«Gıdroprom» JShS (dırektory Islambek Qultýmanov) basqarýymen Ekibastuz qalasynyń 9-shy shaǵyn aýdanynda bes toǵyz qabatty úıler salynyp jatyr. Osy bes úıdiń barlyǵy da bıylǵy jyly qoldanýǵa beriledi dep josparlanyp otyr. Qurylys jumystaryna barlyǵy 120-ǵa jýyq adam tartylǵan. Jumysshylardyń qatary tájirıbeli jáne bilikti mamandardan quralǵan.
Qurylys-jóndeý jumystarynyń barysymen tanystyrǵan kásiporynnyń ýchaske bastyǵy Qanat Áýbákirovtyń aıtýynsha, qurylysta otandyq ónim materıaldary (kirpishter, betondy bloktar jáne t.b.) paıdalanylýda.
«Bıik ǵımarattardy salýdyń ózindik máni bar. Topyraq turaqsyz bolǵandyqtan, irgetasty nyq ornatý úshin beton tirekteri 9-12 metr tereńdikte ornalastyryldy. Tek bir bıik úıdiń negizin qalaý úshin qurylysshylar osyndaı 270 (!) beton qadalaryn paıdalanǵan. Árıne, jumys ońaı emes jáne qymbat, biraq ǵımarat berik jáne turaqty bolýy úshin bundaı jumystar qajet», - deıdi Q.Áýbákirov.
Qalamyzda ózge de jańa úılerdi salǵan «Gıdroprom» JShS-nyń jumys sapasy jaqsy ekendigin qala turǵyndary biledi. Osyǵan oraı jańa úıler ýaqytynda tapsyrylyp, kezekte turǵandar bıylǵy jyly qonys toılaryn toılaıdy dep senemiz.
“Adyrna” ulttyq portaly
