Aǵam, Darhan Tursynjandy búgingi merekesimen shyn júrekten quttyqtaı otyryp, oqyrmandarǵa osy qyzmetke jetý úshin aǵamnyń júrgen joldary men sol joldardaǵy qyzyqty oqıǵalardy nazarlaryńyzǵa usynamyz.
Darhan osy istiń mamany bolý úshin ne istedi?
Bala kezden aǵamnyń eń aldymen áskerı qyzmetker bolýdy armandaǵany esimde. Arman jolynda maqsatyna jetý úshin túrli amaldar istep, naqty qadam jasaı bildi. Eń aldymen bala kezden jany sportqa jaqyn boldy. Kúres úıirmelerine baryp, jarystardan únemi júldemen oralatyn. Mektepte Alǵashqy Áskerı Daıyndyq pánin asqan qyzyǵýshylyqpen oqyp, mekep vzvod komandıri men “Jas Ulan” uıymynyń prezıdenti bolǵan.
Oıyn balasynan-shekara mamanyna deıin...
Aǵamnyń osy mamandyqty tańdap, naqty qadamdar jasaı bilgeni meni tántti etti. Oqýǵa túser aldynda tapsyratyn emtıhanǵa sabaqtan bosaı qalǵan kezde, ýaqytty qur jibermeı júgirip, beltemirge tartylyp daıyndalatyn. Áskerı ómirge qyzyqqany sonshalyq aǵamnyń myltyqty shashyp-jınaǵanyna kóz ilespeıtin. Oq atýda mergendigimen de tańqaldyrýdan jalyqpady. Osylaı nyq senimmen aǵam emtıhan tapsyrýǵa ketip, sátti tapsyryp, ózi armandaǵan oqý ornyna bilim alýǵa tústi.
Súzgiden qaıta súzilgendeı boldym...
Emtıhan tapsyrýǵa barǵanda “Súzgiden qaıta súzilgendeı boldym”-degen edi. Oqýdyń alǵashqy kezderi aǵama barǵan kezde sharshańqy reńmen shyǵatyn. Óńi sharshap turǵanymen, kózi ottaı janyp turatyn. Basynda kishkene qınalǵanyn aıtatyn. Keıin úırenip, sińisip ketkenin ózinen de baıqaýshy edik. Biraq, aǵam eshqashan “Sharshadym” -dep aıtpaıtyn. Armanyna bir taban jaqyn turǵan aǵama, esh nárse de kedergi bolmady.
Áskerı adamnyń úıdegi bolmysy qandaı?
Úıde kóńildi, óte baýyrmal jan. Áskerı ómirdiń temirdeı tártibine boıy úırengen aǵamyzdyń sózin eki qaıtalatpaýǵa tyrysamyz. Keıde «Sender tynysh uıyqtasyn dep júrmizǵoı, uıyqtaı berińder alańsyz» dep ázildep qoıady. Buryn men de Alǵashqy Áskerı Daıyndyq sabaǵynan jańa nárse úırensem, aǵama habarlasyp óz jetistigimmen maqtanyp otyratynmyn. Áli de aǵam bárimizge qoldaý kórsetip, únemi janǵa jylý syılap otyrady.
Qyzmettiń alǵashqy kúnderi
Bıyl oqýyn támámdaǵan aǵamnyń qyzmet joly mańǵaz dala-Mańǵystaý mekeninen bastaldy. Týǵan aýyly men ata-anasynan alysqa ketkeni janymyzǵa batqanymen, jyldar boıǵy armanynyń kórinis tapqanyna bárimiz de qýanyshtymyz. Aǵam qazir qyzmette. Baılanysta kúnde bola bermeýine baılanysty búgin meıramymen quttyqtaýdyń sáti túspeı tur. Ata-anadan bastap, aǵaıyn-týys, baýyrlary júrek jardy tilekterin bildirip, jyly lebizderin aıtýda.
Armanyńyz áskerı oqý orny bolsa...
Eń aldymen tabandylyqty qajet etetin mamandyqtyń ıesi bolý úshin 1 jyl ǵana daıyndalý azdyq etedi. Ózińizge degen senimińiz myqty bolyp, qıyndyqtarǵa moıymaı, alǵa qaraı qadam basýyńyz kerek. Sportqa jaqyn bolyńyz.
Eń bastysy-patrıottyq sezimniń basymdylyǵy. Óz eli men jerine qyzmet etemin degen azamat qana shyńǵa shyǵa alady. Al Darhannyń armany da osy edi. Otany úshin qasyq qany qalǵansha eńbek etkisi keletin azamattar kóp bolsa eken!
Barlyq shekarashylardy shyn júrekten merekemen quttyqtaımyz!
Laýra TURSYNJAN,
“Adyrna” ulttyq portaly
