الماتى قالاسى ءبىلىم باسقارماسى باسشىسىنىڭ ورىنباسارى قايرات جۇمانوۆ قالادا ءبىرىنشى قىركۇيەكتەن باستاپ 1-2 سىنىپ وقۋشىلارى ءۇشىن كەزەكشى سىنىپتار اشىلاتىنىن ايتتى. بۇل تۋرالى Sputnik.kz حابارلادى.
"الماتى قالاسىنداعى ەپيدەميولوگيالىق جاعداي قالالىق دەنساۋلىق باسقارماسى، تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ نازارىندا. قازىر جۇمىس ىستەيتىن اتا-انالاردان مۇمىندىگىنشە كەزەكشى سىنىپتاردى اشۋ تۋرالى كوپتەگەن ءوتىنىش ءتۇسىپ وتىر. وسىعان بايلانىستى بارلىق جالپى بەرەتىن مەكتەپتەردە 1-2 سىنىپ وقۋشىلارى ءۇشىن كەزەكشى توپتار اشۋ تۋرالى شەشىم قابىلداندى", - دەدى ول.
سونىمەن قاتار باستاۋىش سىنىپتار ءۇشىن ارنايى تۇزەتۋ مەكتەپ-ينتەرناتتارىندا شتاتتىق رەجيمدە جۇمىس ىستەۋگە رۇقسات ەتىلگەن.
كەزەكشى سىنىپتارداعى تالاپ
بالاسىنىڭ كەزەكشى سىنىپقا بارۋى ءۇشىن اتا-انا مەكتەپ ديرەكتورىنىڭ اتىنا ءوتىنىش بەرۋى كەرەك. ونى كەز كەلگەن بايلانىس قۇرالى ارقىلى سىنىپ جەتەكشىسىنە جىبەرە الادى.
باستى تالاپ – سانيتارلىق-ەپيدەميولوگيالىق تالاپتاردى ساقتاۋ. سول سەبەپتى كەزەكشى سىنىپتا 15 بالادان ارتىق بولمايدى. ءار پارتادا ءبىر بالا وتىرادى.
ساباق 40 مينۋتقا سوزىلادى، كەستە بالالار ۇزىلىسكە ءتۇرلى ۋاقىتتا شىعاتىنداي ەتىپ قۇرىلادى.
كومپيۋتەرمەن قامتاماسىز ەتۋ
"بالالاردى جانە مۇعالىمدەردى كومپيۋتەرمەن قامتاماسىز ەتۋ ماقساتىندا مونيتورينگ جۇرگىزىلدى. ناتيجەسىندە 75 مىڭنان اسا بالا مەن 2 مىڭنان اسا مۇعالىمدى كومپيۋتەرمەن قامتاماسىز ەتۋ كەرەك ەكەنى بەلگىلى بولدى", - دەدى جۇمانوۆ.
جۇمانوۆ وسى ماسەلەنى شەشۋگە بايلانىستى بىرقاتار جۇمىس ۇيىمداستىرىلىپ جاتقانىن ايتتى.
"جەرگىلىكتى بيۋدجەت قارجىسىنان 20 مىڭنان اسا كومپيۋتەر الىنادى. بۇگىندە بارلىق كەلىسىمشارت جاسالدى. 38 مىڭنان اسا كومپيۋتەر تەحنيكاسى، ونىڭ ىشىندە نوۋتبۋك، پلانشەت ۇكىمەتتىڭ رەزەرۆ قورىنىڭ قارجىسىنا الىنادى. سونىمەن قاتار 22,5 مىڭنان اسا تۇرمىسى تومەن وتباسىعا كومپيۋتەر جەرگىلىكتى بيۋدجەتتەن ساتىپ الىنادى. 14 مىڭنان اسا كومپيۋتەر وقۋشىلارعا ۋاقىتشا بەرىلەدى", - دەدى جۇمانوۆ.
ايتۋىنشا، قازاقستاننىڭ سىرتقى ىستەر مينيسترلىگى، قازاقستاندىق ديپلوماتتار بىرلەستىگى جانە قر بالالار قۇقىعى جونىندەگى ۋاكىل ارۋجان ساين جىبەرگەن 150 نوۋتبۋك تۇرمىسى تومەن وتباسىلارعا بەرىلدى.
وقۋشىلاردى كىتاپپەن قامتاماسىز ەتۋ
الماتى قالاسى ءبىلىم باسقارماسى باسشىسىنىڭ ورىنباسارى قايرات جۇمانوۆتىڭ ايتۋىنشا، 2020-2021 وقۋ جىلىندا 1-11 سىنىپ وقۋشىلارىنا وقۋلىق ساتىپ الۋ ءۇشىن جەرگىلىكتى بيۋدجەتتەن 3,8 ميلليارد تەڭگە ءبولىندى. بۇل سوماعا تاسىمالداۋ قۇنى دا كىرەدى. الماتى قالاسىنىڭ وقۋشىلارى 100% تەگىن وقۋلىقپەن قامتاماسىز ەتىلەدى.
ايتا كەتەيىك، 2020 جىلى ءبىلىم كۇنى ونلاين فورماتتا وتەدى. جوعارى وقۋ ورىندارى، مەكتەپتەر مەن كوللەدجدەر قاشىقتان وقيدى.
"ادىرنا" ۇلتتىق پورتالى
