شىمكەنت: «iKomek» ورتالىعىنا كەلىپ تۇسكەن ساۋالداردىڭ 95 پايىزى قاناعاتتاندىرىلدى

1988
Adyrna.kz Telegram

شىمكەنت قالاسىنىڭ اكىمى مۇرات ايتەنوۆتىڭ تاپسىرماسىمەن «iKomek» جەدەل قىزمەت ەتۋ ورتالىعى اشىلعان بولاتىن. كۇنى كەشە قالا باسشىسى ورتالىقتىڭ جۇمىسىمەن تانىسىپ قايتتى. قالادا كورسەتىلەتىن قىزمەتتەردىڭ تيىمدىلىگىن ارتتىرۋدا اتالعان ورتالىقتىڭ قوسار ۇلەسى مول ەكەنىنە سەنىم بىلدىرگەن قالا اكىمى، مەكەمە شاھارداعى كۇرمەۋى شەشىلمەگەن كوپ ماسەلەنى انىقتاپ، جەدەل ءارى ساپالى شەشىلۋىنە ىقپال ەتەتىنىن ايتتى.

«مەملەكەت باسشىسى ق.توقاەۆ ءوز جولداۋىندا ازاماتتاردىڭ بارلىق ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدى ايتقان بولاتىن. اتالعان ورتالىقتىڭ جۇمىسى - وسى تۇجىرىمدامادا كورسەتىلگەن بارلىق ازاماتتاردىڭ وتىنىشتەرىنە جەدەل جانە ءتيىمدى ارەكەت ەتۋگە باعىتتالۋى ءتيىس»،-دەدى قالا باسشىسى.

ءۇشىنشى مەگاپوليستەگى قىزمەت كورسەتۋ ساپاسىن ارتتىرۋ ماقساتىندا اشىلعان «109» بىرىڭعاي تەلەفون نومىرىنە ءبىر اي كولەمىندە 7000-عا جۋىق قوڭىراۋ كەلىپ ءتۇسىپ، ولاردىڭ 95 پايىزى قاناعاتتاندىرىلعان. ورتالىققا قازىر نەگىزىنەن كارانتين رەجىمىنە قاتىستى ساۋالدار كەلىپ تۇسۋدە.
قازىرگى تاڭدا ورتالىقتا جالپى 33 مامان ءۇش باعىتتا جۇمىس ىستەيدى. اۋەلى تۇرعىنداردان كەلگەن ءوتىنىش-شاعىمداردى وپەراتور قابىلداپ، ودان ءارى ينسپەكتور سۇراقتىڭ ساپاسى مەن مازمۇنىن باقىلاپ، اتقارۋشى ورگاندارعا باعىتتايدى. ءۇشىنشىسى، تاپسىرمانىڭ ورىندالۋىن قاداعالايدى.
«iKomek» جەدەل قىزمەت ەتۋ ورتالىعى تۇرعىنداردىڭ ءوتىنىشىن كۇندىز-ءتۇنى قابىلداپ، مەملەكەتتىك جۇمىستىڭ قىزمەتىن اشىق ءارى قولجەتىمدى ەتۋدى كوزدەيدى. وسىعان دەيىن 30 مەكەمەمەن بايلانىستا بولسا، ەندى قىزمەت كورسەتۋ اياسىن كەڭەيتىپ، ولاردىڭ قاتارىن 300-400-گە ارتتىرۋدى جوسپارلاپ وتىر.

شىمكەنت 

پىكىرلەر