Álem mundaı jaǵdaıdy eshqashan bastan keshpegen. 7 aıdan beri aýyzdyqtalmaǵan indettiń zardaby men qıyndyǵyn ózgeden buryn Densaýlyq saqtaý mınıstrleri kórip kele jatqany anyq. Syn saǵatta halqyn aman saqtap qalý úshin jankeshtilikpen qyzmet etip júrgen mınıstrlermen qosa mort synyp, jurtyn jolaıryqta qaldyryp ketkenderi de bar. Tómende pandemııa kezinde otstavkaǵa ketken mınıstrler tizimin usynyp otyrmyz, bul jaqsy ma, jaman ba?
Ýkraınanyń burynǵy Densaýlyq saqtaý mınıstri Ilıa Eme óte qysqa merzimde óziniń indettiń taralýy jónindegi málimdemeleriniń janjal týdyrýy saldarynan qyzmetinen bosatylǵan.
Ol bir sózinde eldegi barlyq zeınetker vırýs saldarynan qaıtys bolatynyn aıtsa, endi bir sózinde kásipkerlerge vırýspen kúreske qoldaý bildirýin suraı otyryp, «máıitterge» aqsha shyǵyndamaýǵa bolatynyn jetkizgen. 64 jasar mınıstrdiń sózinshe, «máıitter» – 65 jastan asqan qarııalar kórinedi.
Naýryz aıynda, álemde pandemııanyń órship turǵan shaǵynda Rýmynııa Densaýlyq saqtaý mınıstri óz mindetin durys atqara almaǵany úshin ornyn bosatqan. Sýchava rýmyn provınııasynda dárigerler vırýs juqtyryp, qaladaǵy eki birdeı aýrýhana dezınfıkııa úshin jabylǵan. Nátıjesinde naýqastardy emdeıtin oryn men mamandar jetispeı, halyq mınıstr qyzmetine narazylyǵyn bildirgen.
Sáýir aıynyń basynda Shotlandııanyń Densaýlyq mınıstri Ketrın Kaldervýd COVID-19 vırýstyń taralýyna baılanysty engizilgen karantındik sharttardy buzǵany úshin qyzmetinen ketýge sheshim qabyldaǵan. Halyqty úıden shyqpaýǵa úndegen ol otbasymen birge eki ret Edınbýrgten shyǵyp, qala syrtyndaǵy saıajaıyna barǵan. Mınıstrdiń bul áreketi BAQ ókilderiniń nazarynan tys qalmaı, ábden synǵa ushyraǵan.
Brazılııada bir aıda 2 Densaýlyq saqtaý mınıstri otstavkaǵa ketken. Sáýir aıynda Brazılııa Prezıdenti Jaır Bolsonarý Densaýlyq mınıstriniń vırýsqa qarsy uıymdastyrǵan sharalaryn quptamaı, ornyna Nelson Teıchti taǵaıyndaǵan. Áıtse de, bul mınıstr de memleket basshysymen kelispeı, bir aıǵa jetpeı-aq ornyn bosatqan.
Prezıdent Jaır Bolsonarý mınıstrdiń sheshimi tym qatań ekendigin, shekteýlerdi tezirek alyp tastaý kerek ekendigin aıtqan. Al mınıstrlik basshynyń bul sheshimin quptamaǵan. Sonyń saldarynan bul elde indet qatty órship, AQSh-tan keıingi eń kóp zardap shekken memleket bolyp otyr. 23 shilde kúni Brazılııada 67 myńnan astam adamnan COVID-19 vırýsy tabylyp, bir kúndik antırekord tirkelgen. Prezıdent Jaır Bolsonarýden osy aıda úsh ret vırýs bar ekendigi anyqtalǵan. Alaıda, el ishindegi jaǵdaıǵa qaramastan, dál qazir Brazılııada koronavırýske qarsy vakına synaqtan ótýde. Preparattyń jaramdylyǵyn tekserýge 9 myńnan astam erikti qatysýy múmkin.
Jańa Zelandııanyń Densaýlyq saqtaý mınıstri Devıd Klark sáýir aıynda qatań túrde engizilgen karantın rıjimine qaramastan jaǵajaıǵa barǵanyn moıyndap, otstavka ketýdi uıǵarǵan. Biraq premer mınıstr Djasında Ardern ol ýaqytta: «Qalypty jaǵdaıda men densaýlyq saqtaý mınıstrin qyzmetinen bosatar edim. Ol qatelik jasady jáne ony eshnárse de aqtaı almaıdy. Biraq dál qazir men úshin mańyzdysy – bizdiń COVID-19-ǵa qarsy ujymdyq kúresýimiz», - dep keıinge shegergen. Mınıstr shilde aıynyń basynda qyzmetin bosatty.
Sondaı-aq Túrkııanyń Ishki ister mınıstri Súleıman Soılý 11 sáýir saǵat 00.00-den 12 sáýirdiń keshine deıin 31 provınııaǵa engizilgen komendanttyq saǵattan el ishinde týǵan ajıotajǵa baılanysty jaýapkershilikti ózine alyp, otstavkaǵa ketetinin málimdegen. Alaıda buqara halyq áleýmettik jelilerde Erdoǵannyń kelisimin tapqan bul komendanttyq saǵat úshin mınıstrdiń otstavkaǵa ketýine qarsylyǵyn bildirip, mınıstrge qoldaý kórsetken. Nátıjesinde Prezıdent Erdoǵan mınıstr Soılýdy ornynda qaldyrady.
Esterińizge sala keteıik, 25 maýsymda Memleket basshysynyń jarlyǵymen Eljan Amantaıuly Birtanov Qazaqstan Respýblıkasynyń Densaýlyq saqtaý mınıstri qyzmetinen bosatylǵan-dy. Eks-mınıstr koronovırýs juqtyrýyna baılanysty memleket basshysyna ótinish bergen.
Aıjan QURMANBAI,
"Adyrna" ulttyq portaly.
