سالىمشىلار قۇقىعىن باستى نازاردا ۇستايمىز – د.تىلەۋبەرلىقىزى

2498
Adyrna.kz Telegram

قازىر ەلىمىزدە باسپانالى بولۋدىڭ سان ءتۇرلى جولدارى بار. «ادىرنا» ۇلتتىق پورتالىنىڭ ءتىلشىسى «تۇرعىن ءۇي جيناق بانكى» الماتى قالاسى فيليالى ديرەكتورىنىڭ ورىنباسارى داناگۇل تىلەۋبەرلىقىزى تۇسىپوۆامەن باسپانا الۋ توڭىرەگىندە سۇحباتتاستى.

- داناگۇل تىلەۋبەرلىقىزى، بيىل الماتى قالاسى بويىنشا «تۇرعىن ءۇي جيناق بانكىنە» قول جەتىمدى باسپانا الۋ ءۇشىن قانشا ءوتىنىش ءتۇستى؟

- وتكەن جىلى الماتى قالاسى بويىنشا 10700 دەن استام ادام نەسيە الىپ، ءۇيلى بولدى. سالىستىرۋ ءۇشىن ايتا كەتسەك، 2018 جىلى بانك 8 مىڭ ادامعا نەسيە بەردى. ال بيىلعى بيىلعى جىلدىڭ  باسىنان قازىرگى كەزگە دەيىن نەسيە بەرۋدىڭ بارلىق باعدارلامالارى بويىنشا 3500 ادام تۇرعىن ۇيگە نەسيە الدى.

-تۇرعىن ءۇي قۇرىلىسى جيناق بانكىنىڭ ارتىقشىلىعى قانداي؟

-كوپ باعدارلامالاردى بانك ارقىلى جۇزەگە اسىراتىندىقتان حالىقتىڭ  سەنىمى ارتۋدا جانە يپوتەكا بويىنشا باسقا بانكتەرمەن سالىستىرعاندا پايىزدىق مولشەرلەمەسى وتە تومەن بولىپ كەلەدى. ءوز كەزەگىندە پايىزدىق مولشەرلەمەنىڭ تومەن بولۋى – بارلىق كليەنتتەردى قىزىقتىرادى.

قازىرگى ۋاقىتتا  سالىنىپ جاتقان ۇيلەرگە ۇلەس ساتىپ الۋ ارقىلى قاتىسۋعا بولادى. بانك سالىمشىلارىنىڭ قۇقىعىن قورعاۋ ءۇشىن تەك قانا كەپىلى بار قۇرىلىستارعا  رۇقسات بەرەمىز. «تۇرعىن ءۇي قۇرىلىسى سالىنۋىنىڭ كەپىلدەندىرۋ» قورىنا كىم ۇلەسشى بولسا، سول قوردىڭ كەپىل زاتىن قانداي دا ءبىر كومپانيا السا، سول وبەكتىنى ءبىز ءوزىمىزدىڭ سالىمشىلارىمىزعا ۇسىنىپ، ولارعا سالىنىپ جاتقان كەزىندە ساتىپ الۋ مۇمكىندىگىن بەرەمىز. بۇل باعدارلامادا بولەك پاتەردى قويىپ، كەپىل زات بەرۋ قاجەت ەمەس. نەسيەنى قوردىڭ كەپىل زاتىنىڭ نەگىزىندە بەرەمىز.

 

-الماتى قالاسىنىڭ جاستارىنا باسپانالى بولۋدىڭ قانداي جەڭىلدىكتەرى بار؟

«الماتى جاستارى» باعدارلاماسىنىڭ ءۇشىنشى كەزەڭى جۇزەگە اسىرىلۋدا. بۇل باعدارلاماعا الماتى قالاسى اكىمىنىڭ قولداۋى وتە كۇشتى بولدى. الىڭعى ەكى كەزەڭگە قاراعاندا ءۇشىنشى كەزەڭدە قارجىلاندىرۋ بىرنەشە ەسەگە كوبىرەك بولدى جانە «الماتى جاستارى» باعدارلاماسىنا بانك تاراپىنان دا اقشا ءبولىندى. وكىنىشكە قاراي، باعدارلامانىڭ اياسىندا ءوتىنىش قابىلداۋ مەرزىمى اياقتالدى. سوندىقتان ءبىز كىم ءوتىنىش تاپسىرىپ ۇلگەردى سولاردىڭ ىشىنەن تۇرعىن ءۇي باسقارماسى وزدەرى ساراپتاما  جاساپ، بارلىق تالاپتارعا ساي ادامداردىڭ ءتىزىمىن تولتىرىپ، ءبىز سۇراعان بەلگىلى ءبىر مولشەردە بىزگە ءتىزىم بەرەدى جانە كليەنتتەرگە باعىتتاما بەرەدى. اتالعان باعدارلامانىڭ اياسىندا بيىل ەكى كەزەڭدىك ءوتىنىش قابىلداۋ بولدى. العاشقى ءوتىنىش ناۋرىزدان مامىر ايىنا دەيىن قابىلدانىپ، وندا 3 مىڭنان استام الماتى جاستارى ءوتىنىش تاپسىردى. ەكىنشى كەزەڭى 22 ماۋسىم مەن 2 شىلدە ارالىعىندا ءوتىپ، 5 مىڭنان استام ازامات ءوتىنىش تاپسىردى. قازىر ءوتىنىش تاپسىرۋشىلار ىشىنەن تاڭداۋ جاسالىپ، بانككە شاقىرىلۋدا. ماسەلەن، 500-دەن اسا الماتى جاستارى بانككە قۇجاتتارىن تاپسىرىپ، ءوزىنىڭ بانك تاراپىنان تولەم قابىلەتتىلىگىن راستاۋ قۇجاتىن الدى. 200-گە جۋىق ادامعا نەسيە بەرىلدى. جىل سوڭىنا دەيىن 1000 پاتەرگە نەسيە بەرۋدى ماقسات ەتىپ وتىرمىز.

الماتى جاستارىنىڭ تاعى دا ءبىر مۇمكىندىكتەرى – تۇرعىن ءۇي قۇرلىس جيناق بانكىنەن شوت اشىپ، وزىنە اقشا جيناپ باستاعانى دۇرىس دەپ ويلايمىن. قازىر مەملەكەت تاراپىنان جاستاردىڭ ءۇيلى بولۋىنا مول مۇمكىندىكتەر قاراستىرىلۋدا. مىسالى، الماتى جاستارى 5 جىلعا جالعا ءۇي الىپ، سوندا تۇرۋ ارقىلى وزدەرىنىڭ بولاشاق ۇيلەرىنە اقشا جيناۋ مۇمكىندىگىن الىپ وتىر. پاتەردى جالعا بەرۋ اقىسى وتە تومەن دەڭگەيدە.

 

-جاستاردان باسقا قانداي ساناتتاعى ادامدارعا تۇرعىن ءۇي جەڭلدىگى قاراستىرىلعان؟

-تۇرعىن ءۇي قارىم-قاتىناستارى زاڭىنا سايكەس:

-   جاس بولسا دا بيۋدجەتتىك بولىمشەلەردە جۇمىس ىستەيتىن نەمەسە مەملەكەتتىك لاۋازىمدا جۇمىس ىستەيتىن ازاماتتار;

- بەلگىلى ءبىر كاتەگوريالارعا جاتاتىن كوپ بالالى وتباسىلار;

- مۇگەدەك بالالاردى تاربيەلەۋشى جانە تولىق ەمەس وتباسىلاردىڭ تابىسى بەلگىلى ءبىر مولشەردەن اسپايتىن ازاماتتار  اتىندا ءۇي بولماعان جاعدايدا الماتى قالاسىندا تىركەۋدە بولسا، وسى زاڭ اياسىندا ءۇي الۋ كەزەگىنە تۇرۋى مۇمكىندىگى بار.

بۇعان جاس نەمەسە ورتا جانە ۇلكەن جاستاعى ادامدار دا قاتىسا الادى.  اكىمشىلىكتە كەزەكتە تۇرعان ادامداعا ارنايى  «5-10-20» باعدارلامسى اشىلىپ جاتىر. بۇل باعدارلامانىڭ اياسىندا كوپ ازاماتتارعا ءۇي الا الاتىن مۇمكىندىك بار. نەگىزگى شارتى: اكىمشىلىككە كەزەككە تۇرۋ كەرەك جانە تابىسى 1/3 تۇرمىس دەڭگەيىنە ارنالعان مينيمۋمنان اسپاۋ كەرەك. ەسكەرتە كەتەيىن، بۇعان تابىسى ۇلكەن دەڭگەيدەگى ازاماتتار قاتىسا المايدى.  تەك تابىسى ورتاشا (جالاقىسىنىڭ 50-60 پايىزى نەسيەگە جەتۋ كەرەك – اۆت.) دەڭگەيدەگى جانۇيالار عانا قاتىسا الادى. قازىرگى كەزدە «نەسيەلىك تۇرعىن ءۇي» دەگەن باعدارلاما جۇمىس جاساۋدا. مۇنىڭ العاشقى جارناسى – 20%. جوعارىدا اتالعان باعدارلامالار «نۇرلى جەر» باعدارلاماسىنان باستاۋ الادى.

سۇحباتىڭىزعا راحمەت!

 

اڭگىمەلەسكەن گۇلۆيرا اسقارقىزى،

«ادىرنا» ۇلتتىق پورتالى

پىكىرلەر