Aqtaýlyq ata-analar qashyqtan oqytýǵa qarsy. Olar koronavırýsqa qatysty jaǵdaı turaqtalǵanyna qaramastan, balalardy qashyqtan oqytýǵa sheshim qabyldaǵan quzyrly mekemelerge ókpesi qara qazandaı.
Indetke baılanysty jaǵdaı turaqtalsa da, jergilikti bılik kezekshi synyptar ashýǵa qulyqsyz ekenin alǵa tartqan aqtaýlyq ata-analar óz narazylyǵyn bildirip, qol jınaýǵa kiriskenin málimdedi. Aqtaýlyq ata- analar úıde bala oqytýmen qatar jumys isteýge múmkindigi bolmaıtynyn aıtady.
«Meniń tórt balamnyń úsheýi mektep jasyndaǵylar. Jańa oqý jylyna az qaldy. Men balalarymdy úıde qalaı oqytamyn, esh túsine alar emespin. Jekemenshik monshalar men jaǵajaılarda sanıtarlyq talap saqtalady eken de, al mektepte bul talap saqtalmaı ma sonda? Muny kim oılap shyǵardy? Qısyndy ma bul?» deıdi ata-analar. Olardyń paıymdaýynsha, ár óńir jaǵdaıyna qaraı qashyqtan oqytý máselesi boıynsha sheshim qabyldaýy kerek.
«Aqtaý bilim berý basqarmasynyń basshysy Tólebaeva Svetlana 31 shildede Mańǵystaý oblysy indet qaýpi boıynsha qyzyl syzyqta ekenin aıtty. Kezekshi synyptar bolmaıdy dedi. Al 27 shildede bizdegi provızorlyq staıonarlar jabyldy. 4 tamyzda Úkimet basshysy Asqar Mamınmen ótken selektorly jıynda epıdemıologııalyq ahýalǵa baılanysty shalǵaı aýyldaǵy shaǵyn mektepter shtatty rejımde jumys isteıtini sóz boldy.
Úkimet basshysy sanıtarlyq talapty qatań saqtaı otyryp, bastaýysh synyp oqýshylary eger ata-analary ótinish bildirse, kezekshi synyptarda bilim alatynyn da osy jıynda aıtty. Mamın maǵan osyndaı quqyq berse, Svetlana Tólebaeva bul quqyǵymdy shektep otyr. Bul az deseńiz, 10 tamyzda Densaýlyq saqtaý mınıstrliginiń resmı ókili Baǵdat Qojahmetov Qazaqstandaǵy koronavırýstyń taralýy toqtaǵanyn málimdedi. Kimge senemiz?»-deıdi túkke túsinbegen ata-analar.
Munan bólek, olar ınternet baılanystyń sapasyna qatysty da shaǵym jasady.
«Internet baılanystyń sapasy syn kótermeıdi. Kóktemgi karantınde muǵalimder tapsyrmany telegram kanalǵa tastap qana otyrdy. Sabaqty túsindire almaýdy ınternet nasharlyǵymen baılanystyrdy. Iýtýbtaǵy sabaqqa silteme berip, tapsyrmany oryndaýdy talap etti. Árıne, bala ıýtýbtaǵy sabaqqa túsinbeıdi. Aqyrynda sabaqty túsindirý jumysy ata- ananyń enshisine qaldy.
Muǵalim men ata-ananyń sabaq túsindirýi eki bólek bolǵandyqtan, balamyzdyń bilimi tómendemese, arta qoımady. Aǵylshyn tiliniń onlaın sabaǵy úsh mınýttan turady. Sosyn úı tapsyrmasyn oryndaý kerek. Dál solaı qazaq tili pánine qatysty aıtýǵa bolady. Balalarymyz budan qalaı bilim alady?» degen ata-analar óz suraqtaryna Bilim basqarmasy ókilderiniń jaýap berýin talap etýde.
Olar «Mańǵystaý oblysynda kezekshi synyptar ashylsyn» degen talappen ata analar qol jınaýǵa kiristi.
Aqparat kózi: «Lada.kz»
