ساناۋلى كۇندەردىڭ كەيىن ءبىلىم گرانتى يگەرلەرىنىڭ ءتىزىمى شىعادى. بيىل تەگىن ءبىلىم الۋعا ۇمىتكەر تۇلەكتەردىڭ سانى 80 مىڭنان اسادى. ولاردىڭ ىشىنەن 53 مىڭ قازاقستاندىق تالاپكەر جوعارى ءبىلىمدى تەگىن – مەملەكەت ەسەبىنەن الا الادى. ال بۇل تىزىمگە ىلىگە الماي قالعان تۇلەكتەر اقىلى نەگىزدە وقۋ ءۇشىن قولجەتىمدى جوعارى وقۋ ورنىن ىزدەپ, الەك بولاتىنى انىق. «ادىرنا» ۇلتتىق پورتالى قازاقستاندىق جوو-داعى ءبىلىم الۋ قۇنىن انىقتادى.
كيمەپ ۋنيۆەرسيتەتى
ەلىمىزدەگى ەڭ قىمبات جوعارى وقۋ ورنى - كيمەپ ۋنيۆەرسيتەتى. بۇل ءبىلىم ورداسىنداعى وقۋ اقىسى 2 ميلليون 700 مىڭ تەڭگەدەن باستالادى.ۋنيۆەرسيتەت ستۋدەنتەرىنە اعىلشىن تىلىندە وقىتاتىن 31 اكادەميالىق باعدارلامانى ۇسىنادى.
ءال-فارابي اتىنداعى قازۇۋ
ال قازاقستانداعى كوپ سالالى ۋنيۆەرسيتتەردىڭ ۇلتتىق رەيتينگىسىن باستاپ تۇرعان ءال-فارابي اتىنداعى قازاق ۇلتتىق ۋنيۆەرسيتەتىندە وقۋ اقىسى 1 ميلليون تەڭگەدەن 1 ميلليون 600 مىڭ تەڭگەگە دەيىن بارادى. وقۋ ورنى جاقىندا الەمنىڭ ۇزدىك 165 ۋنيۆەرسيتەتىنىڭ قاتارىنا ەندى.
گۋميلەۆ اتىنداعى ەۇۋ
ەگەر ءسىز رەيتينگتە ەكىنشى ورىن الاتىن گۋميلەۆ اتىنداعى ەۆرازيا ۇلتتىق ۋنيۆەرسيتەتىندە وقىعىڭىز كەلسە كەم دەگەندە 1 ميلليون 150 تەڭگە قارجى جيناپ قويىڭىز. 2000 جىلدان باستاپ ۋنيۆەرسيتەت حالىقارالىق دەڭگەيدەگى جوعارى وقۋ ورنى بولىپ سانالادى.
اسفەندياروۆ اتىنداعى قازۇمۋ
بولاشاق دارىگەرلەردى دايىندايتىن اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىندە وقۋ اقىسى 635 مىڭ تەڭگەدەن باستالادى. ۋنيۆەرسيتەتتە قازاقستاننىڭ بەلگىلى عالىم-پەداگوگتارى، قر ۇلتتىق ۇلتتىق عىلىم اكادەمياسىنىڭ، رەسەي مەديتسينالىق عىلىمدار اكادەمياسىنىڭ، قر پروفيلاكتيكالىق مەديتسينا اكادەمياسىنىڭ، حالىقارالىق اكاداميالاردىڭ اكادەميكتەرى قىزمەت ەتەدى.
UIB ۋنيۆەرسيتەتى
الماتى شاھارىنىڭ تورىندە ورنالاسقان حالىقارالىق بيزنەس ۋنيۆەرسيتەتىندە دە وقۋ اقىسى ارزان ەمەس. بۇل جەردە وقۋ ءۇشىن جىلىنا كەم دەگەندە 800 مىڭ تەڭگە تولەۋىڭىز كەرەك. سونىمەن قاتار، كەلەسى كۋرسقا اياق باسقان سايىن بۇل باعانىڭ كوتەرىلىپ وتىراتىنىن ۇمىتپاعانىڭىز ءجون.
ساتباەۆ اتىنداعى قازۇتۋ
تەحنيكالىق باعىتتى تاڭداساڭىز، قۇجاتتارىڭىزدى ساتباەۆ ۋنيۆەرسيتەتىنە تاپسىرىڭىز. ول ەلىمىزدەگى ەڭ ۇزدىك تەحنيكالىق جوعارى وقۋ ورنى. وقۋ اقىسى 635 مىڭ تەڭگەدەن باستالادى.
جۇرگەنوۆ اتىنداعى قازاق ۇلتتىق ونەر اكادەمياسى
جۇرگەنوۆ اتىنداعى قازاق ۇلتتىق ونەر اكادەمياسىنداعى وقۋ اقىسى 600-640 مىڭ تەڭگە ارالىعىن قۇرايدى. وقۋ 12 ماماندىق جانە 39 ارناۋلى ماماندىق بويىنشا جۇرگىزىلەدى.
م.اۋەزوۆ اتىنداعى وقمپۋ
شىمكەنت قالاسىندا ورنالاسقان م.اۋەزوۆ اتىنداعى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى ەلىمىزدەگى ۇزدىك جوعارى وقۋ ورنىنىڭ ۇشتىگىنە كىرەدى. وقۋ اقىسى بارلىق ماماندىقتارعا بىردەي، 360 مىڭ تەڭگەنى قۇرايدى.
م.وتەمىسۇلى اتىنداعى بقۋ
ەلىمىزدىڭ باتىس وڭىرىندە وقۋ الدەقايدا ارزانعا شىعادى. م.وتەمىسۇلى اتىنداعى باتىس قازاقستان ۋنيۆەرسيتەتىندە اقىلى ءبىلىم الۋ 287 مىڭ تەڭگەدەن باستالادى.
قورقىت اتا اتىنداعى قمۋ
ەلىمىزدەگى ەڭ قولجەتىمدى وقۋ ورىندارىنىڭ ءبىرى –قورقىت اتا اتىنداعى قىزىلوردا مەملەكەتتىك ۋنيۆەرسيتەتى. وقۋ اقىسى - 270-443 مىڭ تەڭگە ارالىعىندا.
ەكونوميكا، يۋريسپرۋدەنتسيا، حالىقارالىق قاتىناستار، حالىقارالىق قۇقىق، الەمدىك ەكونوميكا، ستوموتولوگيا ماماندىقتارىنىڭ وقۋ اقىسى باسقا ماماندىقتارعا قاراعاندا جوعارى.
ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىنان پاندەميا كەزىندە وقۋ اقىسىن كوتەرمەۋدى سۇراعان ەدى. دەسە دە، جوعارىدا كورسەتىلگەن باعالارعا قاراپ، ءمينيستردىڭ وتىنىشىنە قۇلاق اسقان ۋنيۆەرسيتەتتەردىڭ ساۋساقپەن سانارلىق ەكەنىنە كوز جەتكىزءىپ وتىرمىز.
ديانا اسانوۆا،
«ادىرنا» ۇلتتىق پورتالى
