COVID-19 جۇقتىرعان ناۋقاستاردىڭ 85 پايىزى دارىگەرلەردىڭ نازارىنان تىس قالعان بولۋى مۇمكىن. بۇل تۋرالى ونلاين-بريفنگتە قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ ميكروبيولوگيا، ۆيرۋسولوگيا جانە جالپى يممۋنولوگيا كافەدراسىنىڭ پروفەسسورى راۋشان تەسوۆا-بەردالينا ايتتى، - دەپ حابارلايدى Tengrinews.kz .
ونىڭ ايتۋىنشا، ناۋقاستاردىڭ 60-70 پايىزىندا اۋرۋ بەلگىسى جوق، سوندىقتان ولار تاسىمالداۋشى بولۋى مۇمكىن.
"بۇگىندە العاشقى مەديتسينالىق-سانيتارلىق كومەك جۇيەسى ءتيىمسىز. اۋرۋدىڭ انىقتالۋى مەن ادامداردىڭ جۇگىنۋى بار بولعانى 14 پايىز، سايكەسىنشە، شامامەن 85 پايىز ناۋقاس مەديتسينا نازارىنان تىس قالۋى مۇمكىن.
كەز كەلگەن ادام سيمپتومسىز بولۋى مۇمكىن، ونى تەك تالداۋ ارقىلى انىقتاۋعا بولادى.
بىراق ەگەر ادامدار ۇنەمى مەديتسينالىق تەكسەرىستەن وتسە مۇنداي جاعداي بولماس ەدى. سوزىلمالى اۋرۋلارى بار ادامداردىڭ يممۋندىق جۇيەسى دۇرىس ىستەمەيدى. ءسويتىپ ولار وسى ينفەكتسيانىڭ سيمپتومسىز تاسىمالداۋشىلارى بولادى", - دەيدى پروفەسسور.
