ەكىباستۇزدا ءۇي سالۋ جۇمىسى قارقىندى

2510
Adyrna.kz Telegram

«گيدروپروم» جشس (ديرەكتورى يسلامبەك قۇلتۋمانوۆ) باسقارۋىمەن ەكىباستۇز قالاسىنىڭ 9-شى شاعىن اۋدانىندا بەس توعىز قاباتتى ۇيلەر سالىنىپ جاتىر. وسى بەس ءۇيدىڭ بارلىعى دا بيىلعى جىلى قولدانۋعا بەرىلەدى دەپ جوسپارلانىپ وتىر. قۇرىلىس جۇمىستارىنا بارلىعى 120-عا جۋىق ادام تارتىلعان. جۇمىسشىلاردىڭ قاتارى تاجىريبەلى جانە بىلىكتى مامانداردان قۇرالعان.

قۇرىلىس-جوندەۋ جۇمىستارىنىڭ بارىسىمەن تانىستىرعان   كاسىپورىننىڭ ۋچاسكە باستىعى قانات اۋباكىروۆتىڭ ايتۋىنشا، قۇرىلىستا وتاندىق ءونىم ماتەريالدارى (كىرپىشتەر، بەتوندى بلوكتار جانە ت.ب.) پايدالانىلۋدا.

«بيىك عيماراتتاردى سالۋدىڭ وزىندىك ءمانى بار. توپىراق تۇراقسىز بولعاندىقتان، ىرگەتاستى نىق ورناتۋ ءۇشىن بەتون تىرەكتەرى 9-12 مەتر تەرەڭدىكتە ورنالاستىرىلدى. تەك ءبىر بيىك ءۇيدىڭ نەگىزىن قالاۋ ءۇشىن قۇرىلىسشىلار وسىنداي 270 (!) بەتون قادالارىن پايدالانعان. ارينە، جۇمىس وڭاي ەمەس جانە قىمبات، بىراق عيمارات بەرىك جانە تۇراقتى بولۋى ءۇشىن بۇنداي جۇمىستار قاجەت»، - دەيدى ق.اۋباكىروۆ.

قالامىزدا وزگە دە جاڭا ۇيلەردى سالعان «گيدروپروم» جشس-نىڭ جۇمىس ساپاسى جاقسى ەكەندىگىن قالا تۇرعىندارى بىلەدى. وسىعان وراي جاڭا ۇيلەر ۋاقىتىندا تاپسىرىلىپ، كەزەكتە تۇرعاندار بيىلعى جىلى قونىس تويلارىن تويلايدى دەپ سەنەمىز.  

“ادىرنا” ۇلتتىق پورتالى

پىكىرلەر