اعام، دارحان تۇرسىنجاندى بۇگىنگى مەرەكەسىمەن شىن جۇرەكتەن قۇتتىقتاي وتىرىپ، وقىرماندارعا وسى قىزمەتكە جەتۋ ءۇشىن اعامنىڭ جۇرگەن جولدارى مەن سول جولدارداعى قىزىقتى وقيعالاردى نازارلارىڭىزعا ۇسىنامىز.
دارحان وسى ءىستىڭ مامانى بولۋ ءۇشىن نە ىستەدى؟
بالا كەزدەن اعامنىڭ ەڭ الدىمەن اسكەري قىزمەتكەر بولۋدى ارمانداعانى ەسىمدە. ارمان جولىندا ماقساتىنا جەتۋ ءۇشىن ءتۇرلى امالدار ىستەپ، ناقتى قادام جاساي ءبىلدى. ەڭ الدىمەن بالا كەزدەن جانى سپورتقا جاقىن بولدى. كۇرەس ۇيىرمەلەرىنە بارىپ، جارىستاردان ۇنەمى جۇلدەمەن ورالاتىن. مەكتەپتە العاشقى اسكەري دايىندىق ءپانىن اسقان قىزىعۋشىلىقپەن وقىپ، مەكەپ ۆزۆود كومانديرى مەن “جاس ۇلان” ۇيىمىنىڭ پرەزيدەنتى بولعان.
ويىن بالاسىنان-شەكارا مامانىنا دەيىن...
اعامنىڭ وسى ماماندىقتى تاڭداپ، ناقتى قادامدار جاساي بىلگەنى مەنى ءتانتتى ەتتى. وقۋعا تۇسەر الدىندا تاپسىراتىن ەمتيحانعا ساباقتان بوساي قالعان كەزدە، ۋاقىتتى قۇر جىبەرمەي جۇگىرىپ، بەلتەمىرگە تارتىلىپ دايىندالاتىن. اسكەري ومىرگە قىزىققانى سونشالىق اعامنىڭ مىلتىقتى شاشىپ-جيناعانىنا كوز ىلەسپەيتىن. وق اتۋدا مەرگەندىگىمەن دە تاڭقالدىرۋدان جالىقپادى. وسىلاي نىق سەنىممەن اعام ەمتيحان تاپسىرۋعا كەتىپ، ءساتتى تاپسىرىپ، ءوزى ارمانداعان وقۋ ورنىنا ءبىلىم الۋعا ءتۇستى.
سۇزگىدەن قايتا سۇزىلگەندەي بولدىم...
ەمتيحان تاپسىرۋعا بارعاندا “سۇزگىدەن قايتا سۇزىلگەندەي بولدىم”-دەگەن ەدى. وقۋدىڭ العاشقى كەزدەرى اعاما بارعان كەزدە شارشاڭقى رەڭمەن شىعاتىن. ءوڭى شارشاپ تۇرعانىمەن، كوزى وتتاي جانىپ تۇراتىن. باسىندا كىشكەنە قينالعانىن ايتاتىن. كەيىن ۇيرەنىپ، ءسىڭىسىپ كەتكەنىن وزىنەن دە بايقاۋشى ەدىك. بىراق، اعام ەشقاشان “شارشادىم” -دەپ ايتپايتىن. ارمانىنا ءبىر تابان جاقىن تۇرعان اعاما، ەش نارسە دە كەدەرگى بولمادى.
اسكەري ادامنىڭ ۇيدەگى بولمىسى قانداي؟
ۇيدە كوڭىلدى، وتە باۋىرمال جان. اسكەري ءومىردىڭ تەمىردەي تارتىبىنە بويى ۇيرەنگەن اعامىزدىڭ ءسوزىن ەكى قايتالاتپاۋعا تىرىسامىز. كەيدە «سەندەر تىنىش ۇيىقتاسىن دەپ جۇرمىزعوي، ۇيىقتاي بەرىڭدەر الاڭسىز» دەپ ازىلدەپ قويادى. بۇرىن مەن دە العاشقى اسكەري دايىندىق ساباعىنان جاڭا نارسە ۇيرەنسەم، اعاما حابارلاسىپ ءوز جەتىستىگىممەن ماقتانىپ وتىراتىنمىن. ءالى دە اعام بارىمىزگە قولداۋ كورسەتىپ، ۇنەمى جانعا جىلۋ سىيلاپ وتىرادى.
قىزمەتتىڭ العاشقى كۇندەرى
بيىل وقۋىن تامامداعان اعامنىڭ قىزمەت جولى ماڭعاز دالا-ماڭعىستاۋ مەكەنىنەن باستالدى. تۋعان اۋىلى مەن اتا-اناسىنان الىسقا كەتكەنى جانىمىزعا باتقانىمەن، جىلدار بويعى ارمانىنىڭ كورىنىس تاپقانىنا ءبارىمىز دە قۋانىشتىمىز. اعام قازىر قىزمەتتە. بايلانىستا كۇندە بولا بەرمەۋىنە بايلانىستى بۇگىن مەيرامىمەن قۇتتىقتاۋدىڭ ءساتى تۇسپەي تۇر. اتا-انادان باستاپ، اعايىن-تۋىس، باۋىرلارى جۇرەك جاردى تىلەكتەرىن ءبىلدىرىپ، جىلى لەبىزدەرىن ايتۋدا.
ارمانىڭىز اسكەري وقۋ ورنى بولسا...
ەڭ الدىمەن تاباندىلىقتى قاجەت ەتەتىن ماماندىقتىڭ يەسى بولۋ ءۇشىن 1 جىل عانا دايىندالۋ ازدىق ەتەدى. وزىڭىزگە دەگەن سەنىمىڭىز مىقتى بولىپ، قيىندىقتارعا مويىماي، العا قاراي قادام باسۋىڭىز كەرەك. سپورتقا جاقىن بولىڭىز.
ەڭ باستىسى-پاتريوتتىق سەزىمنىڭ باسىمدىلىعى. ءوز ەلى مەن جەرىنە قىزمەت ەتەمىن دەگەن ازامات قانا شىڭعا شىعا الادى. ال دارحاننىڭ ارمانى دا وسى ەدى. وتانى ءۇشىن قاسىق قانى قالعانشا ەڭبەك ەتكىسى كەلەتىن ازاماتتار كوپ بولسا ەكەن!
بارلىق شەكاراشىلاردى شىن جۇرەكتەن مەرەكەمەن قۇتتىقتايمىز!
لاۋرا تۇرسىنجان،
“ادىرنا” ۇلتتىق پورتالى
