى تۇسىندىرە الماۋدى ينتەرنەت ناشارلىعىمەن بايلانىستىردى. يۋتۋبتاعى ساباققا سىلتەمە بەرىپ، تاپسىرمانى ورىنداۋدى تالاپ ەتتى. ارينە، بالا يۋتۋبتاعى ساباققا تۇسىنبەيدى. اقىرىندا ساباقتى ءتۇسىندىرۋ جۇمىسى اتا- انانىڭ ەنشىسىنە قالدى.
مۇعالىم مەن اتا-انانىڭ ساباق ءتۇسىندىرۋى ەكى بولەك بولعاندىقتان، بالامىزدىڭ ءبىلىمى تومەندەمەسە، ارتا قويمادى. اعىلشىن ءتىلىنىڭ ونلاين ساباعى ءۇش مينۋتتان تۇرادى. سوسىن ءۇي تاپسىرماسىن ورىنداۋ كەرەك. ءدال سولاي قازاق ءتىلى پانىنە قاتىستى ايتۋعا بولادى. بالالارىمىز بۇدان قالاي ءبىلىم الادى؟» دەگەن اتا-انالار ءوز سۇراقتارىنا ءبىلىم باسقارماسى وكىلدەرىنىڭ جاۋاپ بەرۋىن تالاپ ەتۋدە.
ولار «ماڭعىستاۋ وبلىسىندا كەزەكشى سىنىپتار اشىلسىن» دەگەن تالاپپەن اتا انالار قول جيناۋعا كىرىستى.
اقپارات كوزى: «لادا.كز»
