ادىرنا كۇنتىزبەسى: 1 تامىز - اقان سەرى ەسكەرتكىشى قويىلعان كۇن

3011
Adyrna.kz Telegram

1991 جىلى 1 تامىز كۇنى  كوكشەتاۋدا اقان سەرىنىڭ ەسكەرتكىشى قويىلدى. ايتۋلى كۇندە وزدەرىڭىزبەن اقان سەرىنىڭ اڭىزعا اينالعان بالقاديشا ءانىنىڭ شىعۋ تاريحىمەن بولىسكىمىز كەلەدى.

اقان توي-تومالاقتان تىيلىپ، ۇيىندە وتىرعان كەزدە «اقان جىندانىپ كەتىپتى، ءتۇن ورتاسىندا سۋ پەرىسىمەن ويناس قىلىپ ءجۇر» دەگەن قاۋەسەت ءورشىپ تۇرادى. اقان شىعارماشىلىق داعدارىستا جۇرگەن وسىنداي تۇستا، ول ءبىر شىلدەحاناعا شاقىرتۋ الادى. تويدا وتىرعاندا اقان وتىرعان ۇيگە توتىدايىن سىلانعان حاديشا اتتى قىز كەلەدى. سول اۋىلدىڭ ول اۋىلداعى ىبىراي دەگەن اۋقاتتى كىسىنىڭ قىزى ەكەن. ءبىر كەزدە حاديشا: “اقان اعامنىڭ قاسىنا وتىرىپ ءان تىڭدايىنشى”، - دەپ دوستىق پەيىل تانىتادى. سول كەش بويى اقان مەن بالقاديشا سۇلۋ اۋەزدى ءان شىرقايدى. مۇنى ەستىگەن قىزدىڭ اعالارى جەڭگەلەرىن جۇمساپ، بالقاديشانىڭ ۇيگە قايتۋىن بۇيىرادى. سونداي ساتتە:

دەگەندە، بالقاديشا، بالقاديشا،

بولارسىڭ ءبىزدىڭ سوزگە زار، قاديشا.

بۇلاڭداپ اساۋ تايداي جۇرگەن باسىڭ،

بولاسىڭ قانداي جانعا جار، قاديشا.

قىزى ەدىڭ ىبىرايدىڭ بالقاديشا

وزەندى ورلەي بىتكەن تال، قاديشا،

ءبىر تۇگىل ەكى جەڭگەڭ كەلىپ وتىر،

رۇقسات بىزدەن سىزگە بار، قاديشا، - دەپ اقان سەرى ۇزاق انگە باسقان ەكەن.

اقانتانۋشىلاردىڭ سوزىنشە، سەرى بالقاديشانى شىن ۇناتقان، ال قاديشا اقاننىڭ وزىنە ەمەس، انىنە عاشىق بولعان. نەگىزىندە ول ءوزى سۇيگەن جىگىتكە تۇرمىسقا شىعىپ، بىرنەشە پەرزەنتتىڭ اناسى اتانىپ، باقىتتى عۇمىر كەشكەن دەسەدى. ال جاسى ەلۋدەن اسقان اقان اتامىز ويىن اشىق ايتا الماي، ىشتەن تىنعان ەكەن.

ارقانىڭ اقبەرەن ءانشىسى، قازاقتىڭ سۇلۋ سەرىسى اقان اندەرىنىڭ دۇنيەگە كەلۋىنە سەبەپكەر بولعان نازىك جاندىلار مۇنىمەن بىتپەيدى. ودان بولەك، اقتوقتى دا، سىعان قىزى دا  ماڭگىلىك ولمەيتىن اندەرگە ارقاۋ بولعان اڭىز ارۋلارىمىز.

 

اياۋلىم ءابىلدا

“ادىرنا” ۇلتتىق پورتالى

پىكىرلەر