قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى قۇربان ايت قارساڭىندا حالىققا ۇندەۋ جاسادى. بۇل تۋرالى "ادىرنا" قازاقپاراتقا سىلتەمە جاساپ حابارلايدى.
«بۇگىن كۇندەردىڭ سۇلتانى – قاسيتەتتى جۇمادا، ايلاردىڭ ۇلىعى – زۇلحيدجا ايىندا حالقىمىزدىڭ اماندىعى مەن ەلىمىزدىڭ يگىلىگى ءۇشىن جاساپ جاتقان دۇعا-تىلەكتەرىڭىز قابىل بولعاي! ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) «اللا تاعالانىڭ قۇزىرىندا وسى كۇندە جاسالعان ىزگى امالدان ابزال ءارى سۇيكىمدى يگى ءىس جوق» دەگەن.
وسى كۇندەرى ورازا ۇستاپ، ساداقا بەرىپ، ناۋقاستارعا ءدارى جەتكىزىپ، قاراۋسىز قالعان قارتتار مەن جەتىمدەرگە، كوپبالالى وتباسىلارعا كومەكتەسۋدىڭ ساۋابى مول. شالعان قۇرباندىق، بەرگەن ساداقا، جاساعان ءاربىر يگى امالداردىڭ ساۋابىن اللا تاعالا بارشامىزعا ءناسىپ ەتكەي»، - دەدى باس ءمۇفتي ورتالىق كوممۋنيكاتسيالار قىزمەتىندە.
باس ءمۇفتي قاسيتەتتى كۇندەر مەن ايلاردا ادام بالاسىنىڭ رياسىز جاساعان قۇلشىلىعى مەن دۇعاسى قابىل بولاتىنىن جەتكىزدى. «اللانىڭ ءاس-سالام – ياعني اماندىق پەن ءاش-شافي – شيپا بەرۋشى كوركەم ەسىمدەرىن ۇلىقتاي وتىرىپ، دەرتكە شالدىققانداردىڭ دەرتىنە شيپا سۇرايمىز. قايتىس بولعاندار ءۇشىن اللادان راحىم، پايعامباردان شاپاعات سۇرايمىز. ءبىز – وتكەنگە سالاۋات ايتىپ، اللانىڭ ارايلاپ اتقان ءاربىر تاڭىنان جاقسىلىق كۇتكەن حالىقپىز. رۋحىمىزدى تۇسىرمەي، سىن ساعاتىندا ساعىمىزدى سىندىرىپ المايىق.
قادىرلى جاماعات! ءبىز قازىر سىندارلى ساتتە وتىرمىز. مۇندايدا حالىق دانالىعى «بەتەگە كەتسە بەل قالار، بەكتەر كەتسە ەل قالار، بەرەكەڭ كەتسە نە قالار؟» دەمەي مە؟ ارداقتى پايعامبارىمىز ايتقانداي، جاقسى سويلەپ، اينالاداعى ادامدارعا شۋاق شاشىپ، ۇرەيگە ەمەس ۇمىتكە قانات بىتىرەيىك. الدىمىزدا كۇللى ءيسى مۇسىلمان بالاسى اسىعا كۇتكەن ۇلىق مەيرام – قۇربان ايت كەلە جاتىر. ايت قارساڭىندا بارشاڭىزعا اللانىڭ اماندىعى مەن جاقسىلىعىن تىلەيمىن»، - دەدى ناۋرىزباي قاجى تاعانۇلى.
"ادىرنا" ۇلتتىق پورتالى
