شىمكەنت قالاسى اكىمىنىڭ وكىمىمەن راشيد مامىتۇلى مىڭباەۆ شىمكەنت قالاسىنىڭ اكىمى اپپاراتى باسشىسىنىڭ ورىنباسارى بولىپ تاعايىندالدى.
راشيد مىڭباەۆ 1981 جىلى 11 ساۋىردە وقو بايدىبەك اۋدانى شايان اۋىلىندا دۇنيەگە كەلگەن. ءبىلىمى - جوعارى، ماماندىعى-زاڭگەر، ەكونوميست، مەملەكەتتىك جانە جەرگىلىكتى باسقارۋ ماگيسترى.
راشيد مامىتۇلى ەڭبەك جولىن 2002 جىلى قر ادىلەت مينيسترلىگىنىڭ نورماتيۆتىك قۇقىقتىق اكتىلەردى كوديفيكاتسيالاۋ جانە جۇيەلەۋ باسقارماسىنداعى نورماتيۆتىك-قۇقىقتىق اكتىلەردى كوديفيكاتسيالاۋ ءبولىمىنىڭ جەتەكشى مامانى بولىپ باستاعان.
2006-2007 جىلدارى زاڭعا تاۋەلدى اكتىلەردى ساراپتاۋ باسقارماسى باستىعىنىڭ ورىنباسارى – قر ادىلەت مينيسترلىگى زاڭعا تاۋەلدى اكتىلەر دەپارتامەنتىنىڭ قورعانىس، قۇقىق ءتارتىبى جانە سىرتقى بايلانىس ماسەلەلەرى بويىنشا اكتىلەردى ساراپتاۋ ءبولىمىنىڭ باسشىسى لاۋازىمىن اتقاردى.
2007 جىلى قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنا ءتۇسىپ، 2009 جىلى «مەملەكەتتىك جانە جەرگىلىكتى باسقارۋ» ماگيسترى اتاندى.
راشيد مىڭباەۆتىڭ قىزمەتتىك جولى وڭتۇستىك قازاقستان وبلىسى اكىمىنىڭ كەڭەسشىسى، كومەكشىسى، كەيىننەن قوعامدىق قاتىناستار مونيتورينگى ءبولىمىنىڭ مەڭگەرۋشىسى قىزمەتتەرىمەن جالعاستى.
سونىمەن قاتار، 2016-2018 جىلدارى كەنتاۋ قالاسى اكىمىنىڭ ورىنباسارى بولدى. 2019 جىلدان باستاپ بۇگىنگى كۇنگە دەيىن شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى قىزمەتىن اتقاردى.
شىمكەنت قالاسى اكىمىنىڭ ءباسپاسوز قىزمەتى
