“جۇرەگىم اۋىرادى”. بەتپەردەلى جىگىت جالعىزباستى اكەگە كومەكتەستى

بەتپەردە تاققان جىگىت دەنساۋلىعى ناشار جالعىزباستى اكەگە كومەك بەردى، دەپ حابارلايدى “ادىرنا” ۇلتتىق پورتالى.

بەتپەردەلى جىگىت ەگىستىككە ارنايى بارىپ، مەرگەن ەسىمدى ادامدى ىزدەگەن. سەبەبى ەر ادام — ءۇش بالاسى بار جالعىزباستى اكە. مەرگەننىڭ ەكى دە كوزى ناشار (-9) كورەتىن بولىپ شىقتى. ودان بولەك، ازاماتتىڭ ۇلى — ءۇشىنشى توپ مۇگەدەگى.

ءۇش بالاسى بار اكە جۇبايى مەن ءتورتىنشى بالاسىنان ايىرىلعان.

"جاقىندا جولداسىم ومىردەن وزدى. ىشىندە 3,5 ايلىق سابيمەن كەتتى. ءوزىم جالدامالى جۇمىسشى بولىپ ىستەيمىن. قازىر ەگىستىكتە قىرىققابات تەرەمىز. ەكى كوزىم دە — مينۋس 9. ۇلكەن بالام دا يحتيوز دەگەن اۋرۋمەن اۋىرادى. دەنەسىندە قارا داقتارى بار. باسىمدا باسپانا جوق. "ۆرەميانكادا" تۇرامىز. وندا گاز جوق", - دەدى مەرگەن.

ازامات ايەلىنىڭ ءولىمىن قابىلداي الماي جۇرگەنىن ايتىپ، كوزىنە جاس الدى.

بەتپەردە تاعىپ، ءجۇزىن جاسىرعان جىگىت جالعىزباستى اكەگە قوماقتى قارجى ۇستاتىپ، ءوزىنىڭ جانە بالاسىنىڭ ەمىنە ەكەنىن ايتتى.

سونداي-اق جىگىت ەر ادامعا ءوز كاسىبىن اشۋعا كومەكتەسۋگە ۋادە بەرىپ، ءۇيدىڭ كىلتىن دە تابىستادى.