جەمقورلىق جىرى قاشان توقتايدى؟

2313

«بيۋدجەتتەن اقشا ۇرلاندى، قارجى جىمقىرىلدى» دەسە, تاڭ قالمايتىن قوعامدا ءومىر ءسۇرىپ جاتىرمىز. مۇنداي جاڭالىقتاردى ەستۋگە ەت-قۇلاعىمىز ۇيرەنىپ كەتكەلى قاشان؟ بۇگىندە اقشانى قالتاعا باساتىن جەمقورلار كوبەيمەسە، ازايعان جوق. قايتپەك كەرەك؟

وتە قاۋىپتى سيمپتوم

كۇنى كەشە پرەزيدەنت جەمقورلىقتى «قاۋىپتى سيپتومعا» تەڭەپ، كۇرەسۋ باعىتتارىن ۇسىندى.

«وتكەن جىلمەن سالىستىرعاندا جەمقورلىق ارەكەتتەرى ءۇشىن جاۋاپقا تارتىلعان ادامداردىڭ سانى 11 پايىزعا ارتقان.شەنەۋنىكتەردىڭ ىشىندە ەكى وبلىس اكىمى دە بار. مۇنىڭ ءوزى "وتە قاۋىپتى سيمپتوم», – دەدى ول.

سونداي-اق, توقاەۆ بۇل ماسەلەدە ەشقانداي كوزبوياۋشىلىققا، «بارماق باستى، كوز قىستى» ارەكەتتەرگە جول بەرىلمەۋگە ءتيىس ەكەنىن ايتىپ، جەمقورلىق ءۇشىن سوتتالعانداردى شارتتى تۇردە مەرزىمىنەن بۇرىن بوساتۋعا زاڭ جۇزىندە تىيىم سالۋدى تاپسىردى.

1002 جەمقور سوتتالدى

وتكەن جىلى بيۋدجەتتەن 24,6 ملرد تەڭگە جىمقىرىلىپ، 1002 لاۋازىم يەسى سوتتالعان.

تويىمسىزدار قايدان شىعىپ جاتىر؟

ەلىمىزدە سىبايلاس جەمقورلىقپەن كۇرەس شارالارى جاسالىپ جاتىر، بىراق ناتيجە جوق. شەنەۋنىكتەر بىرىنەن كەيىن ءبىرى اۋىسقانىمەن، تۇيىتكىلدەر سول كۇيى شەشىلمەدى. قايتا ولاربيلىككە «بۇرىنعى باسشىعا قاراعاندا كوپ جەۋ كەرەك» دەگەن ۇرانمەن كەلeتىندەي مە، قالاي؟ وسى تۇستا الەم ەلدەرىنىڭ كۇرەسۋ تاكتيكاسىنا كوز جۇگىرتىپ كورەلىكشى.

«ەگەر ءسىز جەمقورلىقتىڭ جويىلۋىن قالاساڭىز، دوستارىڭىز بەن تۋىستارىڭىزدى تۇرمەگە توعىتۋعا دايىن بولىڭىز»

ءدال وسى ۇستانىمدى ۇستانۋ ارقىلى لي كۋان يۋ جەمقورلىق جايلاعان سينگاپۋر ەلىن 30 جىلدا تىعىرىقتان الىپ شىقتى. بۇگىندە بۇل ەل دامىعان ەلدەر قاتارىندا. پرەمەر-مينيستر ەلدەگى  بۇكىل زاڭنامالاردى وزگەرتىپ، جازالاۋدا ەشكىمدى ايامادى.

«جەمقورلار جويىلماي، جەمقورلىق جويىلمايدى»

قىتايدا پارا العان ادامدى كوپشىلىك كوزىنشە ءولىم جازاسىنا كەسەدى. سوڭعى 10 جىل ىشىندە ەلدە 10 مىڭ شەنەۋنىك اتىلىپ، 120 مىڭ جەمقور 10 جىلدان 20 جىلعا دەيىن باس بوستاندىعىنان ايىرىلعان. ال بىرىككەن اراب امىرلىگىندە جەمقورلاردىڭ قولىن كەسەدى.

وسى تۇستا بىزگە دە قاتال زاڭ كەرەك پە دەگەن ويعا كەلەسىڭ. سەبەبى،  كورسەتكىشتەر جەمقورلاردى تۇرمەگە توعىتۋ ارقىلى ماسەلەنى شەشە المايتىنىمىزدى دالەلدەدى. تويىمسىزداردى تەگىن تاماقپەن قامتاماسىز ەتكەننەن ءبىز نە ۇتتىق؟ ارالارىندا اۋىزباستىرىق بەرىپ, جازادان قۇتىلعاندارى، مەرزىمىنەن بۇرىن بوستاندىققا شىعىپ، تايراڭداپ جۇرگەندەرى قانشاما؟ ەلىمىزدەگى احۋال وسىلاي جالعاسا بەرسە، جەمقورلاردىڭ جۇلىنى ەشقاشان ۇزىلمەس..

 

ديانا اسان،

«ادىرنا» ۇلتتىق پورتالى

 

پىكىرلەر
رەداكتسيا تاڭداۋى
Серіктес/Партнер
Студия IMA - создание сайтов